1 Samuweli 21 - Bhibhiliya Nya Guage

Dhavhidhe a ngu hongola Nobhi

¹ Dhavhidhe a diya ganela ni muphasi nya mhamba Ayimeleki dhoropani ga Nobhi. Ayimeleki a di ndrendremela khu hwanga gikhati a mananidego naye, a mu wudzisa, khuye: “Khu ginani u tago wenga? Mwalo u ngatago naye, gani?”

² Dhavhidhe a di mu hakha, khuye: “Mufumeli a nyi ningide thumo, a nyi embela, khuye: A nga manegi ni moyo a yelago gu wuti thumo nyi gu ningago guya wu thuma. Eni nyi leletede masotshwa yangu gukheni hiya manana wulanga nya gukari.

³ Olu, ginani u gi nagyo nya gu nyi ninge nyi hodza? Nyi ninge livbandre sibaba mwendro gilogyo u gu nagyo vbafuvbi.”

⁴ Muphasi nya mhamba a di hakha Dhavhidhe, khuye: “Nyi mwalo gibaba nya guhodzwe khu vatshavbo, aholu igyo nyi gu nagyo basi gibaba nya gukategiswe; masotshwa ma gu bani ma sa hengela malawu nugunugu ni vanyamayi va ngu dzi kodza gu gi hodza.”

⁵ Dhavhidhe a di hakha muphasi nya mhamba a mu embela, khuye: “Khu lisine kha sa girega, kholu igyogyo gihena gyathu nya litshigu ni litshigu hi dugago guya nyimbitunu, kha hi khumbi vanyamayi. Sivili sa masotshwa yoyo kha sa nyenyeza. Ambari ha gu dzega liendro nya lidugwana masotshwa ma gu manega na ma agide gumogo ni sombo sawe; ahati muhuno a gu liendro nya likhongolo!”

⁶ Khavbo avbo, muphasi nya mhamba a di mu ninga sibaba nya gukategiswe, kholu si diri mwalo vbale simbe, vbavbandze nya sibaba nya miningelo, si nga bani si dusidwe mbeli ga Pfhumu Nungungulu, gasi gu tshikedzwa khu gibaba nya guvbise, ga litshigu lolo si duswago.

⁷ Moyo nya sithumi sa Sawule a di romo vbale ga litshigu lile, na gu landrisa siguruvedzo saye mbeli ga Pfhumu Nungungulu; a diri uye Dhowegi, Muedhomi, muthangeli nya vahavisi va Sawule.

⁸ Dhavhidhe a di wudzisa Ayimeleki, khuye: “U na ni giholoma mwendro litshari avba, gani? Kha nya dzega giholoma gyangu ambari ni limbe litshari, kholu guruma ga mufumeli gu diri gwa givbiredza.”

⁹ Muphasi nya mhamba a di mu hakha, khuye: “Litshari la Gholiya, Mufilisitiya wule u nga mu songago kovani ga Ela, khu li woni eli li fumbedwe umo nya mwendra khu hwane nya keka nya wuphasi; wa gu li vbweta li dzege, kholu avba li mwalo limbe vbavbandze nya ilolo.” Dhavhidhe a di ganela, khuye: “Li mwalo limbe nya guvbindre ilo; nyi ninge ilolo.”

Dhavhidhe a ngu thavela ga Akisi mufumeli wa Gate

¹⁰ Khu litshigu lile, Dhavhidhe a di wuga a thava Sawule, a hongola ga Akisi, mufumeli wa Gati.

¹¹ Aholu sithumi sa Akisi si di ganela, khiso: Gasi khandri uye oyu Dhavhidhe, mufumeli wa tigoni gwanu, gani? Khandri uye oyu va nga bani va embelela ni gu hana va ganela, khavo: “Sawule songide likhumi mazana (1.000), aholu Dhavhidhe songide likhumi magumi mazana (10.000), gani?”

¹² Dhavhidhe a di vegedza magana yaya khanani gwaye, a manega nari ni hwanga ngudzu a thava Akisi, mufumeli wa Gate.

¹³ Avbo a nga dzi vbindrugedza mapimo a dzi gira muthu nya guhandruge mbeli gwaye, a lovetela umo nya malimba nya dzinyangwa a diga dzindrura dzi sililiga ni giledzu gyaye.

¹⁴ Khavbo avbo, Akisi a di ganela ga sithumi saye, khuye: “Mu ngu wonani nya gukhenu mwama yoyu handrugide. Khu ginani mu mu residego eno gwangu?

¹⁵ Ina nya gu hamuga vathu nya guhandruge, nya gukala mu nyi reselani oyu gasi a ta thuma guhandruga mbeli gwangu, gani? Ina muthu nya nga oyu a ngu yela gu bela nyumbani gwangu, gani?”