2 Dzikoronika 29 - Bhibhiliya Nya Guage

Ezekhiya a ngu rumela gu agiswa Nyumba ya Nungungulu

¹ Ezekhiya a diri ni tanga nya magumavili na livbandre myaga gikhati a nga phelago gu fuma, fumide magumavili na livbandre na mina myaga Jerusalema. Mayi waye a di ranwa gupwani khu Abhiya, nyamahegyane wa Zakariya.

² Uye a di gira ugo gu lulamidego mahoni ga Pfhumu Nungungulu, kha nga satshavbo esi si nga girwago khu babe waye Dhavhidhe.

³ Khu mwaga nya guhegule nya mufumo waye, khu ngima nya guhegule, uye a di tula malimba ya Nyumbani ga Pfhumu Nungungulu, ni gu ma lulamedza.

⁴ A di rana vaphasi nya mhamba ni va na Levhi, a ta va tombanisa tandralani wa Khugadambo,

⁵ a va embela, khuye: Nyi yingiseni enu Valevhi! Olu dzi agiseni ni gu agisani gambe Nyumba ya Pfhumu Nungungulu wa vababe vanu; mu dusani wulangani nya guage silo nya gunyenyeze.

⁶ Kholu vababe vathu va ndragide milayo, va gira ugo guvivbidego mahoni ga Pfhumu Nungungulu wathu, va mu diga; va thendregedza dzikhovbe dzawe, va si khedzi Tshatsha wa Pfhumu Nungungulu, va wu pfhurarela.

⁷ Va sega gambe ni malimba nya mwanya nya wukhongolo, va tshima myenge, va si vbisi libani, ambari gu ningela miphaso nya guvbiswe malangani nya guage ya Nungungulu wa na Israyeli.

⁸ Khu guralo, li dzude likhulo nya likhongolo la Pfhumu Nungungulu, vbakari ga na Judha ni Jerusalema, a va ningela gumbembiswani, va legalega va khala gihegiso kha nga mu si wonago khu maho yanu.

⁹ Khiso si nga gira vababe vanu va songwa khu matshari, sanana sathu nya sikhwathana, ni sanana sathu nya vanyamahegyane, vagadzi vathu va manegide wugumbitunu khu kotani nya isoso.

¹⁰ Khidzo kharato, monyo wangu olu wu pimisago gu gira gidzumeledzwano ni Pfhumu Nungungulu wa Israyeli, gasi a ndreyise vbakari gwathu likhulo laye.

¹¹ Gasi olu, vanavangu, mu nga khali mihuni; kholu Pfhumu Nungungulu a mi hathide gasi gu khala mbeli gwaye, mu mu thumela, ni gu khala vathumegeli vaye ni gu vbisani libani.

Va na Levhi va ngu agisa Nyumba ya Nungungulu

¹² Khavbo avbo, va na Levhi va nga dzi ningelago thumoni mayelano khu dzinyumba dzawe, khava: Nyumba ya na Khowati: Mahati, mwamana wa Amasayi ni Joyele, mwamana wa Azariya; ga va na Merari: Khisi, mwamana wa Abhidhi ni Azariya, mwamana wa Jeyaleleli; va na Gerisoni: Jowane, mwamana wa Zima ni Edheni, mwamana wa Jowane;

¹³ khu ga va na Elisafane: Khu Siniri ni Jeyeli; khu ga va na Asafi: Khu Zakariya ni Mataniyeli;

¹⁴ khu ga va na Hemane: Khu Jeyeli ni Simeyi; khu ga va na Jedhutumi: Semaya ni Uziyeli.

¹⁵ Va di ta tombanisa vandriyawe, va dzi agisa vata nga idzo va nga leletedwago khidzo khu mufumeli, kha nga guganela ga Pfhumu Nungungulu, gasi guta agisa Nyumba ya Pfhumu Nungungulu.

¹⁶ Vaphasi nya mhamba va di bela Nyumbani ga Pfhumu Nungungulu, gasi gu gu agisa, va dusa vbavbandze nya laba nya Nyumba ya Pfhumu Nungungulu, sombo satshavbo nya gunyenyeze va nga si manago Nyumbani ga Pfhumu Nungungulu; Valevhi va di si dzega va duga naso vbavbandze, vaya si dzudzuga gitsongwanani gya Kedhroni.

¹⁷ Khu guralo, va di phela thumo nya guagise khu litshigu nya guphele, khu ngima nya guhegule; khu litshigu nya livbandre na mararu nya ngima yoyo, va di bela nyangwani nya Nyumba ya Pfhumu Nungungulu, va agisa Nyumba ya Pfhumu Nungungulu khu livbandre na mararu matshigu; va di vbedza gu yi agisa khu litshigu nya likhumi na livbandre na limwedo nya ngima nya guphele.

¹⁸ Khavbo avbo, va di hongola nyumbani nya wufumu ga mufumeli Ezekhiya, va ya mu embela, khavo: Hi vbedzide guagisa Nyumba ya Pfhumu Nungungulu gumogo gambe ni giluvelo nya miphaso nya guvbiswe ni sombo saye satshavbo, ni meza nya sibaba nya miphaso, gumogo ni sombo saye satshavbo.

¹⁹ Hi agiside gambe ni mikanvu yatshavbo, eyi mufumeli Akazi, a nga yi dzudzugago vbavbandze, gikhatini nya gufume gwaye, hi si dongisede ni gu si tshambisa; olu somo mbeli nya giluvelo gya Pfhumu Nungungulu.

