1 Vakorinto 16 - Bhibhiliya Nya Guage

Miningelo nya guphasedzele vakhodwa va Jerusalema

¹ Khu mahungu nya miningelo nya guya phasedzele khiyo vakhodwa va Jerusalema, girani nenu kha nga edzi nyi leletedego khidzo mabandla nya vakhodwa va tigoni ga Galatiya.

² Khu litshigu nya guhegule nya sumana, muthu ni muthu a na kase gipandre nya silo a thumidego ndrani nya sumana a si vega khu phuvbo ndrangani gwaye, gasi mu siti gira mihengo khu gu bani nyi vbohide.

³ Khu gikhati gyogyo, nyi nata rumela vama mu na va hathago, va hongola Jerusalema ni lidangalila nya gu va bikele khilo, va yisa miningelo yoyo.

⁴ Gambe gwa gu wonega nari gwadi gu hongola neni, nyi nata hongola navo.

Pawulo na ni gikungo nya gu endrele mabandla

⁵ Eni nyi nata iyo gwanu hwane nya gu na nyi vbindride khu Makedhoniya nyi na vbindrago khiyo liendroni momu.

⁶ Sa gu kodzega nyi nata khala nanu matshigwana nya gukari kala gi guvbindra girame, mufela guta nyi phasa khu gu nyi vbelegedza omu nyi vbwetago gu hongola.

⁷ Kha nyi vbweti guvbindra basi khiyo gwanu. Nyi ngu tumba gukheni, Nungungulu a gu phasa, nyi nata khala nanu gikhati nya gyadi.

⁸ Aholu nya gu alakanya gu khala dhoropani ga Efeso kala khu buzo nya Pentekosta,

⁹ kholu nya gu wona na yi vbohide nango nya guthume thumo nya khongolo wu ningago mihandro nya yadi, ambari nyi manago valala nya vangi.

¹⁰ A gu vbindra khiyo gwanu Thimoti, mu hakheni gwadi apwa gutshamba vbakari gwanu, kholu uye womo nuye thumoni wa Pfhumu kha nga eni.

¹¹ A nga manegi ni moyo wanu nya gu mu kanyise. Aholu mu phasedzeleni khu esi si vbwetegago, a kodze gu simama liendroni gwaye nya guwuye eno gwangu, kholu eni ni vandruye hi womo hi khedzisela uye.

¹² A gu bani ari khu mahungu ya ndriyathu Apolo, nyi mu khongotede ngudzu gukheni ate iyo gwanu gumogo ni vambe vakhodwa, aholu uye kha dzina guta olu, a nata gya gu vboha gikhati nya gyadi.

Sileletelo nya guhegise ni malosedzela

¹³ Khendzugani mu tiya gukhodwani, mu gira nga vama, mu dzi ninga tshivba.

¹⁴ Thumani silo satshavbo khu lihaladzo.

¹⁵ Vandriyangu, nyi na ni gimbe gileletelo nyi vbwetago gu mi ninga. Mu ngu litini lipango la Sitefane a gu uye a nga phela khuye gu hakha gukhodwa tigoni ga Akaya, vatshavbo va ngu dzi ningedzela gu thumela vakhodwa.

¹⁶ Landrisani sihevbudzo sawe ni sa vambe va va phasedzelago gu thumela libandla.

¹⁷ Nyi nengede ngudzu guta holedwa khu Sitefane ni Foritunato ni Akayiko, va dzudego va ta nyi tshima lidora nyi gu nalo nya gu mi wone.

¹⁸ Va nyi tangadziside ngudzu, kha nga va nga mi tangadzisago nenu. Khavbo avbo, mu na ni fanelo nya gu va ningeni githawo.

¹⁹ Mabandla nya vakhodwa ya Aziya ma ngu mi losedzela. Akila ni Piriska va ngu mi losedzela ngudzu gumogo ni vakhodwa va tshanganago ndrangani gwawe;

²⁰ ni vakhodwa vatshavbo va tigoni momu va ngu mi losedzela navo. Losanani khu gyanu khu besu nya wundruye.

²¹ Eni Pawulo, nyi ngu mi rumela malosedzela nya gulowe khu mandza yangu.

²² Muthu a gu mwalo lihaladzo ga Pfhumu a na vadwe: “Maranatha” (Delu Pfhumu)!

²³ Makategwa ya Pfhumu yathu Jesu Kristo ma na khale ga enu.

²⁴ Hakhani gukhathala gwangu khu enu mwatshavbo linani ga Jesu Kristo.