1 Samuweli 31 - Bhibhiliya Nya Guage

Gu songwa gwa Sawule

¹ Khavbo avbo, Vafilisitiya va di dwana ni va na Israyeli, vama va na Israyeli va di thava va tutuma mbeli ga Vafilisitiya, va di sasedwa mugigomoni gya Gilibhowa.

² Vafilisitiya va di lundra Sawule gumogo ni sanana saye, va songa Jonatane, Abhinadhabhi ni Malikisuwa, sanana sa Sawule.

³ Nyimbi yi di vbisa ngudzu ga Sawule; a di wonwa khu va nya siholoma, va mu yela, uye a di thava a ndrendremela khu hwanga.

⁴ Khavbo, Sawule a di embela muphari nya matshari yaye, khuye: “Homola litshari lago u nyi paya khilo, gasi nyi siti paywa khu va nya misutu vava, va bwelo va hagana khu girumbi gyangu.” Aholu muphari nya matshari yaye, kha dzumela gu gira isoso, kholu a di gu thava ngudzu; khavbo avbo, Sawule a di dzega litshari laye a dzi rinya vbatshani gakone.

⁵ Avbo muphari nya matshari yaye, a nga wonago nya gukhuye Sawule fude, a di dzi rinya nuye vbatshani nya litshari laye afa gumogo naye.

⁶ Khu kharati, Sawule a difa ni sanana saye sa siraru gumogo ni muphari nya matshari yaye, masotshwa yaye yatshavbo ma fude nayo khu litshigu lile gumogo naye.

⁷ Avbo va na Israyeli, va nga bani va romo khu phuvbo ga kovani ga khisikheyi ga Joridhani, va nga wonago gukhavo va na Israyeli va padwe va tutuma, ni gu wona gukhavo Sawule fude gumogo ni sanana saye, va di duga khu madhoropani va tutuma va thava. Va dita Vafilisitiya va ta vbaha umo.

Lithowo la Sawule

⁸ Khu mindru ga kone, avbo Vafilisitiya va ngatago guta phanga sirumbi, va dita tugula Sawule ni sanana saye sa siraru na va thegide mugigomoni gya Gilibhowa.

⁹ Va di pila hungo wa Sawule, va phanga matshari yaye; va di rumela myango tigoni gwatshavbo ga Vafilisitiya, ni gu bika mahungu nya maphya dzinyumbani ga vanungungulu wawe ni ga vathu vatshavbo va tigoni gwawe.

¹⁰ Va di vega matshari ya Sawule, nyumbani ga Asitaroti, nungungulu nya nyamayi, girumbi gyaye va gi vbayega vbalibhiyotunu la Bheti-Seyani.

¹¹ Avbo vavbanyi va Jabhesi-Gileyadhi, va nga pwago esi, Vafilisitiya va nga girelago Sawule,

¹² va di khuga vama vatshavbo nya dzindrena, va gimbila wutshigu watshavbo, vaya dusa girumbi gya Sawule gumogo ni sirumbi sa sanana saye vbalibhiyotunu la Bheti-Seyani, va wuya naso Jabhesi vata si vbisa iyo.

¹³ Va di dzega marambo yakone, vata ma dzinga vbavbatshi nya simbo nya riva dhoropani ga Jabhesi, va hala livbandre na mavili matshigu.