2 Dzikoronika 19 - Bhibhiliya Nya Guage

Muprofeti Jewu a ngu kawuka Josafati

¹ Josafati, mufumeli wa Judha, a di wuya gaya gwaye khu gurula, a bwelela Jerusalema.

² Muprofeti Jewu, mwamana wa Hanane, a di mu khinga, a embela mufumeli Josafati, khuye: Ina u na ni fanelo nya guphasedzele muthu nya guvivbedwe khu monyo ni gu gola vale va nyenyago Pfhumu Nungungulu, gani? Khu guralo, Pfhumu Nungungulu a gu gorogede ngudzu.

³ Ambari khu guralo, u di thumide silo nya sadi, kholu u duside tigoni madingo nya vanungungulu nya sifananiso, u vbweta Pfhumu Nungungulu khu monyo wago watshavbo.

Gu emiswa nya valamuli

⁴ Josafati, a di khala Jerusalema; aholu a di gu duga aya holela vathu vaye gukhugela Bherisebha kala gipandre nya sigomo sa Efrayimi, a khongotela vathu gu va wuya ga Pfhumu Nungungulu wa vababe vawe.

⁵ A di emisa valamuli tigoni ga Judha ni madhoropani gwatshavbo nya makhokhola ya Judha.

⁶ A di embela valamuli, khuye: “Dzi woneleni khu esi mu na girago, kholu mu nga lamuli khu guruma nya vathu, aholu lamulani khu guruma ga Pfhumu Nungungulu, mwa gu lamula kharato, Uye a na bani nari ni enu.

⁷ Khu guralo, thavani Pfhumu Nungungulu, mu dzi wonela mithumoni gwanu gwatshavbo, kholu ga Pfhumu Nungungulu wathu, gumwalo gu kanganyisa khu gukhedza giemo nya muthu ambari gu rengeledwa.

⁸ Khu hwane gambe nya gu bani a wide Jerusalema, Josafati a di emisa va na Levhi nya gukari, vaphasi nya mhamba ni vathangeli nya dzinyumba dza na Israyeli, gasi va khala valamuli va Pfhumu Nungungulu ni gu pila mahungu nya dziketso ga vavbanyi va Jerusalema.

⁹ A di va ninga sileletelo sesi, khuye: Gimbilani kharati khu gu ninga githawo Pfhumu Nungungulu, mu tumbega khu monyo wanu watshavbo.

¹⁰ Gani khu mevbini mahungu mu no resedwago avbo gwanu khu vandriyanu va vbahidego madhoropani gwawe, a gu bani nari mahungu nya gusonge, mwendro ma gimbilelanago ni Nayo, sirumo, gululama mwendro sileletelo, gu vbwetega gu va khongotela gasi va si ghohi ga Pfhumu Nungungulu, gasi vbakari gwanu ni ga vandriyanu mu si thegedwi khu libango nya likhongolo, girani kharato, gasi mu si mani nandru.

¹¹ Kha mu mu woni oyu muphasi nya khongolo nya mhamba Amariya, emisidwe vbakari gwanu gasi gu gimbidzisa satshavbo si lumbago Pfhumu Nungungulu; ni Zebhadhiya, mwamana wa Ismayeli, muthangeli nya ndranga ya na Judha, oyu a na gimbidzisa satshavbo si lumbago mufumeli; vomo gambe vbakari gwanu va na Levhi, gasi gu khala vasayisi vanu. Khu guralo, tiyani longo mu thuma! Pfhumu Nungungulu a na khale ni vathu nya vadi.