1 Thimoti 2 - Bhibhiliya Nya Guage

Gu gira nombelo khu vathu vatshavbo

¹ Guhegula, nya gu lomba gukheni milombelo ni gu lomba ni gulombelela ni gubonga yi na giredwe vathu vatshavbo ga Nungungulu,

² khu vafumeli ni vathangeli nya mufumo gasi hi vbanye khu gurula, hi khalega gwadi, khu githawo gyatshavbo ni gululama.

³ Khidzo gu vbwetegago khidzo. Khidzo a dzinago Nungungulu, Muvbanyisi wathu.

⁴ Uye a gu vbweta gukhuye vathu vatshavbo va vbanye ni guti lisine,

⁵ kholu womo Nungungulu moyo basi, ni Mutshanganisi moyo a tshanganisago Nungungulu ni vathu, khu Jesu Kristo a gu muthu nuye,

⁶ a nga ningelago guvbanya gwaye khu gufela gu vbanyisa vathu vatshavbo. Khayo Mahungu ma khalago wufakazi, ma vegidwego khu gikhati gyakone.

⁷ Khiso nyi nga emisedwa ga iso, gu khala muganeli ni mupostoli, ni muhevbudzi, gasi gu hevbudza va nya mayigo gukhodwa ni lisine. Nya gu ganela lisine, kha nyi ganeli malipha.

Vale va thangelago nombelo nya libandla

⁸ Khu kharato, nya gu vbweta vama vatshavbo va gira nombelo, ni wevbini wulanga, va khusedza mandza ma agidego nyambana likhulo ni wukhusu.

⁹ Khu magirelo ya mamowo gu vbweta vanyamayi va ambala myendra yi yelago, khu githawo ni gu dzi phara, va nga dzi mburisi khu gu lugela ndzudzu, ni gu ambala ndralama ambari maniya ni dziphera ni myendra nya seda.

¹⁰ Va na ambale nga edzi gu yelago khidzo vanyamayi, va dzi garadze khu gu tsakisa Nungungulu khu mithumo ya yadi, kha nga edzi gu lombago khidzo ga vanyamayi va khodwago.

¹¹ Gikhati nya sihevbulo, vanyamayi va na degule, vapwe, va dzi nogisa.

¹² Kha nyi dzumeli nyamayi a hevbudza ambari gu ruma vama, aholu, a na khale khu gurula,

¹³ kholu Nungungulu guhegula a di vanga Adhamu, khu hwane nya gikhati khavbo a nga vangago Evha.

¹⁴ Oyu a nga thega mugusengwani a hambana ni nayo, khandri Adhamu, khu nyamayi, nyamayi khuye a nga sengwa, a gu hambanisa Nayo wa Nungungulu.

¹⁵ Aholu, nyamayi a na vbanyiswa khu gu velega sanana, ni guvbanya khu gukhodwa ni lihaladzo ni githawo ni gu dzi phara.