2 Dzikoronika 33 - Bhibhiliya Nya Guage

Manasi a ngu fumela Judha

¹ Manasi gikhati a nga phela gufuma, a diri ni likhumi na mivili myaga; fumide Jerusalema livbandre magumi ni livbandre (55) myaga.

² A di gira ugo guvivbidego mbeli ga Pfhumu Nungungulu, a landrisela mithumo nya guvivbe ya va nya mayigo, ava Pfhumu Nungungulu a nga va tutumisa mbeli ga va na Israyeli.

³ Kholu uye a di pheledza guvbaha malanga sigomoni, ayo ma nga bani ma khungumuledwe khu babe waye Ezekhiya; a emisa siluvelo sa Vabhahali, a gira madingo nya sifananiso, a khidzima mbeli nya mabutho yatshavbo ya ndzadzini.

⁴ Vbahide giluvelo Nyumbani ga Pfhumu Nungungulu, avbo Uye Pfhumu Nungungulu a nga bani a ganede, khuye: “Lina langu li na khala Jerusalema kala gupindruga.”

⁵ Siluvelo sesi nya mabutho yatshavbo ya ndzadzini, a di si vbaha umo nya makupakupa ya mavili nya Nyumba ya Pfhumu Nungungulu.

⁶ Vbiside niloni sanana saye nya madzaha sa mahembeni gwaye, kovani ga Bheni-Hinomi, a dzi ningede ga va nyadzisolo, ga va nyasikwembo ni dzinyanga, a dzi ningela ga va nyamaphuvbo nya guvivbe ni valoyi, thumide ngudzu mithumo nya guvivbe mbeli ga Pfhumu Nungungulu gasi gu mu gorosa.

⁷ A di emisa gambe gifananiso gya nungungulu nya malipha a nga gi gira uye, Nyumbani ga Nungungulu, omu Nungungulu a nga bani a ganede ga Dhavhidhe ni ga mwanaye Solomoni, khuye: “Nyumbani momu, Jerusalema, nyi gu hathidego vbakari ga mahundzu yatshavbo ya na Israyeli, nyi na vega umo lina langu kala gupindruga.

⁸ Gima kha nyi na dusa gambe migondro ya Israyeli ga litigo leli nyi li hathidego gu khala la vababe vanu; va gu thela kota khu gu landrisa sileletelo nyi va embedego, va gu sayisa milayo yatshavbo, ni sihevbudzo ni sileletelo nyi va ningidego khu mandzani ga Mosi.”

⁹ Manasi a di ghohisa va na Judha ni vavbanyi va Jerusalema, va gira ugo guvivbidego ngudzu, guvbindra mayigo Pfhumu Nungungulu a nga bani a ma mbembiside gasi gu ninga mayigo yawe va na Israyeli.

¹⁰ Pfhumu Nungungulu a di ganela ni Manasi gumogo ni vathu vaye, aholu avo gima kha va nga mu yingisa.

¹¹ Khavbo avbo, Pfhumu Nungungulu, a di va resela vathangeli nya dzinyimbi dza mufumeli wa Asiriya, va ta mola Manasi va mu hunga khu makhetshe, va mu yisa Bhabhiloni.

¹² Nari vbakari nya wuvi, a di lombelela ga Pfhumu Nungungulu waye, a dzi thesa ngudzu vbavbatshi ga Nungungulu wa vababe vaye;

¹³ avbo a nga mu lombelelago, Nungungulu a di yingisa nombelo waye a mu pwela gisiro a mu bweledza nyaluphye mufumoni gwaye Jerusalema. Khu guralo, Manasi khavbo a dzitidego gukhuye Pfhumu Nungungulu, khuye Nungungulu nya lisine.

¹⁴ Khu hwane nya esi, uye a di vbahedza likhokhola la vbavbandze nya Didhoropa la Dhavhidhe khu Pfoladambo wa Giyoni, kovani nya gubele khu lidimba nya dzindzandzi, a dzundrulugela nalo kala Ofiri, a li khusedza li lapha ngudzu; a vega gambe dzindruna nya dzingwazi madhoropani gwatshavbo nya makhokhola ya Judha.

¹⁵ A dusa Nyumbani ga Pfhumu Nungungulu vanungungulu va va nya mayigo, ni gifananiso, gumogo gambe ni siluvelo satshavbo a nga bani a si emiside gigomoni nya Nyumba ya Nungungulu dhoropani ga Jerusalema, a si dzudzuga vbavbandze nya lidhoropa.

¹⁶ A di wusedza giluvelo gya Pfhumu Nungungulu, a ningela miphaso nya gurule niyo nya gurungudze; a ruma va na Judha gu va khozela Pfhumu Nungungulu wa na Israyeli.

¹⁷ Aholu, vathu kha va nga diga guphasela malangani nya sigomo; aholu va di phasela basi Pfhumu Nungungulu wawe.

Guvbela nya mufumo wa Manasi

¹⁸ Yimbe mithumo ya Manasi, ni nombelo a giredego Nungungulu waye, ni magana a embedwego khu vaprofeti va ganedego gwaye khu lina la Pfhumu Nungungulu wa Israyeli, momo umo nya Libhuku nya Matimo la vafumeli va Israyeli.

¹⁹ Nombelo waye, ni idzo Nungungulu a mu hakhidego khidzo, ni gighoho gyaye, guyeyisa gwaye, malanga a ma vbahidego nya sigomo, umo a nga emisago sifananiso nya guvatwe na si gu dzi thesi vbavbatshi, ma lovidwe yatshavbo umo nya Libhuku la Vaprofeti.

²⁰ Manasi lade gumogo ni vavelegi vaye, va mu dzingide ndrangani gwaye. Wulangani gwaye, fumide mwanaye Amoni.

Mufumo wa Amoni

²¹ Amoni a diri ni tanga nya magumavili na mivili myaga gikhati a nga phela gufuma, fumide Jerusalema myaga mivili.

²² A di thuma ugo guvivbidego mahoni ga Pfhumu Nungungulu, kha nga idzo a giridego babe waye Manasi; kholu, Amoni a di phasela satshavbo sifananiso nya guvatwe, esi si nga bani si giridwe khu babe waye Manasi, a si khozela.

²³ Uye gima kha nga dzi nogisa mbeli ga Pfhumu Nungungulu, kha nga idzo a nga girago babe waye Manasi, a nga dzi nogisago; aholu Amoni, a di andrisa sighoho saye.

²⁴ Sithumi saye si di mu girela gikungo, si mu wugela si mu songa.

²⁵ Aholu va na Judha, va di songa vatshavbo va nga wugela mufumeli Amoni; wulangani gwaye, va fumisa mwanaye Josiya.