2 Dzikoronika 28 - Bhibhiliya Nya Guage

Mufumo wa Akazi

¹ Akazi a diri ni magumavili myaga gikhati a phedego gufuma. Fumide likhumi na livbandre na moyo myaga Jerusalema. Kha nga thuma mithumo ya yadi mbeli ga Pfhumu Nungungulu, kha nga babe waye Dhavhidhe,

² aholu a di landrisa dzindzila dza vafumeli va Israyeli. A di gira ni sifananiso nya Vabhahali khu simbi.

³ Vbiside gambe mabani kovani wa gyanana gya Bheni-Hinomi, a vbisa ni sanana saye niloni, a landrela mavbanyelo ya va nya mayigo ava Pfhumu Nungungulu a va tutumisidego mbeli ga va na Israyeli.

⁴ Giride gambe miphaselo nya gusonge sirengo ni gu vbisa libani malangani nya sigomo gumogo ni vbavbatshi nya misimbo yatshavbo nya gunyuge.

⁵ Khu guralo, Pfhumu Nungungulu waye, a di mu ningela mandzani ga mufumeli wa Siriya. Vaasiriya va di mu pala va mola vathu vaye nya vangi va vbagedwa va yiswa Dhamasiko wugumbitunu; bwelo khavbo a mu ningela mandzani ga mufumeli wa Israyeli, a sasedwa gambe khuye.

⁶ Kholu Peka, mwamana wa Remaliya, a di songa khu litshigu limwedo basi, lizana ni magumavili magumi mazana (120.000) vama nya tshivba, kholu va nga hambanago ni Pfhumu Nungungulu wa vababe vawe.

⁷ Zikiri, mwama nya ndrena wa na Efrayimi, a di songa Mahaseya, mwamana wa mufumeli ni Azirikamo, muthangeli wa nyumbani nya wufumu, gumogo ni Elikana, gyandza gya mufumeli.

⁸ Va na Israyeli va di mola mazana mavili magumi mazana (200.000) vama nya vandriyawe nya Vajudha, vbakari gwawe gu diri ni vanyamayi, madzaha ni dzimbiri, va va gira dzikhumbi; bwelo khavbo va phanga sombo nya singi va si resa Samariya.

⁹ Aholu gu diromo vbale moyo nya muprofeti wa Pfhumu Nungungulu, a nga bani a ranwa gupwani khu Obhedhi, uye a di khinga masotshwa ma nga bani ma wuya khu nyimbitunu ma hongola Samariya, a ya ma embela, khuye: “Pfhumu Nungungulu wa vababe vanu, a gorogede va na Judha, a va ningela mandzani gwanu, aholu enu mu di va songetela khu giviti nya gikhongolo ngudzu, gi nga pwala ndzadzini.

¹⁰ Olu mwa gu vbwetani gutshanisa vathu va na Judha kala va khala dzikhumbi dzanu nya vama ni vanyamayi; ina vbakari gwanu mwalo a gu na ni nandru mbeli ga Pfhumu Nungungulu wanu, gani?

¹¹ Olu nga nyi yingisani: Bweledzani dzikhumbi dzedzi mu dzi modego vbakari ga vandriyanu, kholu, likhulo la Pfhumu Nungungulu li ngu khondra vbakari gwanu.”

¹² Khavbo avbo, gu di duga vathangeli nya gukari va na Efrayimi, va wugela avo va nga bani va wuya khu nyimbitunu a gu ava: Azariya, mwamana wa Jowane, Bherekiya, mwamana wa Mesilemoti, Jeyizikiya, mwamana wa Salume, Amasa, mwamana wa Hadilayi,

¹³ va va embela, khavo: “Mu nga bedzini ndrangani momu dzikhumbi dzodzo, mwa guvbweta gukhenu hi rwale nandru ga Pfhumu Nungungulu, hi engedzela sighoho sathu nya gutale, gani? Likhulo la Pfhumu Nungungulu li ngu vila bwelo khavbo li pfhurugela vbakari ga na Israyeli.”

