2 Dzikoronika 12 - Bhibhiliya Nya Guage

Mufumeli wa Egipito a ngu dhumela Jerusalema

¹ Robhowamo hwane nya gu bani na tiyiside mufumo waye, ni gu dzipwa na khadzisegide, a di diga nayo wa Pfhumu Nungungulu, uye gumogo ni va na Israyeli vatshavbo.

² Khu mwaga nya livbandre nya gufume ga mufumeli Robhowamo, Sisaki, mufumeli wa Egipito, a di gwela a ta dhumela Jerusalema, (kholu avo va di ghohede Pfhumu Nungungulu),

³ a diri ni likhumi na mavili mazana (1.200) dzikareta, ni livbandre na limwedo magumi mazana (60.000) vakhileli nya dzikavalu; ni vathu nya vangi nyambana tengo a ngata navo khu Egipito, nya Valibhiya, Vasuki ni Vaetiyopiya.

⁴ A di wandra madhoropa nya makhokhola ma lumbago Judha, a vboha kala Jerusalema.

⁵ Khavbo avbo, a dita muprofeti Simaya, ga mufumeli Robhowamo, ga manganagana ya Judha, ma nga bani ma tombanide Jerusalema khu kotani ya Sisaki, ava embela, khuye: “Pfhumu Nungungulu a ngu ganela, khuye: Enu mu nyi digide, khu kharato Eni neni nyi ngu mi ningelani mandzani ga Sisaki.”

⁶ Khavbo avbo, manganagana ya na Israyeli, gumogo ni mufumeli, va di dzi nogisa va ganela, khavo: “Pfhumu Nungungulu lulamide.”

⁷ Pfhumu Nungungulu na wonide gu dzi nogisa gwawe, magana ya Pfhumu Nungungulu ma dita ga muprofeti Simaya, khuye: “Olu mu dzi nogisidego kha nyi na mi mbembisa; aholu khu gikhati gidugwana nyi na mi ninga wulanga nya wuthavelo, gasi likhulo langu li si thegeli Jerusalema, khu mandzani ga Sisaki.

⁸ Khu guralo, mu naya khala sithumi saye, gasi mu kodza gu wona guhambana, gu nyi thumelani ni gu thumela mifumo ya mafuni.”

⁹ Khu guralo, Sisaki mufumeli wa Egipito, a di gwela Jerusalema aya phanga dzithomba dza Nyumbani ga Pfhumu Nungungulu ni dzithomba dza nyumbani ga mufumeli; a di phanga dzatshavbo. A dzega gambe ni sitshangu nya ndralama esi si nga bani si giridwe khu Solomoni.

¹⁰ Wulangani nya esi, mufumeli Robhowamo, a di gira sitshangu nya sugu, a si ningela mandzani ga vathangeli nya wuwoneleli vbanyangwatunu nya nyumba ya mufumeli.

¹¹ Gikhati gyatshavbo mufumeli a nga bani na gwela Nyumbani ga Nungungulu, vawoneleli va di dzega sitshangu va si phara, va bwelo khavbo va si vega gambe nyumbani nya vawoneleli.

¹² Kha nga Robhowamo a nga dzi nogisago mbeli ga Pfhumu, likhulo la Pfhumu Nungungulu li di bosa, a si mu mbembisi khu satshavbo, kholu tigoni ga Judha gu di nga tshade silo nya sadi.

Guvbela nya mufumo wa Robhowamo

¹³ Khavbo avbo, mufumeli Robhowamo, a di tiya a khadzisega Jerusalema, a simama gufuma. Gikhati a phedego gufuma, Robhowamo a diri ni magumana na moyo (41) myaga, a fuma Jerusalema, lidhoropa Pfhumu Nungungulu a li hathidego vbakari nya mafumbo yatshavbo ya na Israyeli, likhumi na livbandre na mivili (17) myaga, gasi li khale avbo Lina laye; lina la mayi waye a diri Nahama wa na Amoni.

¹⁴ A di gira guvivba, kholu kha nga dzi vegisa khu monyo waye watshavbo, guti gugola ga Pfhumu Nungungulu.

¹⁵ Gasi a gu bani nari khu mithumo ya Robhowamo, iyo nya guhegule niyo nya guhegise, yi lovidwe umo nya Libhuku nya Matimo ya muprofeti Simaya, numo ga muprofeti Idho mwama nya liwoni, ni omu nya mabhuku nya tumbunugo nya linyumba laye. Gikhatini gwaye gu manegide mayunga ya Robhowamo ni Jerobhowamo.

¹⁶ Khu guhegisa, Robhowamo lade gumogo ni vavelegi vaye, va mu dzingide Dhoropani ga Dhavhidhe; mwanaye Abhiya, a di mu tshikhedza, a gufuma wulanga waye.