1 Vakorinto 3 - Bhibhiliya Nya Guage

Vaphasedzeli thumoni wa Nungungulu

¹ Gasi eni, vandriyangu, kha nya dzi kodza guganela ga enu nga edzi nyi olovelago gu gira ga vale va gu na ni Liphuvbo. Nyi di ganela nanu nga vathu va mafuni, nga sanana ndzilani nya guti Kristo.

² Nyi di mi sedza mahwe. Kha nya mi ningani guhodza nya gutiyele; kholu mu di si gu kodzi gu midza, kha nga gambe ni olu mu si gu kodzigo,

³ kholu mu nga gu vbanya kha nga vathu va mafuni momu basi. Olu gu manegago wufu ni mayunga vbakari gwanu, ina kha gu yeyedzi gupwani mu nga gu vbanya nga vathu nya mafu, gani? Khandri mwa gu vbanya kha nga avo, gani?

⁴ Kholu muthu a gukhuye: “Eni nyi wa Pawulo” mumbe, khuye: “Eni nyi wa Apolo,” khandri mwa gu vbanya kha nga vathu nya mafu, gani?

⁵ Gasi ginani Apolo? Pawulo ginani? Sithumi basi; enu mu hakhide gukhodwa khu thumo wawe. Kholu moyo ni moyo nya ethu a gu thuma esi a ningidwego gu thuma khu Pfhumu.

⁶ Eni nyi yade, Apolo thedzede mati, aholu, Nungungulu khuye a dandrisago.

⁷ Khu kharato, oyu a yalago khandri gilo, ni oyu nuye a thedzelago mati khandri gilo; vbavbandze basi ga Nungungulu a gu uye a dandrisago.

⁸ Gu mwalo guhambana ga oyu nya guyale ni oyu nya guthedzele mati. Ambari ulo, muthu ni muthu a na hakhiswa mayelano khu thumo waye.

⁹ Kholu ethu hi sithumi hi thumago gumogo ni Nungungulu, gasi enu mu lithembwe la Nungungulu, mu nyumba a vbahago Nungungulu.

¹⁰ Khu wuhigo nyi ningidwego khu Nungungulu, nyi zamide gu thuma gwadi kha nga muvbahi a wu pimago thumo. Nyi kembide gwadi giseketelo nyi tadza khokhweni, gasi oyu a khusago nyumba mumbe. Aholu muthu ni muthu a na pime edzi a vbahago khidzo.

¹¹ Kha dzi kodzi muthu gu vega gimbe giseketelo vbavbandze nya egi gi vegidwego: A gu uye Jesu Kristo.

¹² Vbatshani nya giseketelo gegi muthu a gu vbaha khu ndralama, khu parata, khu siwindri nya lisima, khu misimbo, khu mwasi mwendro khu dzitshava;

¹³ thumo wa muthu ni muthu wu na wonegiswa ga vatshavbo, litshiguni la Pfhumu. Kholu, litshigu lolo li na wonegiswa khu nilo, nilo wu na lingedzela gutiya nya thumo wa muthu ni muthu.

¹⁴ Thumo muthu a wu vbahidego vbatshani nya giseketelo gegi, wa gu tiya, muvbahi wakone a na hakha tshatshazelo.

¹⁵ Gasi wule thumo waye wu na tsagamago khu nilo, gima kha na hakha tshatshazelo. Uye wurumba waye a na vbanya, aholu kha nga muthu a vbindrago khu vbakari nya nilo.

¹⁶ Ina kha mu dziti gukhenu mu Nyumba ya Nungungulu ni gukhenu Liphuvbo la Nungungulu li ngu vbanya ndrani gwanu, gani?

¹⁷ Muthu a gu pfhungumula Nyumba ya Nungungulu, Nungungulu a na mu pfhungumula nuye. Kholu, Nyumba ya Nungungulu yi agide, enu khenu nyumba yoyo.

¹⁸ Muthu a nga dzi pfhadzi abune: Oyu vbakari gwanu a dzipwago gukhuye gengede khu magengelelo nya wuthu, a na dzi gire gipumbu, khavbo a na khalago muthu nya guti khu lisine.

¹⁹ Kholu guti nya vathu va mafuni gu wonega nari wupumbu mahoni ga Nungungulu. Milowo nya Guage yari, khiyo: “Nungungulu a gu kona va nya guti, khu mano yawe.”

²⁰ Wumbe wulanga gu lovidwe gambe pwani: “Pfhumu a nguti maalakanyo ya va nya gugengela, a ngu mati gukhuye maalakanyo nya liphanga.”

²¹ Khu kharato, muthu a nga dzi khusedzi khu muthu kwawe, kholu satshavbo sa gu lumba enu;

²² Gani Pawulo, gani Apolo, gani Khefasi, gani khu litigo, gani khu gufa, gani khu guvbanya, gani khesi hi gu naso, gani khiso si nga gutago; satshavbo khyanu,

²³ enu mu va Kristo, Kristo khwa Nungungulu.