¹⁴ Khavbo avbo, masotshwa ma di diga dzikhumbi, ni iso va nga phangago mbeli ga dzindruna gumogo ni ga tshangano watshavbo.

¹⁵ Khavbo avbo, vama vale, va nga pwadzwago malina yawe, va di dzega dzikhumbi, va ambagisa vale va nga bani na vari wumbwiri khu sombo si nga phangwago; va va ambagisa silato, va va ninga guhodza ni mati, va va todza mafura dzimbanga; vatshavbo avo va nga bani va rerekide, va si kodzi gu gimbila, va di va khiledza vbatshani nya dziburu va va yisa Jeriko, dhoropani nya migindru, vbafuvbi ni vandriyawe. Khu hwane va di bwelela Samariya.

Akazi a ngu lomba giphaso ga Vaasiriya

¹⁶ Khu gikhati gile gya gimwegyo, mufumeli Akazi, a di rumela myango ga mufumeli wa Asiriya gu a mu phase,

¹⁷ kholu va na Edhomi, va di wuya nyaluphye, va ta sasela va na Judha, va va vbagela va va gira dzikhumbi.

¹⁸ Vafilisitiya navo va di dhumela madhoropa ya Marandzi ya Judha ma manegago panini; va phanga Bheti-Semesi, Ayijalomi, Gedheroti, Soko gumogo ni mitalala yaye, Timina ni mitalala yaye, Gindzo gumogo ni mitalala yaye; va khala avo mule.

¹⁹ Kholu Pfhumu Nungungulu, a di poyide Judha khu kotani nya sighoho sa Akazi, mufumeli wa Israyeli; kholu a di ndreyiside va na Judha, va hambana ni milayo yatshavbo, a gira guvivba nya guthise nya gu ghohele Pfhumu Nungungulu.

²⁰ Gu dita avbo gwaye Tigilati-Pileseri, mufumeli wa Siriya, oyu a nga bani na gu pimisa gukhuye a nata phaswa khuye, aholu uye a dita mu sasela, wulangani nya gu mu phase.

²¹ Kholu Akazi a di dusa gipandre nya sombo a nga phanga Nyumbani ga Pfhumu Nungungulu ni sa nyumbani ga mufumeli ni sa manganagana a si ningela ga mufumeli wa Asiriya, khu guralo, isoso kha sa mu phasa gilo.

Gu dzi nyenyezisa ga Akazi

²² Ambari ulo a nga bani a gu vbanya gutshanisekani, Akazi a di simama gu ghohela Pfhumu Nungungulu.

²³ A di ningela miphaselo ga vanungungulu va Dhamasiko avo va nga mu sasela, a ganela, khuye: “Kha nga olu vanungungulu va mufumeli wa Siriya, va nga mu vhikelago; nyi na va girela miphaso gasi va kodza gu nyi phasedzela neni.” Aholu avo khavo givangelo nya gumbembiswe ga va na Israyeli vatshavbo.

²⁴ Akazi a di wungedzela sombo satshavbo sa Nyumbani ga Nungungulu a si pandrelela, a khota malimba yatshavbo ya Nyumbani ga Pfhumu Nungungulu; a dzi wumbela siluvelo malangani gwatshavbo ya Jerusalema.

²⁵ A di vbaha gambe, madhoropani gwatshavbo ga Judha, malanga nya gukhugege gasi guvbisela umo libani vambe vanungungulu nya malipha; a wusa kharati likhulo la Pfhumu Nungungulu, wa vababe vaye.

Gufa ga Akazi

²⁶ Simbe sigiro ni mithumo yaye yatshavbo nya guphele niyo nya guhegise, si lovidwe umo nya Libhuku nya Matimo ya vafumeli va Judha ni vafumeli va Israyeli.

²⁷ Akazi lade gumogo ni vavelegi vaye, va mu dzingide dhoropani gwa Jerusalema, kholu kha va vbweta gu mu dzinga umo nya marowo ya vafumeli va Israyeli. Mwanaye Ezekhiya, khuye a nga fumago wulangani gwaye.