1 Samuweli 4 - Bhibhiliya Nya Guage

Vafilistiya va ngu pala va na Israyeli

¹ Magana ya Samuweli ma di phalalegiswa tigoni gwatshavbo gwa Israyeli. Israyeli a di duga a khinga Vafilisitiya, gasi guya dwana navo. Va diya zumba Ebhenizeri, Vafilisitiya va zumba Afeka.

² Vafilistiya va di dzi dongisela guya dwana ni va na Israyeli, gu di phela litunga, Israyeli a di padwa khu Vafilisitiya, va nga songago gipimo nya magumana mazana (4000) vama, ndrani nya litunga.

³ Avbo va widego lizumbotunu vale va nga tshalago, madhota ya Israyeli ma di ganela, khayo: “Khu ginani Pfhumu Nungungulu a hi digidego muhuno hi padwa khu Vafilisitiya? Hongoleni Silo hi ya dzega Ngasa nya gidzumeledzwano gya Pfhumu Nungungulu, gasi Uye a manege vbakari gwathu, a hi vbulugisa mandzani ga valala vathu.”

⁴ Khavbo avbo, va di rumela vathu gu hongola Silo guya dzega Ngasa nya gidzumeledzwano ya Pfhumu Nungungulu nya Tshivba Yatshavbo, a khalago vbatshani nya dzikerubhimi. Sanana sa sivili sa Eli, Hofini ni Fineya, va diromo vbale va sayisa Ngasa ya Nungungulu.

Gudzegwa ga ngasa nya gidzumeledzwano ni gu songwa ga Fineya ni Hofini

⁵ Avbo Ngasa nya gidzumeledzwano ya Pfhumu Nungungulu yi nga vbohago vbalizumbotunu, vatshavbo va na Israyeli va di womba mikulungwane nya yikhongolo khu litsako, gu nga ndrendremelago ni mafu.

⁶ Vafilistiya, na va pwide, va di khavo: “Wa gu tshamusela ginani kulungwane wowo nya wukhongolo wu pwalago lizumboni gwa Vahebheru?” Va di tugula gukhavo, Ngasa ya Pfhumu Nungungulu yi nga vboha lizumboni.

⁷ Vafilistiya va di tala khu hwanga, va ganela, khavo: “Nungungulu wawe vbohide lizumboni. Libango lathu! Kala ni olu gima gu si gu pwali silo nya gufanane ni esi.

⁸ Libango lathu! Khu mani a na hi vbulugisago mandzani ga vanungungulu vava nya tshivba? Khavo vanungungulu vovo va nga bayisa Vagipiti khu mitungu yatshavbo nya guhambanelane giwulani.

⁹ Tiyani longo, enu Vafilisitiya! Khalani vama, mu nga tshuka mu khala dzikhumbi dza Vahebheru, kha nga avo va gu dzikhumbi dzanu. Khu guralo, tiyani mu dwana nyimbi.”

¹⁰ Khavbo avbo, va di phela litunga; va na Israyeli va di padwa, vatshavbo va di tutumela gu hongola magaya gwawe. Gusongetedwa gu diri gungi ngudzu, avbo gu nga songwago gipimo nya magumararu magumi mazana (30.000) vama va na Israyeli.

¹¹ Ngasa ya Nungungulu yi di wandrwa, gu songwa sanana sa sivili sa Eli, Hofini ni Fineya.

Gufa ga Eli

¹² Ga litshigu lolo la limwedo, mwama moyo nya lihundzu la na Bhejami, a di vbuluga nyimbitunu, a thava , a hongola tigoni ga Silo, guambala gwaye na gu pferugede, hungoni na gu kunede khu kudzudzwane.

¹³ Gikhati a vbohidego, Eli a di khade vbagikhalotunu gwaye, vbafuvbi ni ndzila, na vbisegide monyo khu kotani nya Ngasa ya Nungungulu. Mwama na bede dhoropani, a di phalalegisa gitiviso khu maphuvbo yatshavbo, vathu vatshavbo va di womba huwa khu tshivba ni tshivba.

¹⁴ Eli, na pwide dzihuwa, a di wudzisa, khuye: “Huwa nya pfilupfilu yi pwalago, ginani gi nga dugelelago?” Khu gikhati gyogyo, mwama a di hidzimela vbafuvbi ga Eli aya mu tivisa iso si nga dugelelago.

¹⁵ Eli a diri ni tanga nya livbandre na mana magumi ni livbandre na miraru myaga nya guvelegwe gwaye; maho yaye ma di si woni gambe.

¹⁶ Mwama wule a di embela Eli, khuye: “Eni kheni nyi nga duga khu vbakari nya litunga nyi vbuluga khu gututuma muhuno kamwe.” Eli a di mu wudzisa, khuye: “Gasi ginani gi nga gu dugelela, mwanangu?”

¹⁷ Khavbo avbo, uye a nga bani a gu resa mwango a di mu embela, khuye: “Israyeli padwe a tutuma mbeli ga Vafilisitiya, gu songidwe vathu nya vangi ngudzu, gumogo ni sanana sago sa sivili, Hofini ni Fineya, avo navo va songidwe; Ngasa ya Nungungulu yi dzegidwe khu valala.”

¹⁸ Avbo a nga ganelago khu mahungu yaya nya Ngasa ya Nungungulu, Eli a di thega khu nyagihwane khu vbagikhalotunu, vbafuvbi ni lidimba a fanyega thamo afa, kholu uye a di bani a gumbide ni guena; uye khade mulamuli wa va na Israyeli magumana myaga.

¹⁹ Avbo ngadzamwane waye, ngadza Fineya a nga bani nari ni mimba, na ma vboha matshigu yaye nya guhefemule, na pwide magana yaya nya gupwani Ngasa ya Nungungulu yi dzegidwe khu valala ni gupwani nasale waye ni mwama waye va fude, a di phedwa khu gulumwa a hefemula khu guvbiredza; aholu uye a di simama ni giluma nya guhefemule.

²⁰ Avbo a nga vbweta gufa, vanyamayi va nga bani va mu randrede va di mu embela, khavo: “Tiyisela kholu u velegide gyanana nya gikhwathana.” Aholu uye kha va hakha, ambari gukhathala khu gilo.

²¹ Uye a di riya lina gyanana gyaye khuye khigyo Ikabhoni, kholu a di khuye: “Wu vbede wudhumo wa Israyeli. Uye a di ganela esi, khu kotani nya Ngasa ya Nungungulu yi nga bani yi dzegidwe ni kotani ya nasale ni mwama waye va nga songwago.”

²² A di engedza gambe, khuye: “Wudhumo wa Israyeli wu hongode, kholu Ngasa ya Nungungulu yi dzegidwe.”