1 Vatesalonika 5 - Bhibhiliya Nya Guage

Gulindrela litshigu la Pfhumu

¹ Vandruye, khu mahungu nya gikhati ni matshigu si na gu giregago silo soso, kha gu vbwetegi gu ganela gambe gimbe gilo.

² Enu mu ngu dziti gwadi nya gukhenu litshigu la Pfhumu li nata nga mbafa, vbakari nya wutshigu.

³ Gikhati vathu va ganelago, khavo: “Litigo li lade, gu mwalo gilo,” khavbo avbo gu natago, khu gipitipiti, gumbemba vbatshani gwawe. Va na khala nga nyamayi nya mimba gikhati a lumwago, kha va na vbuluga.

⁴ Vandruye, enu kha mu vbanyi gidemani nya wutshigu, khu guralo, litshigu lolo kha li dzi kodzi gu vboha ga enu kha nga mbafa, yitago wutshigu.

⁵ Enu mwa gu vbanya guwonegelani nya mihani, kholu ethu kha hi lumbi wutshigu ambari gidema.

⁶ Khu kharalo, hi nga khali na hi lade nga vambe, hongoleni hi khedzisele, hi vbanye khu gu dzi phara.

⁷ Kholu, vale va lalago, va gu lala wutshigu, ni vale va levago, va gu leva wutshigu.

⁸ Gasi ethu hi lumbago, mihani, ha gu vbanya khu gu dzi phara, hi vhikedwa khu gitshangu nya gukhodwe ni lihaladzo, ni gihugu nya litunga a gu gutumba nya guvbanyiswe.

⁹ Khu kharalo, Nungungulu kha hi emisela gu hi sanisa, aholu, a hi emisede guya mana guvbanya khu ga Pfhumu yathu Jesu Kristo.

¹⁰ Uye a difa khu kotani nya ethu, gasi mu guvbanyani ambari gufani hi vbanye gumogo naye gikhati gyatshavbo.

¹¹ Khu kharato, tangadzisanani, phasanani moyo ni moyo nga edzi mutago na mu gu gira kala olu.

¹² Vandruye, hi ngu mi lomba mu ninge githawo ga vale va tago khu lina la Pfhumu va ta thumela enu, vathangeli ni valuleki vanu.

¹³ Va sayiseni khu ligolo ni lihaladzo, khu thumo yoyo va gu nawo. Vbanyani khu gurula vbakari gwanu.

¹⁴ Vandruye, hi ngu mi lomba gambe, kawukani va nya mihudzuri, tiyiselani ava va rerekago, sayisani vadwali, mu hunisela vatshavbo.

¹⁵ Mu nga bweledzelani guvivba khu guvivba. Aholu girelanani wuwadi vbakari gwanu ni vatshavbo.

¹⁶ Vbanyani khu gutsaka gikhati gyatshavbo.

¹⁷ Mu nga garali khu gu gira milombelo.

¹⁸ Bongani Nungungulu ga silo satshavbo. Aya khayo mavbanyelo a ma vbwetago Nungungulu vbakari gwanu, ni wuhengeli ga Jesu Kristo.

¹⁹ Mu nga degudzi lito nya Liphuvbo nya Guage,

²⁰ mu nga yeyisi vaprofeti.

²¹ Khedzani gwadi satshavbo; mu vegisa esi nya sadi,

²² ndreyani ga satshavbo esi nya guvivbe.

Gikategiso ni malosedzela nya guhegise

²³ Nungungulu nya gurule a na agise ni gu sayisa sivili sanu ni mihefemulo yanu kala a wuya Pfhumu yathu Jesu Kristo.

²⁴ Oyu a nga mi hathani tumbegide a na gira esi a nga tumbisago.

²⁵ Vandruye, hi dundrugeni nethu omu nya milombelo yanu.

²⁶ Losani vathu vatshavbo va Nungungulu khu maloselo nya wundruye.

²⁷ Nyi ngu mi lombani, khu lina la Pfhumu, mu hevbulela lidangalila leli vathu vatshavbo.

²⁸ Wuhigo wa Pfhumu yathu Jesu Kristo wu na khale ni enu.