1 Vakorinto 7 - Bhibhiliya Nya Guage

Milayo nya dzegano nya vakhodwa

¹ Olu, nya gu vbweta gu ganela khu mahungu yale mu nga nyi lovelani: Gwadi mwama gumba dzega nyamayi.

² Aholu khu kota nya wubhayi, mwama ni mwama a na khale ni mwangadzi waye, nyamayi ni nyamayi nuye ni mwama waye.

³ Mwama a na ninge mwangadzi waye esi si gu fanelo nya nayo nya dzegano, anuye nyamayi a na gire kharato ga mwama waye.

⁴ Mwangadzi kha fumeli givili gyaye, kholu gya gu lumba mwama waye. Khidzo gambe kharato, mwama kha fumeli givili gyaye, kholu gya gu lumba mwangadzi waye.

⁵ Mwama ni ngadzi mu nga bombelani, vbavbandze nya gupwananeni gumba tshangana matshigu nya gukari, khu gufela gu dzi ningela milombeloni. Na ma vbede matshigu yoyo, tshanganani gambe, gasi mu si sengwi khu Sathane khu kotani nya gumba dzi phara gwanu.

⁶ Nya gu ganela esi khu gu mi tsetsa, aholu khandri nayo.

⁷ Khu yangu mawonelo, nyi di gu gola gukheni vathu vatshavbo va vbanya nga eni. Aholu, muthu ni muthu a na ni giningwa gyaye, a ningidwego khu Nungungulu: Oyu ningidwe egi, mumbe a ningwa gile.

⁸ Aholu ga vale va si gu dzegigo mwendro gu dzegwa, nyi ngu, kheni: Gwadi va khale kha nga edzi nyi vbanyago khidzo eni.

⁹ Aholu, va gumba kodza gu dzi phara, va na dzege mwendro gudzegwa, kholu i tshukwana gudzega mwendro gudzegwa, guvbindra gu dzi hodzedzela khu gu dogorela.

¹⁰ Gasi vale va dzeganego, nyi ngu va laya, nasiri eni, aholu khu lina la Pfhumu, gukheni, nyamayi a nga huli mwama waye.

¹¹ A gu khuga pangoni ga mwama waye, a nga dzegwi khu mumbe; a na khongotelane ni mwama waye. Mwama nuye a nga huli mwangadzi waye.

¹² Gasi ava vambe, nyi ngu va embela eni, nasiri Pfhumu, kheni: Mwama nya mukristo a gu ni mwangadzi a si gu mukhodwa, aholu a dzumelago gu vbanya naye, a nga mu digi.

¹³ Anuye nyamayi nya mukristo a gu ni mwama a si gu mukhodwa, aholu a dzumelago gu vbanya naye, a nga mu digi.

¹⁴ Kholu, mwama a si gu mukhodwa a ngu agiswa khu gukhodwa ga mwangadzi waye. Anuye nyamayi a si gu mukhodwa a ngu agiswa khu gukhodwa ga mwama waye. Nasiri guralo, sanana sanu si di hadza gu velegedwa gighohoni, aholu si agisidwe.

¹⁵ Ambari ulo, wule a si gu mukhodwa, a gu dzina gu khuga pangoni, a na khuge. Kharato, ndriyathu nya mwama mwendro nya nyamayi a na tshulega vbadzeganotunu gwawe, kholu Nungungulu a hi ranede guvbanya khu gurula.

¹⁶ Kholu u na dziti kharini, uwe nyamayi, gukhuwe u na vbanyisa mwama wago? Mwendro wa gu dziti kharini uwe mwama gukhuwe u na vbanyisa mwangadzi wago?

Gutshulega ha gu gu mana ga Kristo

¹⁷ Muthu ni muthu khu edzi a ningidwego khidzo, a na vbanye nga edzi a nga bani a gu vbanya khidzo gikhati a ranidwego khu Nungungulu. Khiso nyi hevbudzago ga mabandla yatshavbo.

¹⁸ Oyu a ranidwego na hanide wugwera, a nga dzi garadzi khu gu vbweta gu futa wugwera waye. Ni oyu a ranidwego na sa hana wugwera, a nga dzi garadzi khu gu hana wugwera.

¹⁹ Gu hana wugwera khandri gilo, gumba hana wugwera gambe khandri gilo. Igyo gi gu igyo khu gu landrisa milayo ya Nungungulu.

²⁰ Muthu ni muthu a na simame ni mavbanyelo a nga bani ari nawo gikhati a ranidwego khu Nungungulu.

²¹ U ranidwe nuri khumbi? U nga theli kota khiso. Aholu, wa gu dzi kodza gu tshulega wugumbini momo, dzi tshule.

