1 Samuweli 18 - Bhibhiliya Nya Guage

Wupari wa Jonatane ni Dhavhidhe

¹ Hwane nya mabhulo yaya ya Dhavhidhe ni Sawule, Jonatane a di manega na gu gola ngudzu Dhavhidhe; Jonatane a di gola Dhavhidhe kha nga idzo a dzi golago khidzo wurumba waye.

² Gukhugela litshigu lile, Sawule a di mu dzega a khala naye, a si mu dzumedzisi gubwelela gambe gaya ga babe waye.

³ Jonatane ni Dhavhidhe va di gira gidzumeledzwano nya wupari, kholu Jonatane, a di gu gola Dhavhidhe kha nga idzo a golago khidzo hefemulo waye.

⁴ Jonatane a di tshula libhadzi a nga bani na gu ambala a ninga Dhavhidhe, gumogo ni guambala gwaye, ni litshari laye, wulaho ni libhandri.

⁵ Dhavhidhe a di gira satshavbo khu ndruda iso a nga bani na gu leletedwa khu Sawule; avbo Sawule a nga mu vega kha nga moyo nya vathangeli nya dzinyimbi dzaye. Uye a di nengedzisa vathu vatshavbo gumogo ni vathumegeli va Sawule.

Sawule a ngupwa lidiwo khu Dhavhidhe

⁶ Avbo Sawule a nga bani na gu wuya khu nyimbitunu ni masotshwa yaye, Dhavhidhe nuye na gu wuya khu gusaselatunu nya Vafilisitiya, vanyamayi va madhoropani gwatshavbo gwa na Israyeli va di khinga mufumeli Sawule, na va gu womba dzingoma va emba ni gu hana, va kulungela mbeli gwaye khu gutsaka.

⁷ Vanyamayi vovo, va di gu hana na va gu embelela, khavo: “Sawule songide likhumi mazana (1.000), Dhavhidhe songide likhumi magumi mazana (10.000).”

⁸ Sawule a di swireka ngudzu, kholu magana yaya, kha ma mu nengedzisa; a ganela, khuye: “Va ningide Dhavhidhe, likhumi magumi mazana (10.000), aholu eni, va nyi ninga basi likhumi mazana (1.000); olu gutshala basi, gu ningwa wufumu.”

⁹ Gukhugela litshigu lile guya mbeli, Sawule kha nga wona Dhavhidhe khu maho nya yadi.

¹⁰ Khu litshigu li landrelago, Sawule a di beledwa khu liphuvbo nya guvivbe nya gurumedwe khu Nungungulu, a di phela gu regerela mihamuhamu nyumbani gwaye, Dhavhidhe a di womba gitendre kha nga mambe matshigu. Khu gikhati gyogyo, Sawule a di pharide litshari mandzani,

¹¹ a li khusedza na gu ganela khu monyoni gwaye, khuye: “Nyi na paya Dhavhidhe nyi dzegela gu mupata ni ndzari.” Aholu Dhavhidhe a di mu vhika khu nyondro mbili.

¹² Khavbo avbo, Sawule a di phela gu thava Dhavhidhe, kholu Pfhumu Nungungulu, a di mu digide, a ema ni Dhavhidhe.

¹³ Khavbo avbo, Sawule a di dusa Dhavhidhe a si khali naye vbafuvbi, a mu gira muthangeli nya gikwata nya likhumi mazana masotshwa; uye a di gu duga a thangela gikwata gegi guya dwana ni gu wuya mbeli ga vathu.

¹⁴ Dhavhidhe a di dugelela ga satshavbo a nga bani na gu gira, kholu uye a diri ni Pfhumu Nungungulu.

¹⁵ Avbo Sawule a nga bani na gu wona satshavbo soso, a di khala hwanga khuye.

¹⁶ Aholu va na Israyeli ni va na Judha vatshavbo, va di gola Dhavhidhe, kholu khuye a nga bani na gu va thangela umo nya dzinyimbi dzawe.

