1 Samuweli 30 - Bhibhiliya Nya Guage

Zikalagi a ngu phangwa khu Vaamaleki

¹ Na gu vbindride matshigu mararu, avbo Dhavhidhe a nga vboha dhoropani ga Zikalagi ni vathu vaye, Vaamaleki va di bede khu phuvbo ga Marandzi, va sasela lidhoropa la Zikalagi gumogo ni gu livbisa khu nilo.

² Va di dzegide vanyamayi va nga bani na vari umomo va va gira dzikhumbi; mwalo va nga mu songago, nya va dugwane mwendro nya vakhongolo; va di va dzega basi va hongola navo.

³ Dhavhidhe a dita dhoropani gumogo ni vathu vaye, va ta li mana na li gu vbisidwe, vagadzi vawe, sanana sawe nya sikhwathana ni vanyamahegyane vawe, va di dzegidwe va girwa dzikhumbi.

⁴ Khavbo avbo, Dhavhidhe gumogo ni vathu a nga bani nari navo, va di khusa lito va lila kala va vbeledwa khu tshivba nya gulile.

⁵ Vagadzi va vavili va Dhavhidhe, avo navo va di dzegidwe va khala dzikhumbi; a gu ava: Ahinohani, muzezeri ni Abhigayili, ngadza Nabhali, mukarimeli.

⁶ Dhavhidhe a di vbisega ngudzu, kholu vathu va di gu ganela khu gu mu pfara khu siwindri, kholu vatshavbo va di guvbisegide ngudzu khu mahungu nya sanana sawe nya sikhwathana ni vanyamahegyane vawe; aholu Dhavhidhe a di dzi tiyisela khu tshivba ya Pfhumu Nungungulu waye.

Dhavhidhe a ngu vbulugisa dzikhumbi

⁷ Dhavhidhe a di embela muphasi nya mhamba Abhiyatari, mwamana wa Ayimeleki, khuye: “Nyi resele avba keka nya miphaso.” Abhiyatari a di mu yisela.

⁸ Khavbo avbo, Dhavhidhe a di wudzisa ga Pfhumu Nungungulu, khuye: “Nyi ngu yela gu lundra tsawa yoyu nya sighevenga, gani? Nyi na va mana, gani?” Khavbo avbo, Pfhumu Nungungulu a di mu hakha, khuye: “Va landre, kholu nyi ngu tiyisa gukheni u na va mana u tshudzisa vatshavbo.”

⁹ Khu guralo Dhavhidhe a di khuga nari ni livbandre na limwedo mazana (600) vama, aya vboha gitsongwanani gya Bhesori, va di ta ema avbo ga avo va nga bani na va tshade hwane.

¹⁰ Khu guralo, Dhavhidhe a di simama gu va landra nari ni mazana mana vama; ava vambe nya mazana mavili va di tshala hwane khu kotani nya gugarale, kha va dzi kodza gu tshatuga gitsongwana gya Bhesori.

¹¹ Va di mana lidzaha nya Mugipiti moyo thembweni va mu dzega va mu resa ga Dhavhidhe; va di mu ninga guhodza a hodza, va mu ninga mati a sela.

¹² Va di mu ninga gambe gipandre gimwegyo nya gitsatsa nya dzindzawa nya gubange ni sitsatsa sivili nya dziuvha nya gubange, a hodza; na hodzide, a di wuyisa tshivba yaye, kholu a di khade matshigu mararu wutshigu ni mihani nyamba hodza ni gu sela.

¹³ Khavbo avbo, Dhavhidhe a di mu wudzisa, khuye: “U mwamana wa mani, wa guta khu evbini?” Lidzaha nya Mugipiti li di hakha, khilo: “Nyi lidzaha limwedo nya Mugipiti, nyi githumi gya moyo nya Muamaleki, mune wangu a nyi digide avba, gikhati nyi phedwego khu gudwala, gu vbindride matshigu mararu.

¹⁴ Hi di hongode hi ya sasela phuvbo ga Marandzi wa Vakereti, ni litigo la Judha gumogo ni Marandzi wa Kalebi, hi rotha nilo dhoropani ga Zikalagi.”

