2 Dzikoronika 24 - Bhibhiliya Nya Guage

Mufumo wa Jowasi

¹ Jowasi a diri ni tanga nya livbandre na mivili myaga, gikhati a nga phela gufuma, fumide magumana myaga Jerusalema.

² Lina la Mayi waye, a diri uye Zibhiya, wa Bherisebha. Jowasi a di gira mithumo nya gululame mbeli ga Pfhumu Nungungulu, matshigu yatshavbo ya muphasi nya mhamba Joyadha.

³ Joyadha a di mu lowodza vanyamayi vavili; a velega navo sanana nya sikhwathana ni vanyamahegyane.

⁴ Khu hwane nya ugo, Jowasi a di pimisa gu wusedza Nyumba ya Pfhumu Nungungulu.

⁵ A di tombanisa vaphasi nya mhamba ni va na Levhi, a va embela, khuye: “Indrani khu madhoropa ya na Judha, mu hengisa dzitsapawu ga vatshavbo va na Israyeli, gasi khu mwaga ni mwaga mu wusedza Nyumba ya Pfhumu Nungungulu wanu; vbiredzelani gu gimbidzwa mahungu yaya.” Aholu va na Levhi kha va nga vbiredza nawo.

⁶ Mufumeli a di rumela guya rana muthangeli wawe Joyadha, a ta mu wudzisa, khuye: Khu ginani u ngamba laya va na Levhi gu va resa khu Judha ni Jerusalema mihengo eyi Mosi, githumi gya Nungungulu a nga hungago tshanganoni wa na Israyeli, gasi gu gira Tshatsha nya Tshangano?

⁷ Kholu nyamayi yoyu Ataliya, nya guvivbedwe khu monyo, gumogo ni sanana saye, va di phangide Nyumbani ga Nungungulu, va dzega sombo nya miphaselo sa Nyumbani ga Pfhumu Nungungulu, va si thumisa ga Vabhahali.

⁸ Khu guralo, mufumeli a di leletisa gu gukhuye gu girwe gingasana gi vegwa khu vbavbandze vbamwanyatunu nya Nyumba ya Pfhumu Nungungulu.

⁹ Gu di tiviswa tigoni gwatshavbo gwa na Judha ni Jerusalema, thetho nya gu va rese ga Pfhumu Nungungulu, khupo wu vegidwego tigoni ga na Israyeli giwulani khu Mosi, githumi gya Nungungulu.

¹⁰ Khavbo avbo, manganagana yatshavbo ni vathu vatshavbo, va di nengela va resa khupo wawe va ta thela ngasani, kala wu vbela thumo nya guvbahe.

¹¹ Gikhati gyatshavbo ngasa yi nga bani na yi gu dzegwa khu va na Levhi gasi yi ya wonwa khu mufumeli, khu gu wonwa gupwani ngasa yi tade, gu dita mulovi wa mufumeli ni girumwa gya muphasi nya khongolo nya mhamba, va di guhula dzitsapawu, va bweledza gambe ngasa wulangani gwaye. Va di gira kharalo litshigu ni litshigu, va hengeledzela dzitsapawu nya dzingi.

¹² Khu kharato, mufumeli gumogo ni Joyadha muphasi nya mhamba, va di dzi ningela ga avo va gimbidzisago thumo nya Nyumba ya Nungungulu, avo va di thola vavbahi ni vavati, gasi guwusedzwa Nyumba ya Nungungulu, gumogo ni avo nya guthumise simbi ni sugu, gasi va wusedza Nyumba ya Nungungulu.

¹³ Avo va nga bani va rwegidwe thumo nya guvbahe, va di thuma gwadi, thumo wu diya mbeli khu gu dzi ningela gwawe, va wusedza Nyumba ya Nungungulu yi tiya, nga idzo yi nga bani yi romo khidzo khu gale.

¹⁴ Gikhati va nga vbedzago gu vbaha, dzitsapawu dzi nga tshalago, va di dzi resa ga mufumeli, ni ga muphasi nya mhamba Joyadha, avbo va nga girago khidzo sombo nya gulumbe Nyumbani ga Nungungulu, sombo nya guthumise miphaselo nya guvbiswe; sikalango ni simbe sombo nya ndralama ni parata. Matshigu yatshavbo nya guvbanye ga Joyadha, va di ningela Nyumbani gwa Nungungulu, miphaselo nya guvbiswe.