²² Kholu oyu a ranidwego khu Pfhumu nari khumbi, ata khodwa ga Kristo, khade muthu nya gutshulege; a gu lumba Pfhumu. Ni wule a ranidwego khu Pfhumu nari muthu nya gutshulege, khade khumbi ya Kristo.

²³ Enu mu dzegisidwe khu tengo nya wungi; mu nga dzi girini gambe dzikhumbi nya vathu.

²⁴ Vandruye, muthu ni muthu a na simame gu khala mbeli ga Nungungulu kha nga edzi a nga bani a gu vbanya khidzo.

²⁵ Gasi khu mahungu nya vale va si gu dzegigo mwendro gu dzegwa, nyi mwalo nayo nya guningwe khu Pfhumu. Ambari ulo, nyi na ninga wusingalagadzi wangu nya mwama nya gutumbege khu wuhindzi wa Pfhumu.

²⁶ Eni nya gu wona nari gwadi gu khala kharato khu kota nya sigaradzo nya guvbanye ga mafuni momu.

²⁷ Wa gu bani u hungidwe khu nayo ni mwangadzi wago, u nga dwaneli gu dzi tshula. Wa gu bani uri mwalo nyamayi; u nga mu vbweti.

²⁸ Ambari ulo, wa gu dzega khu ghohi gilo. Nyamahegyane nya likendzi a gu dzegwa kha ghohi. Aholu avo va dzegwago va na mana sigaradzo nya singi nya guvbanye nya lipango. Nyi di gola gu mi vbulugisa ga sigaradzo soso.

²⁹ Vandruye, nyi ngu mi embelani gukheni, matshigu madugwanana. Gukhugela olu, ava va gu ni vagadzi va na vbanye nga khwatshi va mwalo vagadzi;

³⁰ avo va lilago, nga khwatshi kha va lili; avo va nengelago, nga khwatshi kha va nengeli; ava va rengago, nga khwatshi va mwalo gilo;

³¹ ni ava va thumisago dzithomba nya mafu, nga khwatshi kha va dzi thumisi. Kholu makhalelo nya mafu yaya ma ngu vbindra.

³² Nya gu gola mu vbanye na mu tshulegide sigaradzoni. Kholu oyu a gu mwalo lipango, a gu thela kota khu silo sa Pfhumu, a gu dzi garadza khu gukhuye a na nengedzisa kharini Pfhumu.

³³ Gasi oyu a gu ni lipango, a gu thela kota khu silo nya mafu, a dzi garadza khu gukhuye a na nengedzisa kharini mwangadzi waye.

³⁴ A gu khala na kabanegide. Khidzo gambe kharato, nyamayi a ngamba dzegwa, ni nyamahegyane nya likendzi va gu thela kota khu silo sa Pfhumu gasi va khale va nya guaga milini ni hefemuloni. Aholu nyamayi a dzegidwego a gu thela kota khu silo nya mafu, a gu dzi garadza khu gukhuye a na nengedzisa kharini mwama waye.

³⁵ Nya gu mi embela silo sesi khu gufela gu mi phasa, nasiri gu mi tshunganisa. Nya gu mi yeyedza esi si gu sadi, si lulamidego, gasi mu thumela Pfhumu khu myonyo yanu yatshavbo.

³⁶ Oyu a pwago dzitshoni khu gu wona gyagadzyana gyaye a gi tumbisidego na gi gu vbindredwa khu tanga nya gudzegwe, a na gire esi a golago monyoni gwaye; a gu dzegana nagyo kha ghohi.

³⁷ Aholu, oyu a sambanyidego khu monyo ni mapimo yaye yatshavbo, na gu dzipwa gukhuye a na dzi phara, gwadi a si dzegi nyamahegyane.

³⁸ Khu kharato, Oyu a dzegago nyamahegyane a ngu gira gwadi; gasi oyu a si dzegigo a ngu gira gwadi ngudzu guvbindrisa.

³⁹ Nyamayi a dzegidwego hungidwe khu nayo na nga gu vbanya mwama waye. A gufa mwama waye, nyamayi tshulegide; a ngu dzi kodza gu dzegwa khu mwama a munago. Egi gi vbwetegago basi khu gu a dzegwe khu mwama nya mukhodwa, nayoni wa Pfhumu.

⁴⁰ Aholu, khu mawonelo yangu, a diri gwadi nyamayi yoyu a si dzegwi gambe. Aya mawonelo yangu; nyi ngu khodwa gukheni nya gu ganela neni khu tshivba nya Liphuvbo nya Guage li guromo gwangu.