2 Dzikoronika 34 - Bhibhiliya Nya Guage

Mufumo wa Josiya

¹ Josiya a diri ni livbandre na miraru myaga gikhati a nga phela gufuma, fumide magumararu na moyo myaga.

² A di thuma mithumo ya yadi mbeli ga Pfhumu Nungungulu; a di gimbila khu dzindzila dza babe waye Dhavhidhe, a si hambani nadzo, kha ndreyela nyamudye, mwendro nyambade.

Guagiswa nya Nyumba ya Nungungulu gumogo ni wukhozeli

³ Khu mwaga nya livbandre na miraru nya gufume gwaye, na ngari lidzaha, phede gu vbweta Nungungulu wa babe waye Dhavhidhe; khu mwaga nya likhumi na mivili, a di phela gu agisa va na Judha ni vavbanyi va Jerusalema, a dusa malangani nya sigomo, sihuru nya miphaso, ni sifananiso nya guvatwe niso nya gupfhudwe.

⁴ Uye a di khungumulela siluvelo sa Vabhahali, a thesela sifananiso nya lidambo, si nga bani siri vbatshani gakone iso; sihuru ni sifananiso nya guvatwe niso nya gupfhudwe, a di si khungumulela si khala nguma, a si vbaladzela marowoni ga vale va nga bani va si khozela.

⁵ Marambo ya vaphasi nya mhamba va nga bani va phasela Bhahali, a di ma vbisa vbatshani nya siluvelo sawe; a agisa kharati va na Judha ni vavbanyi va Jerusalema.

⁶ A di gira gambe kharato madhoropani ya Manasi, ya Efrayimi, ya Simiyoni ni ya Nafitali, khu maphuvbo yatshavbo nya marumbi yawe.

⁷ Avbo a nga vbedza gukhungumulela siluvelo, sihuru ni sifananiso nya guvatwe si khala nguma, ni gukhungumulela siluvelo satshavbo nya guvbisedwe libani tigoni ga Israyeli, mufumeli Josiya a di bwelela Jerusalema.

Josiya a ngu wusedza Nyumba ya Nungungulu

⁸ Khu mwaga nya likhumi na livbandre na miraru nya gufume gwaye, avbo a nga vbedzago gu agisa litigo ni Nyumba ya Nungungulu, a di rumela Safani, mwamana wa Azaliya, ni Mahaseya, khongolo nya lidhoropa, ni Jewu, mwamana wa Jowakazi, mulovi, gasi guya lulamedza Nyumba ya Pfhumu Nungungulu wawe.

⁹ Va dita ga Hilikiya muphasi nya khongolo nya mhamba, vata ningwa dzitsapawu dzi nga bani dzi gu reswa Nyumbani gwa Nungungulu, edzi dzi nga bani dzi gu hengeledzedwa khu va na Levhi ni vasayisi nya dzinyangwa na dzi guta khu mandzani ga na Manasi, ga na Efrayimi ni ga yatshavbo mitshaledwa ya na Israyeli ni ya na Judha, va na Bhejami ni vatshavbo vavbanyi va Jerusalema.

¹⁰ Va di dzi ningela mandzani ga vagimbidzisi nya thumo, ni ga avo va nga bani va rwegidwe thumo nya guwonelele thumo wa Nyumbani gwa Pfhumu Nungungulu, gasi gu hakhisa avo va thumago Nyumbani gwa Pfhumu Nungungulu, gululamedza ni guwusedzwa Nyumba.

¹¹ Va di dzi ningela ga vameseri nya guvate ni vavbahi, gasi va renga siwindri nya guvatwe ni mapulango nya thumo nya guvbahedze ni gululamedza gasi ma khale madingo nya gutiyise dzinyumba dzi nga bani dzi digidwe dzi thega khu vafumeli va Judha.

¹² Vama vava, va di thuma na va tumbegide thumoni; vawoneleli vawe, va diri Jahati ni Obhadhiya, ni va na Levhi nya sanana sa Merari, gumogo ni Zakariya ni Mesulamo, nya linyumba la na Khowati, gasi wu vbiredzisedwe thumo, ni vambe va na Levhi va nga bani va gu wuti gwadi thumo nya siwombawomba.

¹³ Valevhi vava va di gu wonelela avo va nga bani va rwala mirwalo nya gulemele ni gu gimbidzisa avo va nga bani na va thuma ni wevbini thumo. Vbakari ga va na Levhi gu diromo vambe va nga bani vari valovi, vathangeli ni vawoneleli nya dzinyangwa.

Hilikiya a ngu tugula Libhuku nya Nayo

¹⁴ Avbo va nga bani va dusa dzitsapawu dzi nga bani dzi gu reswa Nyumbani ga Pfhumu Nungungulu, Hilikiya muphasi nya mhamba, a di tugula Libhuku nya Nayo wa Pfhumu Nungungulu, owu va nga ningwago khavbo ga Mosi.

¹⁵ Hilikiya, a di embela mulovi Safani, khuye: “Nyi tugude Libhuku nya Nayo Nyumbani ga Pfhumu Nungungulu.” Khavbo avbo, Hilikiya a di ningela Libhuku ga Safani.

¹⁶ Safani a di yisa Libhuku ga mufumeli, a ta mu embela, khuye: “Sithumi sago si giride satshavbo iso u va leletedego;

¹⁷ va duside gyuma va nga gi manago Nyumbani ga Pfhumu Nungungulu, va gi ningela mandzani ga vagimbidzisi ni mandzani ga avo va girago thumo.”

