Biblia Todo Logo
Bìoball air-loidhne

- Sanasan -

2 Dzikoronika 5 - Bhibhiliya Nya Guage


Miningelo ya Dhavhidhe yi ngu vegwa Nyumbani ga Nungungulu
( 2 Samuweli 6:12-19 ; 1 Dzipfhumu 8:1-9 )

1 Khu kharati, mufumeli Solomoni, a di vbedza thumo watshavbo a wu thumidego Nyumbani ga Nungungulu; khavbo avbo, Solomoni a di resa sombo satshavbo nya miphaso sa babe waye Dhavhidhe, esi a nga bani a si phasede Nyumbani ga Nungungulu, a gu esi: Parata, ndralama ni sombo satshavbo, uye a dita si vega vbakari nya dzithomba dza Nyumbani gwa Nungungulu.


Solomoni a ngu resa Ngasa nya gidzumeledzwano Nyumbani gwa Nungungulu
( 1 Dzipfhumu 8:1-11 )

2 Solomoni a di tombanisa vatshavbo vathangeli va na Israyeli, vasingalagadzi, ni vathangeli vatshavbo nya mahundzu, mihungo nya mapango ya na Israyeli; gasi va gwedzisa Ngasa nya Gidzumeledzwano gya Nungungulu Dhoropani ga Dhavhidhe, a gu Siyoni, yi ya khala Nyumbani gwa Nungungulu.

3 Vathu vatshavbo va na Israyeli va diya tshangana ga mufumeli gikhatini nya buzo, wu giridwego khu ngima nya livbandre na wuvili.

4 Ma dita madhota yatshavbo ya na Israyeli, ni va na Levhi va ta rwala Ngasa,

5 va gwela nayo gigomoni, gumogo ni Tshatsha nya Tshangano, va dzega gambe ni sombo nya miphaso si nga bani siri gumogo ni Ngasa; vaphasi nya mhamba va na Levhi, khavo va nga yi gwedzisa.

6 Mufumeli Solomoni ni tshangano watshavbo wa na Israyeli, wu nga bani wu tombanide gumogo naye, va di thanga mbeli nya Ngasa va paya dzinvuta ni dzimombe nya gutale ngudzu nyamba sayedwa khu wungi wa idzo, va gira miphaselo.

7 Vaphasi nya mhamba, va di ya vega Ngasa nya gidzumeledzwano gya Pfhumu Nungungulu wulangani waye; wulanga nya Guage Ngudzu wa ndrani nya Nyumba ya Nungungulu, Wulanga wu Vbindrisidego Guaga, vbavbatshi nya mambapi nya dzikerubhimi.

8 Kholu dzikerubhimi dzi di thawuludzide dzimbapi dzawe vbawulangatunu nya Ngasa, khu vbatshani dzi fenengedza Ngasa ni mipingwi yakone.

9 Mipingwi yi di laphide, avbo dzitshoka dzaye dzi nga bani dzi wonega Wulangani nya Guage, mbeli nya Wulanga nya Guage Ngudzu, aholu khu vbavbandze yi di si wonegi.

10 Mipingwi yile yomo vbale kala na muhuno, ndrani nya Ngasa, gu diri mwalo gimbe gilo vbavbandze nya siwindri sa sivili si thedwego khu Mosi, vbafuvbi ni Horebhi, gikhati Pfhumu Nungungulu a giridego gidzumeledzwano ni va na Israyeli, guduga gwawe khu tigoni ga Egipito.

11 Vaphasi nya mhamba gikhati va nga dugago khu Wulangani nya Guage Ngudzu, (kholu vatshavbo vaphasi va nga bani va romo va di dzi agiside, nyamba khedza khu sighava nya thumo nya mitsawa yawe;)

12 ni vaembeleli vatshavbo va na Levhi, a gu uye Asafe, Hemani, Jedhutumi, sanana ni vandriyawe, na va ambade dzingandzu nya seda, va di emide vbagiluvelotunu khu phuvbo ga Khugadambo na va gu embelela, na va pharide siphaphato nya dzisimbi, dzingoma, sitendre ni dzimbila, gumogo navo, gu diromo lizana ni magumavili (120) vaphasi nya mhamba, na va gu womba mipundru.

13 Vaembeleli vava, va di womba mipundru ni gu embelela gumogo, gasi gu pwala nari lito limwedo basi, va dhumisa ni gubonga Pfhumu Nungungulu, va khusa malito khu mipundru ni siphaphato nya dzisimbi ni dzimbila ni dzingoma nya sizimba, va embelela, khavo: “Dhumisani Pfhumu Nungungulu, kholu lulamide ni wuhindzi waye wu ngu simama kala gupindruga.” Khavbo avbo, Nyumbani ga Pfhumu Nungungulu gu di fenengedzwa khu lipfhi;

14 avbo vaphasi nya mhamba, va nga tandrega ni gu ema umo va gira thumo nya wukhozeli khu kotani nya lipfhi; kholu wudhumo wa Pfhumu Nungungulu wu di tadzide Nyumba ya Nungungulu.

Gitonga DC Bible © Bible Society in Mozambique, 2014.

Bible Society of Mozambique
Lean sinn:



Sanasan