¹⁵ Joyadha a di gumba afa, nari ni matshigu nya mangi, a diri ni tanga nya lizana ni magumararu (130) myaga gikhati a fudego.

¹⁶ Va mu dzingide Dhoropani ga Dhavhidhe, gumogo ni vafumeli; kholu giride wuwadi ga Israyeli, ga Nungungulu, gumogo ni nyumba yaye.

Gughoha ga Jowasi

¹⁷ Khu hwane nya gufe ga Joyadha, gu dita manganagana ya Judha ma ta khidzima mbeli ga mufumeli; mufumeli a di ma yingisa.

¹⁸ Va di hambana ni Nyumba ya Pfhumu Nungungulu wa vababe vawe, va thumela madingo nya sifananiso nya vambe vanungungulu nya malipha. Khu kotani nya gighoho gegi, gu dita ga Judha ni Jerusalema, likhulo la Nungungulu.

¹⁹ Aholu Pfhumu Nungungulu a di va rumela vaprofeti gasi guta va wuyisa gwaye nyaluphye; vaprofeti vava, va ningide wufakazi, aholu avo kha va va yingisa.

²⁰ Liphuvbo la Nungungulu li dita khavbo ga muprofeti Zakariya, mwamana wa muphasi nya mhamba Joyadha, uye a di khuga a ema mbeli nya vathu, khuye: “Pfhumu Nungungulu a ngu ganela, khuye: Khu ginani mu hambanidego ni milayo ya Pfhumu Nungungulu? Gima kha mu na dugelela. Kha nga olu mu Mu digidego, Uye nuye a na mi diga.

²¹ Va di hunga gikungu nya gu mu songe; va mu pfara khu siwindri, khu guruma ga mufumeli mulikupakupani nya Nyumba ya Pfhumu Nungungulu.”

²² Khu guralo, mufumeli Jowasi kha alakanya wuwadi a giredwego Joyadha, babe wa Zakariya, aholu a di songa mwanaye, avbo a nga bani na gu sala a di ganela, khuye: Pfhumu Nungungulu a na gu wone, a gu bweledzela.

Nungungulu a ngu lamula Jowasi

²³ Guvbelani nya mwaga yoyo, gu dita nyimbi ya Siriya yi di gwela yi ta wugela Jowasi, va vboha tigoni ga Judha ni Jerusalema va ta sasela manganagana yatshavbo ya tigoni, va phanga satshavbo va si yisa ga mufumeli wa Dhamasiko.

²⁴ Ambari ulo masotshwa ya Siriya, ma ngatago na mari madugwana, Pfhumu Nungungulu a di ma ninga tshivba nya gupale masotshwa nya gutale ngudzu nya Vajudha, kholu avo va di digide Pfhumu Nungungulu wa vababe vawe. Khu guralo, Vaasiriya va di gira ga Jowasi gulamula gwa Nungungulu.

Gikungu nya guwugele mufumeli Jowasi

²⁵ Avbo Vaasiriya va nga khuga va mu tshiya, kholu a di gu dwala ngudzu, sithumi saye si di mu girela gikungu nya gu mu songe, kholu a nga songa mwamana wa muphasi nya mhamba Joyadha, va mu songa vbadawutunu gwaye. Va mu dzingide Dhoropani ga Dhavhidhe, aholu kha va mu dzinga marowoni ya vafumeli.

²⁶ Gasi ava va nga mu lugela gikungu nya gu mu songe khava: Zabhadi, mwamana wa Simeyati, nyamayi moyo wa na Amoni, Jozabhadhi, mwamana wa Siniriti, nyamayi moyo wa na Mowabhi.

²⁷ Gasi a gu bani ari khu mahungu nya sanana saye, ni milandru nya mingi va mu rwegidego, ni gu wusedzwa nya Nyumba ya Nungungulu, isoso si lovidwe umo nya Libhuku nya Matimo nya vafumeli. Wulangani gwaye a di fuma mwanaye Amaziya.