1 Vakorinto 4 - Bhibhiliya Nya Guage

Thumo wa Vapostoli

¹ Gu vbwetega vathu va hi wone kha nga sithumi sa Kristo hi ningidwego thumo nya gutivise ni gu sayisa misihalo ya Nungungulu.

² Fanelo nya githumi gambe khu gu khala na gi tumbegide ga Pfhumu yaye.

³ Gasi eni kha nyi theli kota gu lamudwa khu enu mwendro gulamudwa khu mufumo nya vathu va tigoni; ni eni mune kha nyi dzi lamuli nyabune.

⁴ Eni kha nyi dzipwi na nyiri ni nandru wa gilo. Ambari ulo, kha nyi dzi woni nga muthu nya ndruda. Pfhumu khuye a nyi lamulago.

⁵ Khavbo avbo, mu nga tutumeli gu lamula gi si gu vbohi gikhati. Virelani Pfhumu a wuye. Uye khuye a nata wenengedzago esi si sihadego gidemani, ni gu funungula esi si sihadego myonyoni nya vathu. Khavbo avbo, muthu ni muthu a na ningwa khu Nungungulu wuzundzo wu mu fanelago.

⁶ Vandruye, nyi ganede silo sesi na nyi gu thula eni ni Apolo khu kotani gwanu, gasi mu hi wone kha nga giwonelo, mu hevbulela khavbo gupima magana ma gukhayo: “U nga vbindrisi avba gu lovidwego khu Nungungulu,” gasi a si manegi ni moyo wanu a dzi gugumugisago khu gutsakela muhevbudzi moyo a nyenya mumbe.

⁷ Kholu, khu mani a nga gu ninga gu khala khongolo ga vakwanu? Iso u gu naso khandri u di ningwa, gani? Khu ginani u dzi gugumugisago gukhwatshi esi u gu naso khandri u di ningwa khu Nungungulu.

⁸ Enu olu mu naso satshavbo mu si vbwetago! Mu khade sitetema! Mawako nari pwani mwa gu khala dzipfhumu khu lisine, gasi ethu nethu hi kodze gu fuma nanu.

⁹ Kholu nya gupimisa gukheni Nungungulu vegide ethu vapostoli gu khala wulanga nya mahegiso, khwatshi hi vathu va lamuledwego gufa; hi khade mabhemba ga litigo, ga dzingilozi, ga Nungungulu ni ga vathu.

¹⁰ Ethu hi handrugide khu kotani ya Kristo, gasi enu mu gengede khu ga Kristo! Ethu hi vbede tshivba, enu mu nayo; enu mu ngu ningwa githawo, ethu ha gu nyenywa.

¹¹ Kala na muhuno, ethu hi va gu saniseka khu ndzala ni lidora, hi na ni wuhagadzo, hi ngu veteledwa, hi valegalegi nyambana gaya,

¹² hi ngu dzi garadza khu gu thuma khu mandza yathu. Va gu hi vala, ethu ha gu va kategisa; va gu hi tshanisa, ethu ha gu timisela;

¹³ va gu hi tsorodzela, ethu ha gu va hakha khu gwadi. Ni olu, ethu ha gu wonwa kha nga ndzilo nya litigo, kha nga vathu nya gunyenyeze guvbindra vathu vatshavbo.

¹⁴ Khandri nya gu mi lovela silo sesi khu gufela gu mi thela dzitshoni, aholu nya gufela gu mi luleka kha nga sanana sangu nya sigodwa ngudzu.

¹⁵ Kholu ambari mu mana mazana ni mazana nya vahevbudzi nya wukhodwa, gima kha mu na mana vababe nya vangi. Kholu eni kheni nyi mi velegidego gukhodwani ga Kristo khu gu mi tivisa Mahungu nya Yadi.

¹⁶ Khavbo avbo, nyi ngu mi embela gukheni khalani vapizani vangu.

¹⁷ Khu kotani nya kharato, nyi rumede guta iyo gwanu Thimoti, gyanana gyangu nya gigodwa gi tumbegidego ga Pfhumu. Uye a nata mi dundrugisa milayo nya mavbanyelo ya vale va khodwago ga Kristo, milayo nyi gimbilago nyi hevbudza malangani ni mabandlani gwatshavbo.

¹⁸ Vambe vbakari gwanu va di ghiya va dzi gugumugisa khu gu alakanya gukhavo gima kha nyi na ngata gambe iyo gwanu.

¹⁹ Aholu nyi nata iyo gwanu nugunugu, nyamba hwela, Nungungulu a gu nyi phasa. Khavbo nyi nata wonago, nasiri magana ya ava va dzi gugumugisago, aholu mithumo yawe.

²⁰ Kholu Mufumo wa Nungungulu khandri wa gu ganedwa khu magana basi, aholu khu mithumo.

²¹ Ginani mu hathago: Nyita ni mboma, mwendro nyita ni monyo nya gutale khu lihaladzo ni wuwadi?