2 Dzikoronika 22 - Bhibhiliya Nya Guage

Mufumo wa Akazi

¹ Vavbanyi va Jerusalema va di tshikedza wulangani wa Jeyoramo, khu gu emisa mwanaye nya nandra Akazi gu khala mufumeli, kholu, tsawa wu ngata ni Vaarabhiya lizumbotunu gwawe, wu di songide sanana saye satshavbo nya vakoma. Khu guralo, Akazi, mwamana wa Jeyoramo a di fumela Judha.

² Akazi a diri ni tanga nya maguma na mivili myaga, gikhati a nga phela gufuma, fumide mwaga moyo Jerusalema.

³ Mayi waye a di ranwa gupwani Ataliya, a diri gyanana gya Oniri. Uye nuye gimbide khu dzindzila dza babe waye Akabi; kholu mayi waye khuye a nga bani a mu ninga wusingalagadzi, a mu kutsedzela gu gira mithumo nya guvivbe.

⁴ A di gira mithumo nya guvivbe mbeli ga Pfhumu Nungungulu, kha nga vathu va nyumbani ga Akazi, kholu avo khavo va nga bani vari vasingalagadzi yaye hwane nya gufe ni gumbemba ga babe waye.

⁵ Khu kotani nya gu kutsedzedwe khavo, a di hongola ni Joramo, mwamana wa Akabi, mufumeli wa Israyeli, tigoni ga Ramoti-Gileyadhi, aya dwana ni Hazayeli, mufumeli wa Siriya, Joramo a di bayiswa khu Vaasiriya.

⁶ A bwelela Jezireyeli, gasi guya thumwa dzimbanga a ngaya bayiswago tigoni ga Rama, gikhati a ngaya dwana ni Hazayeli mufumeli wa Siriya; Akazi, mwamana wa Jeyoramo, mufumeli wa Judha, a di relela Jezireyeli guya wusela Joramo, mwamana wa Akabi, a nga bani a gu dwala.

Jewu a ngu songa Akazi

⁷ Nungungulu a di thumisa liendro leli la Akazi gumogo ni gu mu vangela lufu khu gu hongola aya wusela Joramo; kholu avbo a ngatago, uye a di soma nyimbi gumogo ni Joramo, gasi guya dwana ni Jewu, mwamana wa Ninisi, uye a nga bani a todzidwe khu Pfhumu Nungungulu, gasi a mbembise nyumba ya Akabi.

⁸ Gikhati Jewu a nga bani a thuma thumo wowu nya gulamule nyumbani ga Akabi, a di mana manganagana ya na Judha, ni sanana sa vandruye va Akazi, va nga bani va mu thumela a va songa.

⁹ Khu hwane a di rumela gu vbwetwa Akazi, vaya mu manela Samariya, umo a nga bani a sihade umo, va mu resa ga Jewu, va ta mu songa; sithumi saye si di mu dzinga, kholu va di khavo: “Oyu mwamana wa Josafati a nga landrago Pfhumu Nungungulu khu monyo waye watshavbo.” Mwalo a manegidego wa nyumbani ga Akazi, gasi gu khala mufumeli.

Ataliya a ngu wandra wufumu (2 Dzipf 11:1-13)

¹⁰ Ataliya, na wonide nya gukhuye mwanaye Akazi fude, a di khuga aya sasela vatshavbo va nyumbani nya wufumu wa na Judha.

¹¹ Aholu Jeyosabhati, nyamahegyane wa mufumeli, a di dzega Jowasi, mwamana wa Akazi, a muba vbakari ga sanana sa mufumeli, avo va nga bani va songetedwa, aya mu siha makhuvini va nga bani va lala umo Nyumbani gwa Nungungulu, gumogo ni musayisi waye; khu kharati, Jeyosabhati, nyamahegyane wa mufumeli Jeyoramo, mwangadzi wa muphasi nya mhamba Joyadha ni ndruye wa Akazi, a di sihala a si songwi khu Ataliya.

¹² Jowasi a di khala navo livbandre na moyo myaga Nyumbani ga Nungungulu, Ataliya na gu fumela litigo.