¹⁵ Dhavhidhe a di mu wudzisa, khuye: “U ngu kodza gu nyi dzega u nyi vbelegedza ga tsawa yoyo nya sighevenga, gani?” Lidzaha li di mu hakha, khilo: “Sambanya mbeli ga Nungungulu, gukhuwe khu na nyi songa ambari guya nyi ningela mandzani ga mune wangu, nyi na gu vbelegedza kala iyo gwawe.”

¹⁶ Avbo lidzaha li nga relelago gu vbelegedza Dhavhidhe, Vaamaleki va di phalalegide ni gipandre nya litigo, na va gu hodza ni gu sela, na va gu tsakela thomba nya yingi va nga yi wandra tigoni ga Vafilisitiya ni ga Judha.

¹⁷ Dhavhidhe a di va sasela ga litshigu li landrelago, gukhugela dzimindrudzile kala gupfola lidambo. Mwalo ni moyo wawe a nga vbulugago, vbavbandze basi ga mazana mana nya madzaha ma nga khilela dzingameriya ma thava.

¹⁸ Dhavhidhe a di dzega satshavbo iso Vaamaleki va nga bani va wandride, a tshudzisa gambe ni vagadzi vaye va vavili.

¹⁹ Gimwalo gi nga hamugegago ambari esi nya sikhongolo niso nya sidugwana, sikhwathana ni vanyamahegyane, ambari iso nya guphangwe, ga satshavbo si nga bani si phangidwe, Dhavhidhe a di si wuyisa satshavbo.

²⁰ Dhavhidhe a di phanga gambe ni mitshambi nya dzinvuta ni dzimombe dza Vaamaleki. Avo va nga bani vari ni mitshambi va di thanga mbeli ga Dhavhidhe, khavo: “Owu khu pfimba wa Dhavhidhe.”

Dhavhidhe a ngu vega nayo nya gukabane pfimba

²¹ Avbo Dhavhidhe a nga vbohago ga vama vale nya mazana mavili va nga rereka khu gugarala va tshala gitsongwanani gya Bhesori, avo va di duga va khinga Dhavhidhe gumogo ni vathu a nga bani nari navo; Dhavhidhe, a di hidzimela vbafuvbi gwawe aya wuselana navo, gasi guti guvbanya gwawe.

²² Aholu vbakari nya vathu va nga bani va hongode nyimbitunu ni Dhavhidhe, gu diri ni vathu nya guvivbedwe khu monyo nya sanana sa Bheliyali, va di hakha, khavo: “Olu va nga tshala va si hongoli ni ethu, kha va yeli gu ningwa phango hi phangidego; gasi olu, muthu ni muthu, a na dzege mwangadzi waye ni sanana saye a hongole.”

²³ Dhavhidhe a di hakha, khuye: “Vandriyangu, mu nga girini kharato, esi silo hi di ningwa khu Pfhumu Nungungulu, a nga hi sayisago a hi ninga mandzani gwathu tsawa nya sighevenga si ngata hi sasela.

²⁴ Khu mani a yelago gu yingisa isoso mu ganelago? Hatshavbothu hi yede gu kabana pimo moyo, uye a hongodego nyimbitunu ni oyu a tshadego ni mirwalo, pimo moyo hatshavbo.”

²⁵ Khu kharati, gukhugela khu litshigu lile guya mbeli, gu di hungwa kharato, wu khala nayo wu tiyidego tigoni ga Israyeli kala na muhuno.

²⁶ Avbo Dhavhidhe a nga vbohago Zikalagi, a di rumela phango ga madhota ya Judha, ni ga dzipari dzaye, a va embela, khuye: Hakhani giningwa gegi nya phango hi phangidego ga valala va Pfhumu Nungungulu;

²⁷ ga va na Bheli, ga va na Ramoti wa Negebhi, ga va na Jatiri,

²⁸ ga va na Aroweri, ga va na Sifimoti, ga va na Esitemowa,

²⁹ ga va na Rakali, ga vale va nga bani na vari madhoropani ga Vajerameyeli ni madhoropani ya Vakeni,

³⁰ ga va na Horima, ga va na Bhorasani, ga va na Atasi.

³¹ Ga va Hebroni ni ga malanga yatshavbo a vbindridego khumo Dhavhidhe, ni vathu vaye.