1 Vakorinto 5 - Bhibhiliya Nya Guage

Mahungu nya wubhayi libandlani nya vakhodwa

¹ Gu pwade ndruma khu mahungu nya wubhayi wu guromo vbakari gwanu, wubhayi nya guthise wu si tidwigo ambari khu va nya mayigo; gupwani moyo wanu dzegide mwangadzi wa babe waye.

² Ambari ulo mu tade khu matshandza, wulanga nya gugaradzegeni khu silo soso, mu tutumisa muthu a girago ndzilo nya nga iyoyo.

³ Eni ambari nyi gu mwalo vbafuvbi, nyi womo vbakari gwanu khu hefemulo, gambe nyi mu lamude muthu a girago silo soso nya guthise ngudzu gukhwatshi nyi womo vbafuvbi.

⁴ Khu lina la Pfhumu yathu Jesu girani tshangano enu gumogo ni hefemulo wangu, gasi, khu tshivba ya Pfhumu yathu Jesu Kristo,

⁵ hi ningele mwama yoyo ga Sathane, gifela gu pfhungumudwa givili gyaye, mwendro saye wu na vbanyiswa hefemulo waye, litshigu Pfhumu a natago.

⁶ Gu dzi zundza gwanu khandri gwa gilo. Ina mwa gu hangwa khu gukhenu melana wudugwana wu ngu gugumugisa wuguvbi watshavbo, gani?

⁷ Dzudzugani hwindzo mela wa gale nya gighoho, mufela gu khala vathu vaphya, nya guvbelele khu wuwadi; mu na khala sibaba nyambana mela, kholu Kristo, Nvutana yathu nya Phasika, songidwe.

⁸ Khavbo avbo, hongoleni hi gire buzo yoyu, nasiri khu mela wa gale, nasiri khu mela nya livengo ni guvivba, aholu khu mela nya ndruda ni lisine.

⁹ Nyi mi embede khu lidangalila nyi nga mi lovela gukheni mu nga thangi wupari ni vathu nya sibhayi.

¹⁰ Kha nyiri kheni mu hambane ni vathu vatshavbo va gu sibhayi mafuni, mwendro va nya lidiwo, ni dzimbafa, ni va nya guphasela sithombe nya vanungungulu nya malipha; nari guralo mu di hadza gu rura mafuni momu.

¹¹ Gasi eni nyi mi lovede gukheni mu si thangini wupari ni wule a gukhuye mukhodwa ga Kristo nari muthu nya wubhayi, nya lidiwo, nya guphasele vanungungulu nya malipha, nya guvale, ni guleva ni guba. Muthu nya nga yoyo mu nga hodzelani naye, ambari gu khala naye meza mweyo.

¹² Ina i fanelo yangu gulamula avo va guromo vbavbandze, gani? Mu na ni fanelo nya gulamule ava va guromo ndrani nya libandla.

¹³ Aholu Nungungulu khuye a na va lamulago ava va guromo vbavbandze nya libandla. Muthu yoyo nya guvivbe mu duseni vbakari gwanu.