2 Dzikoronika 20 - Bhibhiliya Nya Guage

Josafati a ngu pala va na Mowabhi ni va na Amoni

¹ Khu hwane nya esi, va na Mowabhi, ni va na Amoni, gumogo ni Vamewuni, va dita wugela Josafati, va mu dwanisa.

² Khavbo avbo, va dita nya gukari va ta tivisa Josafati, khavo: “Gi nguta gidzemo nya gikhongolo, gi tago khu khisikheyi nya yiphwa ni Siriya, guta gu dwanisa; olu hi ganelago vomo Hazazoni-Tamari a gu Eni-Gedhi.”

³ Josafati a di khala hwanga, aya lombelela ga Pfhumu Nungungulu, a laya va na Judha vatshavbo gukhuye va hala, nyamba hodza gilo.

⁴ Va na Judha va di tshangana va tombana gumogo gasi va lomba giphaso ga Pfhumu Nungungulu; gu dita gambe khu madhoropani gwatshavbo ga va na Judha, vathu nya gute lombelela ga Pfhumu Nungungulu.

⁵ Josafati, a di ema vbakari nya tshangano wa na Judha, ni ga vavbanyi va Jerusalema, Nyumbani gwa Pfhumu Nungungulu, mbeli nya likupakupa nya liphya;

⁶ a di ganela, khuye: “Oh! Pfhumu Nungungulu wa vababe vathu, ina khandri Uwe Nungungulu a guromo ndzadzini, gani? Ina khandri Uwe mufumeli nya mayigo yatshavbo, gani? Mandzani gwago, yomo tshivba ni wufumu, mwalo a dzi kodzago gu dwana nago.

⁷ Ina Uwe Pfhumu Nungungulu wathu, khandri Uwe U tutumisidego vathu va nga bani va vbahide tigoni momu U li ningela ga vathu vago va na Israyeli, U li ningela kala gupindruga ga sanana sa Abrahama, pari yago, gani?

⁸ Va vbahide omu, va bwelo khavbo va vbaha nyumba nya miphaso nya guphasele lina lago, khavo:

⁹ Ha gu dugeledwa khu libango nya gukari, nya nga nyimbi, gutsayiswa, tungu, mwendro ndzala, satshavbo hi nata si bikela nyumbani momu mbeli gwago, kholu lina lago lomo nyumbani momu, gutshanisekani gwathu hi na ta lila avbo gwago Uwe U hipwa, U hi vbanyisa.

¹⁰ Olu wona, va na Amoni ni va na Mowabhi, ni avo va dugelago gigomoni gya Seyiri; Uwe u ngamba dzumedzisa va na Israyeli gubela vbakari gwawe gikhati va dugidego khu tigoni ga Egipito, aholu va gimbilela hwindzo navo va ndreya va si va mbembisi,

¹¹ nga wona tshatshazelo va hi ningago! Va guvbweta gu hi lundra ga thomba U hi ningidego.

¹² Oh, Pfhumu Nungungulu wathu! Ina kamwe khu na va lamula, gani? Kholu ethu hi mwalo tshivba nya gu dwane ni mwandra yoyu nya wukhongolo wutago guta hi dwanisa; olu ni gilo nya gugire kha hi giti; maho yathu ha gu ma vega mbeli gwago.”

¹³ Vatshavbo va na Judha va di emide mbeli ga Pfhumu Nungungulu, gumogo ni sanana sawe, ni vagadzi vawe ni sanana sawe nya sikhwathana.

¹⁴ Khavbo avbo, liphuvbo la Pfhumu Nungungulu li dita vbakari nya tshangano khu ga Jahaziyeli, mwamana wa Zakariya, mwamana wa Bhenaya, mwamana wa Jeyeli, mwamana wa Nataniyeli, Mulevhi, nya linyumba la Asafe,

¹⁵ khuye: “Nyi yingiseni, enu vatshavbo va na Judha, ni enu mwatshavbo mu vbahidego Jerusalema, ni uwe mufumeli Josafati! Pfhumu Nungungulu a ngu ganela kharati, khuye: Mu nga thavi gilo ambari gu thurugiswa khu gidzemo gegi nya gingi, kholu nyimbi yeyi, khandri yanu, aholu khya Nungungulu.

¹⁶ Mindru gugyago, relelani mu ya tshangana navo; kha mu va woni vale va ngu gwela khu mugigomoni gya Zizi, mu naya va manani mahegiso nya kova wu thononago ni giwula gya Jeruweli.

¹⁷ Ga nyimbi yeyi khandri enu mu na gu dwanago, folani mu eme mu na wona idzo Pfhumu Nungungulu a na gu mi vbanyisani khidzo, mu nga thavi enu vavbanyi va Judha ni Jerusalema, ambari gu thurugiswa khu gilo; mindru khugani mu ya tshangana navo, kholu Pfhumu Nungungulu a na bani nari nanu.”

