2 Dzikoronika 3 - Bhibhiliya Nya Guage

Solomoni a ngu vbaha Nyumba ya Nungungulu

¹ Khavbo avbo, Solomoni a di phela guvbaha Nyumba ya Pfhumu Nungungulu gigomoni gya Moriya dhoropani ga Jerusalema, avbo Pfhumu Nungungulu a nga wonega ga babe waye Dhavhidhe, vbagithalatunu gya Orinani, Mujebhusi, a gu wulanga wu dongisedwego khu Dhavhidhe.

² Solomoni phede gu vbaha khu litshigu nya wuvili, nya ngima nya wuvili, khu mwaga nya wu na nya mufumo waye.

³ Mipimo nya khokhweni ya vbavbatshi yi nga pimwago khu Solomoni gasi gu vbaha Nyumba ya Nungungulu kheyi: Gulapha nya nyumba khu mikono mayelano ni giseketelo nya guhegule; gu diri ni livbandre na limwedo magumi (60) mikono, guanama, gu diri magumavili (20).

⁴ Likupakupa la mbeli nya nyangwa nya Nyumba ya Nungungulu, li diri ni magumavili mikono, li fanana ni pimo nya gulaphe nya Nyumba ya Nungungulu; li diri gambe ni lizana ni magumavili (120) mikono gulapha guya vbatshani. Solomoni a di li londra khu ndralama nya guhutwe ndrani gakone.

⁵ Nyumba yoyo nya yikhongolo yi di pfhuledwa khu mapulango nya sena, ma namegedzedwa ndralama nya guhutwe ni gu lovetedwa migindru ni makhetshe nya madugwane.

⁶ Nyumba yi di mburisedwe gambe khu siwindri nya gukhedzige, ndralama yakone yi dita khu Parivhayimi.

⁷ Nyumba yi di londrwa khu ndralama omu nya misimbo, mihasimo, dzindzarini gwaye, malimbani, gu bwelo khavbo gulovetedwa mudzindzarini sifananiso nya dzikerubhimi.

⁸ A di gira gambe Nyumba nya Guage Ngudzu, gulapha gwa iyo, gu di fanana ni guanama, yi diri ni magumavili mikono gulapha, ni magumavili guanama, yi londrwa khu ndralama nya guhutwe, gulemela yi diri ni livbandre na limwedo mazana (600) dzitaleta.

⁹ Gulemela nya dzikhogo dzakone, dzi diri ni livbandre magumi (50) dzisikulu nya ndralama, makhuvini gu di londrwa khu ndralama.

Dzikerubhimi dzimbili

¹⁰ A di gira gambe Nyumba nya Wulanga nya Guage Ngudzu, a bwelo khavbo a gira dzikerubhimi dzimbili khu mapulango, a dzi londra khu ndralama, a dzi vega umo.

¹¹ Gasi gulapha nya mambapi nya dzikerubhimi, dzi diri ni magumavili (20) mikono, limwedo ni limwedo nya mambapi yaye li diri ni livbandre mikono, li di gu kuha ndzari nya nyumba, limbe limbapi nya livbandre mikono, li di kuha limbapi nya limbe likerubhimi.

¹² Limbapi nya limbe likerubhimi, ilo nilo li diri ni livbandre mikono, li di gu kuha ndzari nya nyumba, limbe gambe nya livbandre mikono li di vboha kala ga limbapi nya limbe likerubhimi.

¹³ Kharati, mambapi nya dzikerubhimi dzedzi ma gu thawuluga ma di enedza magumavili mikono, na dzi emide khu migondro yawe, dzikhovbe dzakone dzi di khedzisa wulanga nya Guage.

¹⁴ A di gira gambe mwendra nya guvbevbuge nya livala nya nga la damboni, ni giwunguwungu, mwendra nya gukwalale, ni mwendra nya wumburi nya seda, a mburisa makhuvi yoyo khu gu lova dzikerubhimi vbatshani gakone.

Madingo mavili

¹⁵ Mbeli nya nyumba, a di gira gambe madingo mavili, gulapha guya vbatshani na mari ni magumararu mikono; hungo ni hungo wu nga bani wuri vbatshani nya lidingo ni lidingo wu diri ni livbandre mikono.

¹⁶ A di gira gambe makhetshe nya madugwana nya gufanane ni wulungu, a ma vega khu vbatshani nya madingo; a gira gambe lizana maroma a ma vega vbakari nya makhetshe.

¹⁷ Khavbo avbo, a di emisa madingo mbeli nya Nyumba ya Nungungulu; limwedo khu nyamudye, limbe khu nyambade; ilo la nyamudye a di li ri ya lina la Jakimi, la nyambade khuye khu Bhowazi.