1 Samuweli 23 - Bhibhiliya Nya Guage

Dhavhidhe a ngu tshudzisa vathu va Keyila

¹ Dhavhidhe a di embedwa gupwani Vafilisitiya va ngu dhumela Keyila ni gu phanga sithala.

² Dhavhidhe a di wudzisa Pfhumu Nungungulu, khuye: “Nyi hongola nyi ya sasela Vafilisitiya, gani?” Pfhumu Nungungulu a di mu hakha, khuye: “Gimbila, kholu u na ya pala Vafilisitiya, u bwelo khavbo u tshudzisa Keyila.”

³ Aholu, masotshwa ya Dhavhidhe ma di mu embela, khayo: “Ambari olu nya gukhuwe hi womo omu Judha hi pwago hwanga hi thava, si na kodzega kharini guya Keyila guya dwana ni masotshwa ya Vafilisitiya, na?”

⁴ Khavbo avbo, Dhavhidhe a di engedza a wudzisa ga Pfhumu Nungungulu; Pfhumu Nungungulu a di mu phindrula, khuye: “Dzi emisele u relela Keyila, kholu nyi na ningela Vafilisitiya mandzani gwago.”

⁵ Dhavhidhe a di hongola Keyila gumogo ni masotshwa yaye, vaya sasela Vafilisitiya, a di va pala, a dzega mitshambi yawe, va sasela ngudzu. Khu kharati, Dhavhidhe a di tshudzisa vavbanyi va Keyila.

⁶ Avbo Abhiyatari, mwamana wa Ayimeleki, a nga thavelago ga Dhavhidhe, tigoni ga Keyila, a di relela ni keka nya miphaso mandzani gwaye.

Sawule a ngu lundra Dhavhidhe

⁷ Sawule a di pwa nya gupwani Dhavhidhe hongode Keyila, a di khuye: “Nungungulu ningede Dhavhidhe mandzani gwangu, a dzi khothede abune, kholu bede ga lidhoropa li gu na ni malimba ma gu ni si kwinyaro.”

⁸ Khavbo avbo, Sawule a di rumela guya ranwa vathu vatshavbo va hongola nyimbitunu, gasi gu va hongole Keyila vaya randrela Dhavhidhe gumogo ni masotshwa yaye.

⁹ Avbo Dhavhidhe, a nga dzitigo gukhuye Sawule a ngu luga mano nya guvbwete gu mu dhumela, a di embela Abhiyatari, khuye: “Nyi resele keka nya miphaso.”

¹⁰ Khavbo avbo, Dhavhidhe a di lombelela, khuye: “Ama Pfhumu Nungungulu wa Israyeli, githumi gyago gi pwide nya gupwani Sawule a ngu vbweta gu bela tigoni ga Keyila, gasi guta khungumula lidhoropa khu kotani yangu.

¹¹ Ina kamwe u na ningela vathu va Keyila mandzani gwaye, gani? Ina kamwe Sawule a nata khu lisine, kha nga idzo githumi gyago gi dzi pwidego khidzo, gani? Ama Pfhumu Nungungulu wa Israyeli, nyi ninge phindrulo.” Pfhumu Nungungulu a di mu hakha, khuye: “Uye a nata.”

¹² Dhavhidhe a di wudzisa gambe, khuye: “Ina vathu va Keyila va na nyi ningela eni gumogo ni masotshwa yangu mandzani ga Sawule, gani?” Pfhumu Nungungulu a di hakha, khuye: “Ina va na gu ningela.”

¹³ Khavbo avbo, Dhavhidhe a di khuga khu vbale gumogo ni masotshwa yaye, khu tengo nya livbandre na limwedo mazana vama, va di duga khu dhoropani ga Keyila va hongola nyamba tidwa va guya hayi. Avbo a nga tiviswago Sawule gupwani Dhavhidhe khugide khu Keyila, a di thindreka guya mu dwanisa.

