1 Thimoti 3 - Bhibhiliya Nya Guage

Siguruvedzo sa vathangeli nya libandla

¹ La gu ganela lisine lito leli li gukhilo, muthu a gu dogorela gu phara thumo nya guthangele libandla, hathide thumo nya wadi.

² Kholu, muthangeli gu vbwetega muthu a lulamidego, mwama nya wadi nya gurule a gu ni nyamayi moyo basi, a dzi pharago, a gengedego, a kodzago gu hakha vapfhumba ni gu hevbudza.

³ Oyu a si dzi ningedzeligo wadwani, ambari gudwanisa, aholu, a kodzago gu timisela, a si vegigo likhulo, a siri mugoli nya dzitsapawu.

⁴ Oyu a kodzago gu fumela ndranga yaye, a kodzago gu hevbudza githawo sanana saye.

⁵ Kholu, muthu a gumba kodza gu sayisa ndranga yaye, a na kodza kharini gu phara libandla la Nungungulu?

⁶ Kha gu vbwetegi oyu a gu muphya gukhodwani, a nga dzi khusedza a gu thega gighohoni gya Sathane.

⁷ Gu vbwetega muthu a ningwago githawo ambari khu vambe vathu va walo, gasi a si solegi a thegela naphwini wu riyidwego khu Sathane.

Vadhiyakoni

⁸ Khu magirelo ya mamowo, Vadhiyakoni navo gu vbwetega vari vathu va zundzegago ni gu ganela lisine, va si dzi ningedzeligo wadwani, ni maalakanyo nya guvbwete wutetema,

⁹ gu vbwetega va vbanye sihalo nya gukhodwe khu mapimo nya lisine.

¹⁰ Avo navo va na hegule khu gu khedzwa, khu hwane nya avbovbo, gya gumba manega gihoso, va ngu fanela gu phela thumo wawe.

¹¹ Vanyamayi navo, gu vbwetega vale va lulamidego, va gu mwalo milembo, va dzi pharago, va tumbegago ga silo satshavbo.

¹² Mudhiyakoni, gu vbwetega oyu a gu ni nyamayi moyo basi, a gu babe a dzi kodzago gu sayisa sanana saye ni ndranga yaye.

¹³ Kholu vale va na thumago gwadi, va na mana wuzundzo nya wukhongolo, va kodza gu ganela na va tiyide mahungu nya gukhodwe ga Kristo Jesu.

Sihalo nya wukhodwa wathu

¹⁴ Nya gu gu lovela silo sesi na nyi gu tumba gukheni nyi nata khu guvbiredza nyita wonana nago.

¹⁵ Aholu, nya gu hwela, khala nu gu dziti gukhuwe gu vbweta u khala makhalelo muni Nyumbani ga Nungungulu, a gu libandla la Nungungulu a vbanyago, a gu lidingo ni giseketelo nya lisine.

¹⁶ Sihalo nya gukhodwe hi ganelago khuwo, khu lisine, khongolo: “Uye a di dzi gira muthu, a wonwa na lulamide khu Liphuvbo la Nungungulu a wonwa khu dzingilozi dza Nungungulu, a huweledwa ga va nya mayigo, a hakhwa mafuni gwatshavbo, va khodwa gwaye mafuni a dhumiswa khu Nungungulu.”