1 Vatesalonika 1 - Bhibhiliya Nya Guage

Gulosa

¹ Eni Pawulo, ni Silivhano ni Thimoti, hi ngu losa libandla nya vathu va Nungungulu va vbanyago dhoropani ga Tesalonika, na hi patane khu lihaladzo la Nungungulu, ni la Pfhumu yathu Jesu Kristo, hi ngu mi suvela wuhigo ni gurula.

Gukhodwa ni mavbanyelo ya Vatesalonika

² Hi ngu bonga Nungungulu gikhati gyatshavbo khu enu, hi ngu mi dundruga mwatshavbo milombeloni yathu.

³ Hi ngu mati gwadi mavbanyelo nya gukhodwe gwanu, ni gu dzi garadza gwanu khu lihaladzo, ni gutiya gutumbani gwanu mu gu nago khu Pfhumu yathu Jesu Kristo, mbeli ga Nungungulu Babe wathu.

⁴ Vandruye, ethu hi ngu dziti gukhethu Nungungulu a di mi hathani khu lihaladzo.

⁵ Khu guralo, ethu hi dita mi tivisa Mahungu nya Yadi nasiri khu gu ganela basi, aholu khu tshivba nya Liphuvbo nya Guage, ni gu tiyiswa nya gungi. Mu ngu dziti edzi hi nga dzi vegisago khidzo vbakari gwanu, khu lihaladzo lanu.

⁶ Enu mu khade giwonelo gyathu ni gya Pfhumu, khu gu dzumelani magana yaye, khu gutsaka nya Liphuvbo nya Guage, ambari mu nga bani mu nari ni sigaradzo.

⁷ Khu kharalo, mu khade giwonelo ga vakhodwa vatshavbo va Makedhoniya ni va Akaya.

⁸ Gukhugela khavbo gwanu, mahungu ya Nungungulu ma di phalalega tigoni gwatshavbo ga Makedhoniya ni Akaya, gukhodwa gwanu ga Nungungulu gu di pwala malangani yatshavbo, khu isoso kha gu vbwetegi gu ganela gambe gimbe gilo.

⁹ Khu guralo, vatshavbo va gu ganela khu mahakhelo mu nga hi hakhani khayo ni gu digani vanungungulu nya malipha, mu thumela Nungungulu nya guvbanye, nya lisine.

¹⁰ Olu, na mu gu lindrela guwuya ga Mwanaye, Jesu, khu Ndzadzini, oyu a mu wusidego khu ga vafudego, a na hi vbulugisa ga libango li na gutago.