¹⁸ Khavbo avbo, Josafati, a di khidzima a thega khu khovbe mafuni; ni vatshavbo va na Judha ni vavbahi va Jerusalema, avo navo va di khidzima mbeli ga Pfhumu Nungungulu, va mu khozela.

¹⁹ Khu guralo, va na Levhi, ni sanana sa na Khowati, ni va na Kore, va di khuga va dhumisa Nungungulu khu lito nya gukhugege ngudzu.

²⁰ Khu litshigu li landrelago, na gu ngari dzimindru, va di khuga va bela khu giwulani gya Tekowa. Na va nga gu khuga, Josafati a di ema, khuye: Nyi yingiseni enu va na Judha ni enu mu vbahidego Jerusalema! Khodwani ga Pfhumu Nungungulu wanu, mu na bani mu tiyide; khodwani ga vaprofeti vaye, mu na dugelela.

²¹ A di pwanana ni vathu vaye, a hatha vathu va na gu embelelago mbeli ga Pfhumu Nungungulu va dhumisa wugulu waye nya guage, va thanga mbeli nya masotshwa, khavo: Rungudzani Pfhumu Nungungulu, kholu wuwadi waye wu ngu simama kala gupindruga.

²² Avbo va nga phela gu embelela ni gu kulungela va dhumisa Nungungulu, Uye Pfhumu a di varamela khu hwane ga na Amoni ni ga na Mowabhi ni avo va nga bani va romo khu gigomoni gya Seyiri, va ngatago guta dwana ni va na Judha, vatshavbo va di sasedwa.

²³ Kholu va na Amoni, ni va na Mowabhi, va di wugela vavbahi va gigomoni gya Seyiri, va di saselana khu gyawe.

²⁴ Avbo va na Judha va nga vbohago gigomoni gi khedzanago ni giwula, va di alakanya gukhavo va na wona gidzemo, aholu va di wona sirumbi na si mbambamede vbavbatshi nyambana ni moyo nya gudagate.

²⁵ Gikhati Josafati gumogo ni vathu vaye, va ngata guta va phanga, va dita mana thomba nya yingi ni sombo nya gutale nya lisima, va di si dzega va tandrega ni gu si rwala kholu a diri singi. Va di vbedza matshigu mararu na va gu va phanga, kholu si di tade.

²⁶ Khu litshigu nya wu na va di ya tombana kovani wa Bheraka, kholu vbale va di yela guya dhumisa Pfhumu Nungungulu; khu guralo, wulanga wule wu di ranwa kova nya gikategiso kala na muhuno.

²⁷ Khavbo avbo, vatshavbo vama va na Judha ni va Jerusalema, va di bwelela Jerusalema, Josafati a thanga mbeli gwawe na tade khu gutsaka, kholu Pfhumu Nungungulu a di gu va nengedziside khu gu pala valala vawe.

²⁸ Va di vboha Jerusalema vaya bela Nyumbani ga Nungungulu na va gu womba mihwambi, sitendre ni mipundru.

²⁹ Gikhati mifumo nya mayigo yale yatshavbo, yi ngapwago nya gupwani, Pfhumu Nungungulu, dwanide ni valala va na Israyeli, yi di tala khu hwanga.

³⁰ Khu guralo, mufumo wa Josafati wu di mana gurula, kholu Pfhumu Nungungulu a di mu hefemudza khu sipandre satshavbo.

Mahegiso nya mufumo ni gufa ga Josafati

³¹ Josafati fumede litigo la Judha, nari ni magumararu na livbandre myaga gikhati a nga phela gufuma, fumide magumavili na livbandre myaga Jerusalema. Mayi waye a di ranwa gupwani khu Azubha, nyamahegyane wa Sili.

³² Uye a di landrisa dzindzila dza babe waye Asa, gima kha nga hambana nadzo, a khala muthu nya gululame mbeli ga Pfhumu Nungungulu.

³³ Ambari khu guralo, malanga nya sigomo kha ma nga khungumudwa, kholu vathu va di si gu tiyisi gwadi myonyo yawe guvbweta Nungungulu wa vababe vawe.

³⁴ Gasi khu yimbe mithumo ya Josafati, gukhugela iyo nya guhegule niyo nya guhegise, yi lovidwe umo nya Libhuku nya matimo khu Jewu, mwamana wa Hanani, a ma pata ni matimo ya vafumeli va Israyeli.

³⁵ Khu hwane nya esi, Josafati mufumeli wa Vajudha, a di thangana wupari ni Akazi mufumeli wa Israyeli, uye a nga gira mithumo nya guvivbe.

³⁶ A di pwanana naye gu hengela gu gira mataro tigoni ga Eziyoni-Gebheri, nya guhongole Tarisisi.

³⁷ Aholu Eliyezeri, mwamana wa Dhodhava wa Maresa, a di profeta ga Josafati a mu embela, khuye: Kha nga olu u thangidego wupari ni Akazi, Pfhumu Nungungulu pfhungumude mithumo yago. Mataro ma na khungumuga ma si kodzi gu hongola Tarisisi.