1 Samuweli 28 - Bhibhiliya Nya Guage

Sawule a ngu wudzisa ga mwama nya liwoni wa Eni-Dhori

¹ Khu matshigu yale, avbo Vafilisitiya va nga tombanisa masotshwa yawe guya nyimbitunu, gasi guya dwana ni va na Israyeli, Akisi a di embela Dhavhidhe, khuye: “Khala nu gu dziti nya gukhuwe uwe gumogo ni vathu vago, mu na duga gumogo ni masotshwa yangu.”

² Khavbo avbo, Dhavhidhe a di hakha Akisi, khuye: “Gululamide, u na si wona wabune iso si na gu girwago khu githumi gyago.”

³ Khu gikhati gyogyo, Samuweli a di fude, va na Israyeli vatshavbo va di gu lila Samuweli na va mu dzingide dhoropani a nga velegedwago umo; Sawule a di lundride vatshavbo va nya wunyanga ni va nya dzisolo.

⁴ Vafilisitiya va di tombana va ta zumba Sunemi; Sawule nuye a di tombanisa va na Israyeli, va ta zumba Gilibhowa.

⁵ Avbo Sawule a nga wonago lizumbo nya Vafilisitiya, a di khala hwanga, a ndrendremela ngudzu.

⁶ Sawule a di wudzisa Pfhumu Nungungulu, aholu Pfhumu Nungungulu, kha nga mu ninga phindrulo ambari khu ndroro, dzisolo mwendro khu vaprofeti.

⁷ Khavbo avbo, Sawule a di embela sithumi saye, khuye: “Nyi vbweteleni nyamayi a gu na ni sikwembu, gasi nyi ya mu wudzisa.” Sithumi saye si di mu embela, khiso: Womo nyamayi moyo tigoni ga Eni-Dhori a gu ni liphuvbo nya gusasule.

⁸ Sawule a di tshula guambala gwaye nya wufumu, a dzi siha a ambala gumbe, a dzega vama vavili, a hongola navo ga nyamayi wule ni vbawutshigutunu; aya mu embela, khuye: “Nya gu gu lomba gukheni sikwembu sago si nyi sasuve gasi guti mwendro nyi ngu yela gu hongola ga wule nyi na gu embelago lina laye.”

⁹ Khavbo avbo, nyamayi a di mu hakha, khuye: “U ngu siti gwadi esi a giridego Sawule, idzo a nga fuvisa khidzo tigoni dzinyanga ni va nya dzisolo; khu ginani u dembelago womi wangu gasi gu nyi songa?”

¹⁰ Khavbo avbo, Sawule a di sambanya khu lina la Pfhumu Nungungulu a ganela, khuye: “Nyi ngu sambanya khu lina la Pfhumu Nungungulu a vbanyago gukheni, gimwalo ni gimwegyo gitsayiso gi na gu gu dugelelago khu kotani nya isoso.”

¹¹ Khu guralo, nyamayi a di mu embela, khuye: “Nyi gu ranela mani khu mahungu yoyo?” Uye a di mu hakha, khuye: “Nyi ranele Samuweli?”

¹² Avbo nyamayi a nga wonago Samuweli, A di huwata khu lito nya gukhugege a embela Sawule, khuye: “Khu ginani u nga nyi kanganyisago? Uwe khuwe kamwe Sawule.”

¹³ Mufumeli a di mu hakha, khuye: “U nga thavi; ginani u gi wonago?” Khavbo Nyamayi a di hakha Sawule, khuye: “Nya gu wona mumbe nungungulu na gu khuga khu mafuni a gwela.”

¹⁴ A di mu wudzisa, khuye: “Khwa giemo muni?” Nyamayi a di mu hakha, khuye: “Muthu nya gugumbe a gwelago na fumbedwe khu mwendra nya gulaphe.” Sawule a di dzegela gutugula gukhuye khu Samuweli, a di noga khovbe yaye vbavbatshi a khidzima.

¹⁵ Samuweli a di embela Sawule, khuye: “Khu ginani u nyi garadzago khu gu nyi wusa?” Khavbo avbo, Sawule a di khuye: Nya gu tshaniseka ngudzu khu mahungu ya Vafilisitiya va nyi dwanisago, Nungungulu a nyi digide, olu kha nyi ningi gambe phindrulo, ambari khu thumo nya vaprofeti, ambari khu dzindroro; khiso nyi gu ranidego khiso, gasi u nyi tulela iso nyi yelago gu gira.

¹⁶ Samuweli a di mu embela, khuye: Khu ginani u nyi wudzisago, narigu Pfhumu Nungungulu a gu digide a vbindrugedza a khala nala wago?

¹⁷ Kholu Pfhumu Nungungulu a gu girede esi a ganedego khu kanani gwangu; duside mufumo mandzani gwago, a wu ningela ga mubangaladzi wago Dhavhidhe.

¹⁸ Kholu uwe khwa yingisa gilo lito la Pfhumu Nungungulu, gambe khwa thuma iso a gu leletedego gikhati a gorogedego Vaamaleki, khu guralo, Pfhumu Nungungulu, a gu girede esi muhuno.

¹⁹ Pfhumu Nungungulu a na ningela nuye Israyeli gumogo nago mandzani ga Vafilisitiya, mindru, uwe gumogo ni sanana sago mu na bani na muri ni eni; Pfhumu Nungungulu a na ningela lizumbo la Israyeli mandzani ga Vafilisitiya.

²⁰ Sawule, a di dzegela gu thega khu guvbiredza huye labalaba vbavbatshi na tade khu hwanga nya wukhongolo khu kota nya magana ya Samuweli; a di vbela tshivba, kholu lidambo latshavbo ni wutshigu watshavbo wule, kha nga hodza gilo.

²¹ Nyamayi a di hidzimela ga Sawule, na mu wona gukhuye a ngu thava ngudzu, a di mu embela, khuye: “Wona nya gukhuwe githumi gyago gi yingiside lito lago, nyi rengiside ni womi wangu, nyi landrisa iso u nga nyi embelago.

²² Khu guralo, olu, yingisa nuwe magana ya githumi gyago, u dzumela gi gu vegela guhodzanyana gu dugwana mbeli gwago, u hodze, gasi u kodze gu mana tshivba nya gukhuge u hongola liendroni gwago.”

²³ Aholu uye a di bomba a mu embela, khuye: “Kha nyi na hodza gilo.” Aholu sithumi saye gumogo ni nyamayi va di mu khongotela; uye a di dzumela. Uye a di khuga vbavbatshi a khala vbadawutunu.

²⁴ Nyamayi a diri ni gimombyana nya gunone; a di gi songa a gi vbiredzisela a suga wuguvbi, a gi phula ni sibaba nyambana mela.

²⁵ A di si resa mbeli ga Sawule ni sithumi saye, va di hodza. Khu hwane, va di khuga va hongola ni wutshigu wowo kamwe.