1 Samuweli 19 - Bhibhiliya Nya GuageJonatane a ngu emela Dhavhidhe ( 1 Samuweli 18:1-4 ) 1 Sawule a di ganela ga mwanaye Jonatane ni ga vathumegeli vaye vatshavbo khu gikungu gyaye nya guvbwete gu songa Dhavhidhe. Aholu Jonatane mwamana wa Sawule, a di gu gola ngudzu Dhavhidhe. 2 Uye a di ya lembedza Dhavhidhe, a mu embela, khuye: “Babe wangu, Sawule, a ngu vbweta gu gu songa; khu guralo, mindru dzimindrudzile dzi wonele, vbweta wulanga nyamba tidwa u sihala avbo. 3 Eni nyi na duga gumogo ni babe wangu hita ema vbafuvbi ni khabini u na gu bani u sihade umo. Nyi na ganela khu mahungu yago, esi nyi na gu si pwago khavbo gwaye nyi na gu tivisa.” 4 Khavbo avbo, Jonatane a di ganela khu wuwadi wa Dhavhidhe, a embela babe waye Sawule, khuye: “Mufumeli, u nga tshuki u ghohela githumi gyago Dhavhidhe, kholu uye gimwalo a gu ghohedego, ni sigiro a giridego avbo gwago si na ni lisima ngudzu.” 5 Kha nga thava gufa, a di sasela Vafilisitiya, Pfhumu Nungungulu a tshudzisa va na Israyeli vatshavbo; uwe kamwe u si wone bwelo khavbo u nengela khiso; olu khu ginani u vbwetago gu ghoha khu gu vbaladza novba nyambana nandru, khu gu songa Dhavhidhe vbavbandze nya gighoho. 6 Sawule a di yingisa magana ya Jonatane, a sambanya, khuye: “Nyi ngu sambanya khu Pfhumu Nungungulu a vbanyago, gukheni gima kha na ngafa.” 7 Khavbo avbo, Jonatane a di rana Dhavhidhe, a mu embeledzela magana yatshavbo a nga bhulago, a mu yisa ga Sawule; Dhavhidhe a di simama gu thumela Sawule kha nga matshigu ya hwane. 8 Gu di simama gu manega nyimbi, Dhavhidhe aya dwana ni Vafilisitiya a va sasela ngudzu, va thava va tutuma mbeli gwaye. 9 Aholu liphuvbo nya guvivbe, nya gute khiyo ga Pfhumu Nungungulu, li di bwelo li bela gambe ga Sawule; uye a di khade nyumbani gwaye nari ni litshari mandzani, Dhavhidhe na gu womba gitendre gyaye. 10 Sawule a di zama gu mu paya vbandzaritunu, aholu uye a di vhika gupaywa khuye, litshari li ya paya ndzari; ni wutshigu wowo kamwe, Dhavhidhe a di khuga a tutuma a vbulugisa guralo. 11 Aholu Sawule a di rumela vathu guya ghadha ndrangani ga Dhavhidhe, gasi a mu songa vbadzimindrutunu; aholu Dhavhidhe, a di embedwa khu mwangadzi waye Mikali, khuye: “Wa gumba thava wutshigu wowu gasi guvbulugisa womi wago, mindru u nafa.” 12 Khavbo avbo, Mikali a di dusa Dhavhidhe khu gihogo, a mu reledza a thava a vbulugisa guralo. 13 Mikali a di dzega gifananiso nya nungungulu nya guvatwe mwendro gupwani (Terafi), a gi ladzisa vbadawutunu, a gi vega mihungotunu gikhuledzo nya mawoya nya phongo, a gi fenengedza khu volo. 14 Avbo va nga vbohago vathu va nga rumedwa khu Sawule gasi guta mola Dhavhidhe, Mikali a di va embela, khuye: “A gu dwala.” 15 Khavbo avbo, Sawule a diya bweledza vama vale guta ga Dhavhidhe, a va embela, khuye: “Mu rwaleni mu wuya naye eno gasi nyita mu songa.” 16 Avbo va nga wuyago vama vale, va di ta mana vbadawutunu, gifananiso nya nungungulu nya guvatwe, ni gikhuledzo nya mawoya nya phongo khu mihungoni. 17 Khavbo avbo, Sawule a di wudzisa Mikali, khuye: “Khu ginani u nga nyi kanganyisago u diga nala wangu a thava?” Mikali a di phindrula Sawule, khuye: “Uye a di khuye va gumba nyi diga nyi thava, nyi na gu songa.” Sawule vbakari nya vaprofeti 18 Khu kharati, Dhavhidhe, a di vbuluga a thava ata ga Samuweli, dhoropani ga Rama, a ta mu embeledzela satshavbo a nga giredwago khu Sawule; va khala ndrangani ga vaprofeti. 19 A di embedwa Sawule gupwani: “Dhavhidhe womo ndrangani ga vaprofeti dhoropani ga Rama.” 20 Khavbo avbo, Sawule a di rumela vathu guya mola Dhavhidhe, na va vbohide va di wona tsawa nya vaprofeti na va gu guprofeta, na va guthangedwa khu Samuweli; Liphuvbo la Nungungulu li dita ga vale va nga rumwago khu Sawule, avo navo va guprofeta. 21 Avbo a nga tiviswago esi, Sawule a di rumela vambe vathu, avo navo va di guprofeta; khavbo avbo Sawule a di rumela gambe tsawa nya wuraru, avo navo diya guprofeta. 22 Khu guhegisa a di hongola nuye abune dhoropani ga Rama, avbo a ngaya vboha namboni nya wukhongolo wu nga bani na wuri mwalo mati, a di wudzisa, khuye: “Vomo hayi Samuweli ni Dhavhidhe?” Va di mu embela, khavo: “Vomo dhoropani ga Rama, ndrangani ga vaprofeti.” 23 Khavbo avbo, a di hongola ndrangani ga vaprofeti, dhoropani ga Rama; nari ndzilani a di bedwa khu Liphuvbo la Nungungulu, a phela gu guprofeta kala a vboha ndrangani ga vaprofeti, dhoropani ga Rama. 24 Uye nuye a di tshula ngandzu yaye, a guprofeta mbeli ga Samuweli, a thega vbavbatshi, nyamba ambala gilo litshigu latshavbo ni wutshigu watshavbo; esi si ganedwago pwani: “Ina Sawule nuye moyo nya vaprofeti, gani?” |
Gitonga DC Bible © Bible Society in Mozambique, 2014.
Bible Society of Mozambique