2 Dzikoronika 2 - Bhibhiliya Nya Guage

Solomoni a ngu phaswa guvbaha Nyumba ya Nungungulu

¹ Solomoni a di dzi emisela guvbaha nyumba yi lumbago lina la Pfhumu Nungungulu, gumogo ni nyumba yaye nya wufumu.

² Solomoni a di saya tengo nya livbandre na mavili magumi magumi mazana (70.000) vama nya simbeza, ni livbandre na mararu magumi magumi mazana (80.000) vama, gasi gu pila siwindri mugigomoni, ni magumararu na livbandre na limwedo mazana (3.600) vawoneleli.

³ Solomoni a di rumela mwango ga Hiramo, mufumeli wa Tiro, khuye: “Kha nga iso u nga girelago babe wangu Dhavhidhe, u nga mu rumelago misimbo nya sedhari gasi gu, a vbaha khiyo nyumba nya gukhale umo, gira gambe avbo gwangu.

⁴ Wona, nyi ngu vbweta guvbaha nyumba yi lumbago lina la Pfhumu Nungungulu wangu. Yi na khala nyumba nya miphaso, nyi vbisela umo libani mbeli Gwa Pfhumu, ni gu vega umo sibaba nya miphaso matshigu yatshavbo, ni miphaselo nya guvbiswe dzimindrudzile ni silambosile, khu dzisabhadho ni gumega nya ngima, ni mibuzo ya Pfhumu Nungungulu wathu; a gu fanelo nyamba vbela ya Israyeli.

⁵ Nyumba nyi vbwetago guvbaha, yi na bani yiri yikhongolo, kholu Nungungulu wathu, khongolo guvbindra vanungungulu vatshavbo.

⁶ Khu guralo, khu mani a nga hadza gu mana tshivba nya gu mu vbahele nyumba? Kholu ambari gupindruga ni wugulu waye watshavbo, wusi kodzigo gu mu enedza. Kheni mani eni nya gukala nyi Mu vbahela nyumba? Gimwalo gimbe gilo nyi yelago gu gira vbavbandze nya guvbise libani mbeli gwaye.

⁷ Khu guralo, nyi rumele muthu a vidzidwego khu mithumo ya ndralama, parata, sugu ni simbi, ni gu kodza guluga myendra nya muvala nya giwunguwungu, nya gukwalale ni muvala wa damboni, muthu a kodzago guvata, gasi a kodza guta thuma ni vathu va Judha ni Jerusalema, avo va hathidwego khu babe wangu Dhavhidhe, a va tshanganisa vbafuvbi gwangu.

⁸ Nyi rumele gambe khu Libhanoni, mapulango nya sedhari, mikipirisi ni mibandrwa, kholu eni nyi ngu dziti gwadi gukheni vathu vago va ngu kodza gu pila gwadi mapulango ya Libhanoni. Khu guralo, sithumi sangu si nata phasedzelana ni sago,

⁹ gasi va nyi dongisela mapulango nya mangi; kholu nyumba nyi vbwetago gu vbaha, yi na bani yiri yikhongolo ni gumbura ngudzu.

¹⁰ Sithumi sago si na pilago mapulango, nyi na si ninga esi: Magumavili magumi mazana (20.000) mideva nya wuguvbi nya mavbila, magumavili magumi mazana (20.000) mideva nya pupu nya sivbila, magumavili magumi mazana (20.000) miphongolo nya vbinyu, magumavili magumi mazana (20.000) miphongolo nya mafura.”

¹¹ Hiramo, mufumeli wa Tiro, a di phindrula Solomoni khu lidangalila, khuye: “Kha nga Pfhumu Nungungulu a golago vathu vaye, khidzo a gu vegedego gu khala mufumeli vbakari gwawe.

¹² Hiramo a di engedza, khuye: A na bongwe Pfhumu Nungungulu wa Israyeli, a giridego ndzadzi ni mafu, a ningidego mufumeli Dhavhidhe, mwamana nya guti ni mapimo, a na vbahago Nyumba ya Pfhumu Nungungulu, gumogo ni nyumba yaye nya wufumu.

¹³ Khu guralo, olu, nyi ngu gu rumela muthu nya guti gumogo ni mapimo nya guete, a ranwago gupwani Hiramu-Abhiyu,

¹⁴ gyanana gya nyamayi moyo nya sanana sa Dhani, babe waye a gu dugela tigoni ga Tiro, uye a ngu yiti gwadi mithumo ya ndralama, parata, sugu ni simbi, mapulango ni siwindri, a ngu kodza guluga myendra nya mivala yatshavbo nya siwunguwungu, ni livala la damboni, ni livala nya gukwalale, a ngu luga gambe seda, a ngu yiti mithumo nya guvate ni gu tshavela sifananiso, ni gu gira ni wevbini thumo u wu vbwetago, a na thuma gumogo ni vameseri vago, ni avo va mune wangu Dhavhidhe, babe wago.

¹⁵ Gasi, olu, mune wangu, hi rumele ethu sithumi sago, mavbila, gumogo ni mafura ni vhinya esi u si ganedego.

¹⁶ Ethu hi na pila mapulango nya gutale ngudzu ya Libhanoni nya edzi u ma vbwetago khidzo, hi na gu rumela khu gu ma tshatugisa khu yiphwa khu sitataru kala Jope, khiyoyo u na ma vbohisa Jerusalema.”

¹⁷ Solomoni a di gira gilovela nya valuveli vatshavbo va nga bani va romo tigoni ga Israyeli, a landrisa idzo a nga bani a sayide khidzo babe waye Dhavhidhe; va mana tengo nya lizana ni livbandre magumi lizana ni livbandre magumi ni magumararu na livbandre na limwedo mazana (153.600).

¹⁸ Ga vathu vava, a di hatha livbandre na mavili magumi magumi mazana (70.000) va gira varwali nya sombo, livbandre na mararu magumi magumi mazana (80.000) va khala vapili nya siwindri mugigomoni, ni magumararu magumi ni livbandre na limwedo na mazana (3.6000) va khala vathangeli nya gugimbedzise thmo wa vathu vatshavbo.