2 Dzikoronika 26 - Bhibhiliya Nya Guage

Mufumo wa Uziya

¹ Vatshavbo va na Israyeli, va di dzega Uziya a nga bani ari ni likhumi na livbandre na moyo myaga nya guvelegwe gwaye, va mu pharisa ndronga nya wufumu a tshikedza babe waye, Amaziya.

² Khuye a nga vbahedza lidhoropa la Elati a li bweledza ga Judha, hwane nya gu mufumeli Amaziya na lade gumogo ni vavelegi vaye.

³ Uziya a diri ni likhumi na livbandre na moyo myaga, gikhati a nga phelago gu fuma, fumide Jerusalema, livbandre magumi na mivili myaga. Lina la mayi waye, a diri uye Jokoliya, wa Jerusalema.

⁴ Uye thumide ugo gu gu gwadi mbeli ga Pfhumu Nungungulu, kha nga idzo a nga girago babe waye, Amaziya.

⁵ A di dzi garadza khu gu vbweta Nungungulu matshiguni ya Zakariya, uye a nga bani na siti gwadi siwoniso sa Nungungulu; gikhati a nga namarela ga Pfhumu Nungungulu, Uye a di mu kategisa.

⁶ Avbo a nga khuga aya dwana ni Vafilisitiya, a di ya khungumula likhokhola la Gati ni likhokhola la Jabini, ni likhokhola la Asidhodhi; khavbo avbo, a di vbaha madhoropa tigoni ga Asidhodhi ni ga Vafilisitiya.

⁷ Pfhumu Nungungulu a di mu phasa gupala Vafilisitiya ni Vaarabhi va nga bani va vbahide Guri-Bhahali, ni Vamewuni.

⁸ Va na Amoni va di ningela miningelo nya guluve Uziya; ndruma yaye yi di phalalega kala yi vboha Egipito, kholu a diri ni tshivba ngudzu.

⁹ Uziya, a di vbahide gambe dzilangwe nya sibhangavanga Jerusalema; lidimba la dzikhonani, lidimba la kovani ni mahandzakanyani, a ma tiyisa.

¹⁰ Giride gambe madingo giwulani, a kemba milambo nya yingi; kholu a diri ni mitshambi nya yingi, mikovani ni vbavbandze a diri ni valimi, ni vathu nya vangi va nga bani va thuma marembweni nya miuvha, sigomoni ni mahangeni nya gunone; kholu a di gu tsakela wulimi.

¹¹ Uziya a diri gambe ni vama nya masotshwa nya nyimbi, ma nga bani ma gu duga khu sikwata guya nyimbitunu mayelano khidzo ma nga bani ma lovedwe khidzo khu mulovi Jeyeli, ni muthangeli Mahaseya, na ma gu thangedwa khu Hananiya, moyo nya linganagana la mufumeli.

¹² Tengo nya vathangeli khu dzinyumba dza vababe vawe, vatshavbo vama nya dzindrena, wu diri magumavili na livbandre na limwedo mazana (2.600).

¹³ Vbavbatshi nya vathangeli vava, gu diri ni gikwata nya gikhongolo nya masotshwa nya mazana mararu ni livbandre na mavili magumi ni livbandre mazana (307.500) vama, va nga bani va gu dwana khu tshivba, gasi gu phasedzela mufumeli gu dwana ni valala vaye.

¹⁴ Uziya a di somisa vathu vatshavbo nya nyimbi, khu sitshangu, matshari, sihugu, sikhweso nya sikete, malaho ni siwindri nya dzifijiga.

¹⁵ Pfhude gambe dhoropani ga Jerusalema mitshini nya guvegwe khu vbatshani nya makhokhola ni mudzikhonani, gasi gu khwandra khiyo siholoma ni siwindri nya sikhongolo. Ndruma yaye yi di pwala hwindzo, kholu Nungungulu a di gira siliwugiso nya singi nya gu mu phase kala a mana tshivba nya yikhongolo.

Gighoho gya Uziya

¹⁶ Aholu avbo a nga wona nya gukhuye a na ni tshivba, monyo waye wu di dzi khusedza wu gira matshandza, a hambanisa Nayo wa Pfhumu Nungungulu waye, kholu a di bela Nyumbani ga Pfhumu Nungungulu gasi guya vbisa libani vbagiluvelotunu nya libani.

¹⁷ Khu guralo muphasi nya mhamba Azariya, a di mu landra khu hwane nari ni livbandre na mararu magumi vaphasi nya mhamba va Pfhumu Nungungulu, vama nya gutumbege ni tshivba.

¹⁸ Va ya ema mbeli ga mufumeli Uziya va mu himbedzela, khavo: “Uwe, Uziya, u mwalo fanelo nya guvbise libani mbeli ga Pfhumu Nungungulu, vbavbandze basi ga vaphasi nya mhamba, sanana sa Aroni, khavo va phasedwego gu vbisa libani; khuga wulangani nya guage kholu u ndragide Nayo; khu na nga mana khiso makategwa mbeli ga Pfhumu Nungungulu.”

¹⁹ Uziya a di goroga, na pharide mandzani gwaye gyombo nya guvbisele umo libani; na nga gu gorogede vaphasi nya mhamba, giwombo gyaye gi di phorola khu sokono nari mbeli ga vaphasi nya mhamba, Nyumbani ga Pfhumu Nungungulu, vbafuvbi ni giluvelo nya guvbisele libani.

²⁰ Khavbo avbo, muphasi nya khongolo nya mhamba, Azariya gumogo ni vambe vaphasi nya mhamba, va di mu khedza vbagiwombotunu gwaye, va mu wona gukhavo a na ni sokono, va di mu dusa vbavbandze khu guvbiredza; uye a di vbiredza gu duga kholu Pfhumu Nungungulu a di mu vetide.

²¹ Khu guralo, mufumeli Uziya, a di dwala khu sokono kala litshigu nya gufe gwaye. Khu kotani nya madwali nya sokono, a di segedwa nyumbani gwaye enga, kholu a di hambanisidwe ni Nyumba ya Pfhumu Nungungulu; mwanaye Jothamo, a di rwegidwe rwalo nya guthangele nyumbani nya wufumu, gasi gu lamula vathu va tigoni.

²² Simbe sigiro saye esi nya guhegule niso nya guhegise, si lovidwe khu muprofeti Isaya, mwamana wa Amosi.

²³ Uziya lade gumogo ni vavelegi vaye thowoni li nga bani liri la vafumeli; kholu va di ganela, khavo: “Uye a na ni sokono.” Mwanaye Jothamo khuye a fumidego wulangani gwaye.