1 Vakorinto 1 - Bhibhiliya Nya Guage

Magana nya gulose

¹ Eni Pawulo, nyi ranidwego khu gugola ga Nungungulu gasi nyi khala mupostoli wa Jesu Kristo, gumogo ni ndriyathu Sositene,

² ha gu lovela Libandla la Nungungulu li guromo dhoropani ga Korinto, enu mu ranedwego gu khala sihathwa, mu agisidwego khu gutshanganiswa gumogo ni Kristo Jesu. Ha gu lovela gambe ni vatshavbo vale va phalalegidego ni litigo latshavbo va lombelelago khu lina la Pfhumu yathu Jesu Kristo, a gu Pfhumu yawe navo.

³ Wuhigo ni gurula gwa Nungungulu, Babe wathu ni gwa Pfhumu yathu Jesu Kristo gu na khale ni enu.

Gubonga

⁴ Wutshigu ni mihani nya gubonga Nungungulu khu kotani gwanu, khu wuhigo a mi ningidego linani ga Kristo Jesu.

⁵ Khu gutshanganiswa ni Kristo, enu mu fumisidwe khu siningwa satshavbo, ngudzungudzu khu siningwa nya guganele ni guti mahungu ya Nungungulu.

⁶ Kholu, wu tiyisidwe gwanu wufakazi nya mahungu ya Kristo,

⁷ khu kharato, gi mwalo giningwa nya wuhigo gi mi kenelelago, enu mu guromo vbakari nya gukhevisele guwuya ga Pfhumu yathu Jesu Kristo.

⁸ Khuye gambe a na mi tiyiselago kala mahegiso, gasi muta manwa na muri mwalo gihoso litshiguni la Pfhumu yathu Jesu Kristo.

⁹ Tumbegide Nungungulu a mi ranidego guta vbanya gumogo ni Mwanaye, Jesu Kristo, Pfhumu yathu.

Guhambana ndrani nya libandla la Korinto

¹⁰ Vandriyangu, nyi ngu mi lombani khu lina la Pfhumu yathu Jesu Kristo, gukheni: Pwananani, mu ganela gilo gimwegyo; gu nga manegi guhambana vbakari gwanu; hengelani mapimo ni monyo moyo.

¹¹ Nya gu ganela kharati, vandruye, kholu nyi ngapwago ni va na Kolowe gupwani mwa gu vbanya khu gu ganedzisana vbakari gwanu.

¹² Pwani moyo ni moyo nya enu wari, khuye: “Eni nyi wa Pawulo!” Mumbe, khuye: “Eni nyi wa Apolo!” Mumbe, khuye: “Eni nyi wa Khefasi!” Mumbe, khuye: “Eni nyi wa Kristo!”

¹³ Gasi uye Kristo kabanisedwe khu sipandre, gani? Uye Pawulo a di khokhothedwe vbagihambanotunu afela enu, gani? Mwendro sanu mu bhapatisidwe linani ga Pawulo, gani?

¹⁴ Nyi ngu bonga Nungungulu kholu nyi ngamba bhapatisa muthu vbakari gwanu, vbavbandze ga Krisipo ni Gayo basi.

¹⁵ Kharato, mwalo a na gukhuye bhapatisidwe linani gwangu.

¹⁶ Nyi bhapatiside nilo lipango la Sitefane, vbavbandze nya ava, kha nyi dundrugi gukheni nyi bhapatiside mumbe muthu.

¹⁷ Kholu Kristo kha nyi rumela gu gimbila nyi bhapatisa, aholu a nyi rumede gu gimbila nyi tivisa Ivhangeli, nasiri khu maregerelo nya wugengeli, gasi gumba vbungula tshivba nya gihambano gya Kristo.

Kristo khuye tshivba ni guti ga Nungungulu

¹⁸ Kholu, mahungu nya gutivise gufa ga Kristo vbagihambanotunu ma gu wonwa kha nga wupumbu khu vale va belago khu ndzila yi yago gumbembani; gasi ethu hi guromo ndzilani nya guvbanyiswe, gukhethu tshivba ya Nungungulu.

¹⁹ Kholu Milowo yari, khiyo: “Nyi na fuvisa guti ga va nya guti, nyi na mwalalegisa wugengeli wa va nya gugengela.”

²⁰ Vomo hayini va nya guti? Vomo hayini va nya sihevbulo? Vomo hayini vale va yitigo misihalo yatshavbo ya mafuni momu? Ina Nungungulu kha yeyedza gukhuye guti nya vathu va mafuni wupumbu, gani?

²¹ Kholu, vathu, khu guti gwawe, kha va dzi kodza gutugula Nungungulu mithumoni yi yeyedzago guti gwaye. Khu kharato, Nungungulu dzinide gu vbanyisa vale va khodwago khu mahungu nya wupumbu hi tivisago.

²² Kholu Vajudha va gu lomba siliwugiso, Vagreki va gu vbweta guti.

²³ Gasi ethu ha gu tivisa Kristo a khokhothedwego vbagihambanotunu. Mahungu yaya ma gu khunguvanyisa Vajudha, ma wonwa kha nga wupumbu khu vale va si gu Vajudha.

²⁴ Aholu, vale a va ranidego, gani Vajudha gani va nya mayigo, va gu ma wona kha nga tshivba ni guti gwa Nungungulu.

²⁵ Lisine, kholu egi gi wonegago ga Nungungulu kha nga wupumbu, gi na ni guti guvbindra guti gwatshavbo nya vathu, ni igyo gi gu khwatshi gi mwalo tshivba gi na ni tshivba guvbindra tshivba nya vathu.

²⁶ Olu dundrugani gwadi, vandruye, gukhenu mu diri giemo muni gikhati mu ranidwego. Khu mapimelo nya wuthu, vadugwana va ranidwego nari va nya guti, ni sitetema, ni va nya gudugela dzindrangani nya wufumu.

²⁷ Aholu, Nungungulu hathide esi vathu va si wonago kha nga wupumbu, afela gu kona va nya guti; Nungungulu hathide esi vathu va si wonago siri mwalo tshivba, afela gu tshisa vbavbatshi va nya dzitshivba.

²⁸ Nungungulu hathide silo nya nyalidede niso nyamba phasa gilo tigoni, gasi afela gu tshisa vbavbatshi iso si wonegago gukhwatshi si na ni lisima.

²⁹ Kharati, mwalo na moyo a na dzi kodzago gu dzi gugumugisa mbeli ga Nungungulu.

³⁰ Aholu hi tshanganisidwe ni Jesu Kristo, a gu uye a khadego guti gwathu. Khu tshivba ya Kristo hi giridwe vathu nya gululame mahoni gwaye, hi giridwe vathu va Nungungulu, hi dzegisidwe wugumbini nya gighoho.

³¹ Khu magirelo yoyo, kha nga idzo yi ganelago Milowo nya Guage, khiyo: “Oyu a vbwetago gu dzi khusedza, a na dzi khusedze khu esi Pfhumu a girago.”