¹⁴ Dhavhidhe a di simama gu khala giwulani malangani nya likhokhola, a mana wuthavelo mavbalani nya gigomo gya Zifi. Khu litshigu ni litshigu Sawule a di gu mu vbweta, aholu Nungungulu kha nga ningela Dhavhidhe mandzani gwaye.

¹⁵ Avbo Dhavhidhe a wonidego gukhuye Sawule dugide gasi guta mu songa, a di khala giwulani gya Zifi, tigoni ga Horesa.

¹⁶ Khavbo avbo, Jonatane, mwamana wa Sawule a di kuga a hongola aya manana ni Dhavhidhe tigoni ga Horesa gasi guya mu tiyisela ni gu a tumba Nungungulu.

¹⁷ A mu embela, khuye: “U nga thavi, kholu gyandza gya babe wangu Sawule kha gi na gu mana; khu guralo, uwe u na fumela Israyeli, eni nyi na khala gyandza gyago, mahungu yoyo ambari babe wangu Sawule a ngu mati gwadi.”

¹⁸ Va vavili va di gira gisambanyo mbeli ga Pfhumu Nungungulu. Khavbo avbo, Janatane a di hongola gaya, aholu Dhavhidhe a di khala Horesa.

¹⁹ Vazifi nya gukari va di hongola vaya tivisa Sawule tigoni ga Gibheya, khavo: “Dhavhidhe womo, sihade vbakari gwathu malangani nya gusihale ga Horesa, giwulani gya Hakila, Marandzi nya giwula gya Jesimoni

²⁰ Khu guralo, olu, ama mufumeli, khu gugola gwago, u ngu dzi kodza gu relela; ethu hi dzi emisede gu mu ningela mandzani ga mufumeli.”

²¹ Sawule a di hakha, khuye: “Pfhumu Nungungulu a na mi kategise khu kotani nya gu nyi pweleni wusiwana.

²² Khu guralo, gimbilani, indrani mu ya vbwetedzela gwadi, mu tugula wulanga a olovelago gu manega avbo, ni gu khu mani a mu wonidego vbale; kholu va nyi tiviside gukhavo a na ni mano nya mangi ngudzu.

²³ Indrani mu ya wudzisela sihogo saye satshavbo a sihalago umo, mu wuya mu ta nyi ninga lisine. Khavbo avbo, nyi na hongola nanu; uye a gu bani na guromo khu lisine tigoni mule, nyi na ya mu vbweta vbakari nya mazanazana nya Vajudha.”

²⁴ Khavbo avbo, va di khuga va thangela Sawule va hongola Zifi; khu guralo, Dhavhidhe ni masotshwa yaye va diromo giwulani gya Mawomi, panini, khu phuvbo ga Marandzi ga Jesimoni.

²⁵ Khu hwane Sawule gumogo ni masotshwa yaye va di khuga va phela gu mu vbweta, Dhavhidhe na tivisidwe, a di relela ga giwindri gi romo giwulani gya Mawomi. Sawule na pwide a di lundra Dhavhidhe giwulani gya Mawomi.

²⁶ Sawule a di gu gimbila khu limbe liphuvbo, Dhavhidhe gumogo ni masotshwa yaye va di thava khu limbe liphuvbo khu guvbiredza gasi gu vbuluga mandzani ga Sawule. Avbo Sawule ni masotshwa yaye va nga bani va randrela gu mola Dhavhidhe gumogo ni masotshwa yaye.

²⁷ Khavbo avbo, wu dita mwango wu ta embela Sawule, khuwo: “Wuya khu guvbiredza, kholu Vafilisitiya va dzude guta dhumela litigo.”

²⁸ Khavbo avbo, Sawule a di diga gulundra Dhavhidhe a hongola guya dwana ni Vafilisitiya. Khu kotani nya isoso wulanga wule wu di ranwa pwani Giwindri nya mahambana.

²⁹ Dhavhidhe a di duga khu ga wulanga wule a hongola aya vbanya mugusihalani gipandre gya Eni-Gedhi.