1 Samuweli 27 - Bhibhiliya Nya Guage

Dhavhidhe vbakari ga Vafilisitiya

¹ Khu guralo, Dhavhidhe a di pimisa khu monyoni gwaye, khuye: “Limbe litshigu nyi na tshukha nyi thegela mandzani ga Sawule; kholu, gimwalo nya gyadi nyi na gi girago vbavbandze nya guthavele tigoni ga Vafilisitiya; gasi Sawule a garala khu gu nyi landrelela ga sipandre satshavbo sa Israyeli; khu kharati nyi na vbuluga mandzani gwaye.”

² Dhavhidhe a di khuga ni masotshwa yaye nya livbandre na limwedo mazana (600) vama, vaya luvela ga Akisi, mwamana wa Mahoki, mufumeli wa Gati.

³ Dhavhidhe gumogo ni masotshwa yaye va di ya vbanya ni Akisi. Dhoropani ga Gati, moyo ni moyo ni ngamo yaye; Dhavhidhe nari ni vagadzi vaye vatshavbo, a gu Ahinohani, muzereyeli ni Abhigayili, noni ya Nabhali, mukarimeli.

⁴ Sawule na tivisidwe gupwani Dhavhidhe thavede Gati, a di diga gu mu landrelela.

⁵ Dhavhidhe a di embela Akisi, khuye: “Nya gu bani nyi manide wuhigo mahoni gwago, nyi ninge wulanga ga limwedo nya madhoropa nya litigo leli, gasi nyi vbanye umo; khu ginani githumi gyago gi na vbanyago nago dhoropani nya wufumu?”

⁶ Khavbo avbo, Akisi a di mu ninga ga litshigu lile, lidhoropa la Zikalagi. Khu kotani nya isoso, Zikalagi a gu lumba vafumeli va Judha, kala ni muhuno.

⁷ Gikhati gyatshavbo Dhavhidhe a vbanyidego tigoni nya Vafilisitiya gipimo nya mwaga ni migima mina.

⁸ Dhavhidhe gumogo ni masotshwa yaye, va di gu dhumela vagesuri, vagerisi ni Vaamaleki; kholu ava khu gale va diri avo vavbanyi nya litigo li khugelago Telani, khu phuvbo ga Suri, kala tigoni ga Egipito.

⁹ Dhavhidhe a di gu sasela litigo lile, nyamba tshiya mwama mwendro nyamayi, a di dzega dzinvuta, dzimombe, dziburu, dzingameriya, gumogo ni guambala; na gu wuya ga Akisi

¹⁰ Avbo Akisi a nga bani a gu wudzisa, khuye: “Gasi muhuno mu di gu sasela hayi?” Dhavhidhe a di hakha, khuye: “Hi di sasela Marandzi ga Judha, Marandzi ga Vajerameli ni Marandzi ga Vakheni.”

¹¹ Dhavhidhe a di si tsetseleli, a di songa vama ni vanyamayi, kholu a di thava gukhuye va nga vbohisa magana yaya Gati, va ta mu thuledza, khavo: “Dhavhidhe a di gu gira esi.” Egi a diri giolovedzo gyaye khu matshigu yatshavbo a khadego tigoni ga Vafilisitiya.

¹² Akisi a di gu tumba ngudzu Dhavhidhe, na gu alakanya gukhuye: “Dhavhidhe a dzi girede livengo tigoni gwawe ga Israyeli; uye a na khala githumi gyangu kala gupindruga.”