2 Dzikoronika 23 - Bhibhiliya Nya Guage

Jowasi a ngu todzwa mafura gu khala mufumeli wa Judha

¹ Khu mwaga nya livbandre na wuvili, Joyadha a di tiya longo a gira pwanano ni dzindruna nya sikwata nya lizana, a gu ava: Azariya, mwamana wa Jeyoramo, Ismayeli, mwamana wa Jowanani, Azariya, mwamana wa Obhedhi, Mahaseya, mwamana wa Adhaya ni Elisafati, mwamana wa Zikiri.

² Ava, va di dzundrulugela Judhiya gwatshavbo, va tombanisa va na Levhi ni mihungo nya dzinyumba dza na Israyeli, va ta Jerusalema.

³ Tshangano watshavbo yoyu, wu di gira gidzumeledzwano ni mufumeli, Nyumbani gwa Nungungulu, Joyadha a va embela, khuye: “Khuye oyu mwamana wa mufumeli a yelago gu fuma, kha nga idzo Pfhumu Nungungulu a ganedego khidzo khu mahungu ya sanana sa Dhavhidhe.

⁴ Owu khuwo thumo mu yelago gu wu thuma mu gira esi: Gipandre nya wuraru nya enu vaphasi nya mhamba ni va na Levhi, mu belago khu Sabhadho, gi na wumbwa khu vawoneleli nya dzinyangwa;

⁵ gimbe gipandre nya wuraru, gi na khala ndrangani ga mufumeli; ni gimbe gipandre nya wuraru, gi na khala nyangwani nya giseketelo; gasi vathu vatshavbo, va na khala likupakupani nya Nyumba ya Pfhumu Nungungulu.

⁶ Aholu, ni moyo a nga beli Nyumbani ga Pfhumu Nungungulu, vbavbandze ga vaphasi nya mhamba ni va na Levhi va thumelago umo; ava va na bela, kholu va agide; aholu vathu vatshavbo va na landrisa sileletelo sa Pfhumu Nungungulu.

⁷ Va na Levhi, va na randrela mufumeli, moyo ni moyo na pharide litshari mandzani, ni wevbini muthu a na belago nyumbani a na songwa; gasi enu mu na bani na muri ni mufumeli gikhati a belago ni gikhati a dugago.”

⁸ Vatshavbo va na Levhi ni va na Judha, va di gira satshavbo sileletelo va nga leletedwago khu muphasi nya mhamba Joyadha; moyo ni moyo a di dzega vathu vaye, avo va nga bani na gu bela ni avo va nga bani na va gu duga khu litshigu nya Sabhadho; kholu muphasi nya mhamba Joyadha, kha nga tshula mitsawa yi hongola.

⁹ Muphasi nya mhamba Joyadha a di ningela ga vathangeli vatshavbo nya sikwata nya lizana, matshari ni sitshangu esi mufumeli Dhavhidhe a nga bani a si thumisa, si nga bani na siri Nyumbani ga Nungungulu.

¹⁰ Khu guralo, va di emisa vatshavbo vathu, muthu ni muthu na pharide litshari mandzani gwaye, gukhugela khu phuvbo ga nyamudye nya nyumba ya mufumeli ni phuvbo ga nyambade gu bela vbagiluvelotunu, kala Nyumbani gwa Nungungulu, gasi va randrela mufumeli.

¹¹ Khavbo avbo, va di dusa vbavbandze mwamana wa mufumeli, va mu ambagisa gihugu nya wufumu, va mu ninga libhuku nya gidzumeledzwano ni gu mu wumbela gu khala mufumeli; muphasi nya mhamba Joyadha gumogo ni sanana saye va di mu todza khu mafura, va laledza, khavo: “A na vbanye mufumeli.”

Gufa gwa Ataliya

¹² Avbo Ataliya a ngapwago ligwaha nya vathu va nga bani na va gu tutuma gasi guya huwelela mufumeli, a dita bela Nyumbani ga Pfhumu Nungungulu, khu vbakari nya vathu.

¹³ A wona mufumeli na khade vbawulangatunu gwaye, vbafuvbi ni lidingo la vbamwanyatunu, vathangeli ni avo va nga bani na va gu womba mipundru, va diri khu wubambe ga mufumeli; gasi vathu vatshavbo va tigoni va di gu dzi tsakela ni gu womba mipundru. Vaembeleli navo na va pharide siwombawomba nya wutsendze, va di gu embelela dzindzimo nya gurungudze. Khavbo avbo, Ataliya a di pferula dzingandzu dzaye a laledza, khuye: “Valogovedzi! Valogovedzi!”

¹⁴ Aholu muphasi nya mhamba Joyadha, a di dusa vbavbandze dzindruna dzi nga bani na dzi gu thangela masotshwa, a va embela, khuye: “Mu duseni khu vbakari nya vathu mu mu yisa vbavbandze, ni wevbini a na mu landrago mu songeni khu litshari.” Kholu muphasi nya mhamba a di himbedzela gukhuye a songedwa Nyumbani ga Nungungulu.

¹⁵ Khavbovbo va di mu mola, va bela khu ndzila nya mwanya nya dzikavalu, va hongola ndrangani ga mufumeli, avbo va ngaya mu songela avbo.

Gidzumeledzwano gya Joyadha

¹⁶ Joyadha a di gira gidzumeledzwano ni vathu, gumogo ni mufumeli, gu, avo va khale vathu va Pfhumu Nungungulu.

¹⁷ Khavbo avbo, vathu vatshavbo va di bela nyumbani ga Bhahali vaya mu khungumula; va phwatisela siluvelo ni sifananiso saye, va songa Matani, muphasi nya mhamba wa Bhahali, va mu songela vbasiluvelotunu saye.

¹⁸ Joyadha a di emisa vaphasi va na Levhi gu khala vasayisi va Nyumbani ga Nungungulu avo va nga bani va emisidwe khu Dhavhidhe, Nyumbani ga Pfhumu Nungungulu, gasi va gira miphaselo nya guvbiswe ga Pfhumu Nungungulu, kha nga idzo gu lovidwego khidzo umo nya Nayo wa Mosi, khu gutsaka ni dzindzimo, kha nga guleletela ga Dhavhidhe.

¹⁹ A di emisa vawoneleli nya dzinyangwa nya Nyumba ya Pfhumu Nungungulu, gasi gu si beli ni wevbini muthu a dzi nyenyezisidego.

²⁰ A di dzega vathangeli nya sikwata nya lizana (100), vasingalagadzi, vamwamangulu nya gufumele vathu, ni vathu vatshavbo va tigoni, va reledzisa mufumeli, Nyumbani ga Pfhumu Nungungulu, va mu bedza umo, va mu khadzisa vbagikhalotunu nya wufumu.

²¹ Vathu vatshavbo va tigoni va di nengela, ni dhoropani gu di rula, kholu va di songide Ataliya khu litshari.