¹⁷ Sawule a di embela Dhavhidhe khuye: “Nyi na gu ninga Merabhi nyamahegyane wangu nya matiwula a khala mwangadzi wago; gambe u fanede gu dzi yeyedza gukhuwe u ndrena nya gudwane dzinyimbi dza Pfhumu Nungungulu.” Sawule a di ganela khu monyoni gwaye, khuye: “Kha nyi vbweti gu mu songa khu mandza yangu, aholu a na songwa khu Vafilisitiya.”

¹⁸ Dhavhidhe a di phindrula Sawule, khuye: “Kheni mani eni, ambari khu mavbanyelo yangu ni ndranga ya babe wangu omu tigoni ga Israyeli, nyo kala nyi khala mwane wa mufumeli.”

¹⁹ Aholu avbo gi nga vboha gikhati Merabhi nyamahegyane wa Sawule, a nga vbweta gu ningedwa Dhavhidhe, Merabhi a di ningedwa a khala ngadza Adhiriyeli, Mumeyoli.

²⁰ Ambari khu guralo, mumbe nyamahegyane wa Sawule nya gupwani khu Mikali a di gu haladza Dhavhidhe. Va di ya embela Sawule mahungu yaya, uye ma mu tsakisa.

²¹ Sawule a di ganela, khuye: Nyi na mu ninga, a khala naphwi gasi mandza ya Vafilisitiya ma thega vbatshani gwaye. Khu guralo, Sawule a di embela Dhavhidhe, khuye: “Khoyu nya wuvili, muhuno, uwe u na khala mwane wangu.”

²² Sawule a di leletela sithumi saye, khuye: “Indrani mu ya embela Dhavhidhe khu gisihaledza, khenu: Wona nya gukhuwe mufumeli a ngu gu gola, ni ethu vathumegeli vaye hi ngu gu gola. Khu guralo khala mwane waye.”

²³ Avbo vathumegeli va Sawule va nga ganela mahungu yaya ga Dhavhidhe, uye a di va hakha, khuye: “Ina mwa gu pimisa gukhenu gu dzega gyanana gya mufumeli gilo nya guvbevbuge, gani? Avbo mu nyi wonago gukhenu eni nyi gisiwana nyambana gilo!”

²⁴ Avbo vathumegeli va ngaya embeledzela Sawule, iso a nga va hakhago khidzo,

²⁵ Sawule a di va embela, khuye: “Indrani mu ya embela esi Dhavhidhe, khenu: Mufumeli kha vbweti gukhuye u lowola, aholu a gu vbweta lizana misutu ya Vafilisitiya, yi khala gu dzi phodzela ga mufumeli ga valala vaye.” Khu magirelo yoyo, Sawule a di zama gukhuye Dhavhidhe a thegela mandzani ga Vafilisitiya.

²⁶ Avbo vathumegeli va Sawule va nga bikelago magana yaya ga Dhavhidhe, uye a di nengela gu khala mwane wa mufumeli. Na gu si gu vbohi matshigu nya dzegano,

²⁷ Dhavhidhe a di duga ni masotshwa yaye vaya songa mazana mavili (200) Vafilisitiya, a wuya ni misutu yawe, ata yi bikela ga mufumeli gasi uye a khala mwane waye. Khu guralo, Sawule a di ninga Dhavhidhe mwanaye Mikali, gasi a khala mwangadzi waye.

²⁸ Khavbo avbo, Sawule a di wona nya gukhuye Pfhumu Nungungulu womo gumogo ni Dhavhidhe; Dhavhidhe a di haladzwa khu Mikali, nyamahegyane wa Sawule.

²⁹ Khavbo avbo, Sawule, a di engedzela gu ninga githawo Dhavhidhe, aholu a di simama gu khala nala waye.

³⁰ Gikhati gyatshavbo vathangeli nya dzinyimbi dza Vafilisitiya va nga bani va duga vata dwanisa Israyeli, Dhavhidhe a di dugelela mulitungani guvbindra vathangeli vatshavbo va Sawule; khu guralo lina laye li di zundzega ngudzu.