¹⁸ Mulovi Safani, a di engedza a embela mufumeli, khuye: “Muphasi nya mhamba Hilikiya a nyi ningide Libhuku leli.” Khavbo avbo, Safani a di li hevbula, mbeli ga mufumeli.

¹⁹ Avbo mufumeli a nga yingisa magana nya Nayo, uye a di pferula dzingandzu dzaye.

²⁰ Khu gulandrela, a di ninga sileletelo sesi ga Hilikiya, Ayikamo, mwamana wa Safani, Abhidhomi, mwamana wa Mika, ga mulovi Safani ni Asaya, githumi gya mufumeli, a va embela, khuye:

²¹ “Indrani mu ya wudzisa khu lina langu ga Pfhumu Nungungulu, ni lina la mitshaledwa ya na Israyeli ni ya na Judha, mayelano khu libhuku leli li tugudwego, kholu likhulo la Pfhumu Nungungulu likhongolo ngudzu vbatshani gwathu, kholu vababe vathu kha va landrisa magana ya Pfhumu Nungungulu ni gu gira kha nga idzo gu lovidwego khidzo umo nya libhuku leli.”

²² Khavbo avbo, Hilikiya ni ava va nga bani va hathidwe khu mufumeli, va di hongola ga muprofeti nya nyamayi nya gupwani khu Hulidha, ngadza Salumi, mwamana wa Tokati, mwamana wa Harasi, musayisi nya guambala (uye a di gu vbahide Jerusalema, ga gipandre nya wuvili nya lidhoropa); vaya mu embela mahungu yaya.

²³ Uye a di va embela, khuye: “Pfhumu Nungungulu wa na Israyeli, a ngu ganela kharati, khuye: Indrani mu ya embela muthu yoyo a mi rumidego avbo gwangu, khenu:

²⁴ Pfhumu Nungungulu a ngu ganela, khuye: Wonani, nyi na rumela libango nya likhongolo wulanga wowu ni ga vathu va vbanyago avbo, malito yatshavbo nya givalo ma lovidwego Libhukuni momu hi hevbudego mbeli ga mufumeli wa Judha.

²⁵ Kha nga olu avo va nyi digidego, vaya vbisela libani vambe vanungungulu nya malipha, va wusa likhulo langu khu mithumo yatshavbo ya mandzani gwawe; khu guralo, likhulo langu li khondride ga wulanga wowu, gambe gima kha li na tshimega.

²⁶ Aholu ga mufumeli wa Judha, a mi rumidego guta wudzisa mahungu yaya ga Pfhumu Nungungulu, mu na mu embela kharati, khenu: Pfhumu Nungungulu wa na Israyeli, a ngu ganela kharati mayelano khu magana u ma pwidego, khuye:

²⁷ Kha nga olu monyo wago wu vbevbugidego u dzi nogisa mbeli ga Nungungulu, u yingisa magana ma ganelago khu mahungu nya wulanga wowu gumogo ni vathu vaye, u dzi nogisa mbeli gwangu, u pferula dzingandzu dzago, u lila mbeli gwangu, Eni neni nyi gu yingiside, a ngu ganela Pfhumu Nungungulu.” Khavbo avbo, avo va di yisa phindrulo yeyi ga mufumeli.

²⁸ Nyi na gu tshanganisa gumogo ni vavelegi vago, u na dzingwa thowoni gwago khu gurula, maho yago gima kha ma na wona givalo gegi nyi nga gi resago ga wulanga wowu gumogo ni ga vavbanyi vaye. Khavbo avbo, avo va di yisa phindrulo yeyi ga mufumeli.

Josiya a ngu wusedza gidzumeledzwano gya Pfhumu Nungungulu

²⁹ Khavbo avbo, mufumeli Josiya a di tombanisa vasingalagadzi yatshavbo ya Israyeli ni ya Judha.

³⁰ Khu hwane, uye kamwe a di gwela Nyumbani ga Pfhumu Nungungulu, ni vathu vatshavbo va na Judha ni va Jerusalema, vaphasi nya mhamba ni va na Levhi, vathu vatshavbo, gukhugela vakhongolo kala uye nya dugwanane, va di va hevbulela vapwa dzindzeveni gwawe, magana nya Libhuku nya gidzumeledzwano, nari khu Nyumbani ga Pfhumu Nungungulu.

³¹ Mufumeli a di ya ema wulanga waye, a gira gidzumeledzwano mbeli ga Pfhumu Nungungulu, a sambanya gu gimbila khu dzindzila dza Pfhumu, a landrisa Milayo yaye, sirumo ni sileletelo saye, khu monyo waye watshavbo ni hefemulo waye watshavbo, a landrisa magana yatshavbo nya gidzumeledzwano ma lovidwego libhukuni momu.

³² A di va bedza umo nya gidzumeledzwano gegi, vatshavbo vavbanyi va Jerusalema ni va Bhejami; vavbanyi va Jerusalema va di landrisa magana ya Nungungulu, Nungungulu wa vababe vawe.

³³ Khu magirelo yaya, Josiya a di fuvisa manyala yatshavbo ya tigoni gwatshavbo ga Israyeli a guruvedza vatshavbo va nga bani va gu manega tigoni ga Israyeli, gu va thumela Pfhumu Nungungulu wawe. Na nga gu vbanya Josiya, avo gima kha va nga hambana ni Pfhumu Nungungulu wa vababe vawe.