Ezekhiya a ngu wusedza wukhozeli

²⁰ Khu litshigu li landrelago, mufumeli a di phindrula ni mambagugya, a tombanisa vathangeli vatshavbo nya lidhoropa, a gwela Nyumbani ga Nungungulu.

²¹ A di rumela gu reswa livbandre na dzimbili dzikuzi nya simombyana, livbandre na dzimbili dzihamba, livbandre na dzimbili dzinvuta ni livbandre na vavili vanyamabhongwe, gasi guya gira miphaselo nya guduse sighoho nya mufumo, nya Wulanga nya Guage ni sa na Judha; mufumeli a di leletela vaphasi nya mhamba, nya linyumba la Aroni, gasi va si paya vbagiluvelotunu gya Pfhumu Nungungulu.

²² Va di songa dzimombe, vaphasi nya mhamba va dzega novba va wu mitegedzela vbagiluvelotunu, va songa gambe dzihamba, va mitegedzela novba wakone vbagiluvelotunu, va gira idzosaye khu dzinvuta, va di mitegedzela novba vbagiluvelotunu.

²³ Va di resa gambe vanyamabhongwe gasi guta gira mhamba nya gighoho mbeli ga mufumeli, ni mbeli nya tshangano, vatshavbo va di handzega mandza vbatshani nya sirengo.

²⁴ Vaphasi nya mhamba va di songa vanyamabhongwe va dzega novba wakone va mitegedzela vbagiluvelotunu gasi gu khala mhamba nya gu dzegiswe khiyo ni gu tsetseledwa sighoho sa va na Israyeli vatshavbo. Kholu mufumeli a di leleteside gu girwa mhamba yile nya guvbiswe ni gu phasedwa khu gighoho gya Israyeli watshavbo.

²⁵ A di emisa va na Levhi Nyumbani ga Pfhumu Nungungulu, na vari ni dzingoma ni sitendre ni dzimbila, kha nga guleletela ga Dhavhidhe ni Gadhi, muwoneleli wa mufumeli ni wa muprofeti Natani; kholu gileletelo gegi, gi dzude khu ga Pfhumu Nungungulu, khu magana ya vaprofeti vaye.

²⁶ Va na Levhi va di emide na va pharide dzingoma dza Dhavhidhe, vaphasi nya mhamba na vari ni mipundru.

²⁷ Ezekhiya a di leletela gukhuye, gu ningedwa miphaselo nya guvbiswe vbagiluvelotunu. Khu gikhati gu nga phedwa gu ningedwa miphaselo nya guvbiswe, gu di phedwa nugo ndzimo ya Pfhumu Nungungulu, khu mipundru ni dzingoma dza Dhavhidhe, mufumeli wa Israyeli.

²⁸ Gikhati gu nga bani na gu embeledwa ndzimo ni gu wombwa mipundru, tshangano watshavbo wu di khidzima, kala gu vbela gu girwa mhamba nya guvbiswe.

²⁹ Avbo va nga vbedzago gu ningela miphaso, mufumeli ni vatshavbo a nga bani nari navo, va di khidzima va khozela.

³⁰ Khavbo avbo, mufumeli Ezekhiya, a di embela vakhongolo, ni va na Levhi, gukhuye va na rungudze Pfhumu Nungungulu, khu magana ya Dhavhidhe ni ya Asafe, mutuguli nya siwoniso. Va di rungudza na va tsakide, va nogisa dzithamo va khozela.

³¹ Ezekhiya a di ganela, khuye: “Kha nga mu dzi agisidego ga Pfhumu Nungungulu, olu hidzimelani mu rese dzimhamba ni miningelo nya gubonge Nyumbani ga Pfhumu Nungungulu.” Tshangano watshavbo wu di resa dzimhamba nya gubonge; nya vangi khu gugola ga myonyoni gwawe, va di resa dzimhamba nya guvbiswe.

³² Tengo nya dzimhamba nya guvbiswe dzi residwego khu tshangano, a diri livbandre na mavili magumi (70) dzimombe, lizana (100) dzihamba ni mazana mavili (200) dzinvuta; dzatshavbo dzedzi, a diri miningelo nya mhamba nya guvbiswe yi nga giredwa Pfhumu Nungungulu.

³³ Sifuyo si nga agiswago si diri tengo nya livbandre na limwedo mazana (600) dzimombe ni magumararu mazana (3.000) dzinvuta.

³⁴ Aholu, vaphasi nya mhamba, va diri vadugwana kha va dzi kodza gu sundruwula satshavbo iso si nga bani nari sa miphaso nya guvbiswe; khu guralo, va di phasedzedwa khu vandriyawe va na Levhi, kala wu vbela thumo, bwelo khavbo vambe vaphasi nya mhamba va dzi agisa; kholu va na Levhi va di lulamide ngudzu khu gu dzi agisa guvbindra vaphasi nya mhamba.

³⁵ Gu manegide gambe yimbe miphaselo nya gutale nya guvbiswe, gumogo ni mafura nya miphaso nya gurule, ni miningelo nya mawadwa nya miphaso nya guvbiswe. Wu tiyiswa kharati thumo wa Nyumbani ga Pfhumu Nungungulu.

³⁶ Ezekhiya gumogo ni vathu vatshavbo, va di nengela khu edzi Nungungulu a dongisedego khidzo vathu, kholu thumo wowu va wu giride khu givbiredza.