2 Dzikoronika 11 - Bhibhiliya Nya Guage

Nungungulu a ngu himbedzela makungo ya Robhowamo

¹ Avbo Robhowamo a nga vbohago Jerusalema, a dita tshanganisa vathu va nyumbani ga Judha ni va nyumbani ga Bhejami, a mana lizana ni livbandre na mararu magumi mazana (180.000) vama va dzi emisedego gu dwana nyimbi, gasi gu dwana ni va na Israyeli, va kodza gu wusedza mufumo wa Robhowamo.

² Aholu magana ya Pfhumu Nungungulu, ma dita ga Semaya, muthu wa Nungungulu, ma ta khayo:

³ “Embela Robhowamo, mwamana wa Solomoni, mufumeli wa Judha, ni va na Israyeli vatshavbo va guromo tigoni ga Judha ni ga Bhejami, khuwe:

⁴ Pfhumu Nungungulu a ngu ganela kharati, khuye: Mu nga hongolini, gambe mu nga wugeli vandriyanu, muthu ni muthu a na bwelele gaya gwaye; kholu mahungu yaya, ma dugide khavbo Gwangu.” Va di yingisa magana ya Pfhumu Nungungulu, va thindreka guya dwana ni Jerobhowamo.

⁵ Robhowamo a di khala Jerusalema, a vbaha madhoropa nya makhokhola tigoni ga Judha.

⁶ A di vbaha madhoropa ya Bhetlehema, Itani, ni Tekowa,

⁷ Bheti-Zuri, Soko, Adhulamo,

⁸ Gati, Maresa ni Zifi,

⁹ Adhorayimi, Lakisi ni Azeka,

¹⁰ Zora, Ayijaloni ni Hebroni, ma nga bani ma romo tigoni ga Judha ni ga Bhejami; ma diri madhoropa nya makhokhola.

¹¹ Avbo a nga ma bhiya khu makhokhola, a di vega umo vamwamangulu, a vbaha dzinyumba nya guvegedzele guhodza, mafura ni wadwa nya vhinya.

¹² Umo nya lidhoropa ni lidhoropa, a di vega sitshangu ni matshari; a di ma tiyisa ngudzu madhoropa yoyo. Lihundzu la Judha ni la Bhejami ma di gu mu lumba.

Vaphasi nya mhamba ni va na Levhi va nguta Jerusalema

¹³ Vatshavbo vaphasi nya mhamba ni va na Levhi va nga bani va romo tigoni gwatshavbo gwa na Israyeli, va dita khu madhoropani gwawe vata dzi tshanganisa ni Robhowamo.

¹⁴ Kholu, va na Levhi, va di diga mayigwana yawe ni dzithomba dzawe, vata vbaha tigoni ga Judha ni Jerusalema, kholu Jerobhowamo ni sanana saye, va di va tutumisa thumoni gwawe nya guphasele Pfhumu Nungungulu.

¹⁵ A dzi emisela abune vaphasi vaye nya mhamba, va malangani nya sigomo, nya gukhozele vanungungulu nya madhimoni, ni simombyana a nga si girago.

¹⁶ Khu hwane ga va na Levhi, gu di landrela gambe mafumbo nya mangi ya na Israyeli, vale va nga bani va dzi ningede khu monyo wawe watshavbo guvbweta Pfhumu Nungungulu wa na Israyeli, va dita Jerusalema, gasi guta ningela miphaselo ga Pfhumu Nungungulu wa vababe vawe.

¹⁷ Khu guralo, va di tiyisa mufumo wa na Judha, va seketela Robhowamo, mwamana wa Solomoni, khu myaga miraru; kholu a di vbedza myaga miraru na gu landrela ndzila ya Dhavhidhe ni ya Solomoni.

Ndranga ya Robhowamo

¹⁸ Robhowamo a di dzega Mahalati, nyamahegyane wa Jerimoti, mwamana wa Dhavhidhe, ni Abhiyayili, Nyamahegyane wa Eliyabhi, mwamana wa Jese, a khala mwangadzi waye,

¹⁹ Mahalati a di mu velegela sanana sesi: Jewusi, Semariya ni Zahamu.

²⁰ Hwane gwaye a di dzega Mahaka, nyamahegyana wa Abhisalamo, uye a di mu velegela sanana sesi: Abhiya, Atayi, Ziza ni Selometi.

²¹ Robhowamo a di haladza Mahaka, nyamahegyane wa Abhisalamo, guvbindra vagadzi vaye vatshavbo ni sibhayi; kholu uye a diri ni likhumi na livbandre na vararu (18) vanyamayi, ni livbandre na limwedo magumi (60) sibhayi; va nga mu velegela magumavili na livbandre na siraru (28) sanana nya sikhwathana, ni livbandre na limwedo magumi (60) vanyamahegyane.

²² Robhowamo a di emisa kha nga hungo nya sanana saye satshavbo Abhiya, mwamana wa Mahaka gu a khala nari uye khongolo vbakari ga vandriyaye; kholu khuye a nga bani a mu vbweta gu mu gira mufumeli.

²³ Robhowamo a di thumisa wugengeli, kholu a di phalalegisa sanana saye khu mayigo yatshavbo ya na Judha ni ya na Bhejami, madhoropani gwatshavbo nya makhokhola, a kabanisela guhodza nya gungi ni gu va lowodza vanyamayi nya gutale.