1 Samuweli 14 - Bhibhiliya Nya Guage

Jonatane a ngu pala Vafilisitiya

¹ Tshigu mwedo Jonatane, mwamana wa Sawule, a di embela lidzaha li nga bani li phara matshari yaye, khuye: Delu, hongole tsawani nya Vafilisitiya, wu manegelago khisikheyi. Aholu kha nga embela babe waye.

² Sawule a diri vbinganoni ga Gibheya, vbavbatshi nya simbo nya romani wu nga bani wu romo Migoroni; ni vathu a nga bani nari navo, va diri tengo nya livbandre na limwedo mazana (600) vama.

³ Ayiya, mwamana wa Ayitubhi, ndruye wa Ikabhoni, mwamana wa Fineya, mwamana wa Eli, muphasi nya mhamba ya Pfhumu Nungungulu, dhoropani ga Silo, a diri ni keka nya wuphasi nya mhamba. Vathu va di si dziti gukhavo Jonatane a di hongode.

⁴ Ga dzindzila edzi Jonatane a nga vbweta gu dzi tsemakanya gasi guya manela lizumbo la Vafilisitiya, gu diri ni siwindri sivili nya sikhongolo, kheno ni eno, gimwegyo gi di guranwa gupwani, Bhozezi; gimbe gi di gu ranwa gupwani Sene.

⁵ Gimwegyo nya igyo, gi di emide khu phuvbo ga Wuronga, gi khedzana ni Makimasi; gimbe khu Marandzi, gi khedzana ni Gibheya.

⁶ Jonatane a di embela lidzaha nya muphari nya matshari yaye, khuye: “Hongole hi yela makhuna yaya; mwendro saye Pfhumu Nungungulu a na hi phasa a hi dwanela, kholu ga Nungungulu gimwalo gi gumba kodzega, uye a na hi vbulugisa khu vangi ambari khu vadugwana.”

⁷ Khavbo avbo, muphari nya matshari yaye, a di mu hakha, khuye: “Gira iso u si wonago na si gu godwa khu monyo wago; kheni oyu, nyi nago, iso u si pimisago nyi womo nago.”

⁸ Jonatane a di mu embela, khuye: “Hi naya ga vathu vale hi ya dzi wonegisa gwawe.

⁹ Va gu hi embela kharati, khavo: Emani avbovbo kala ethu hita avbo gwanu; kharalo, hi na ema avbo hi manegago, kha hi na hongola iyo gwawe.

¹⁰ Aholu va gukhavo: Deluni eno gwathu; avbovbo hi na hongola, kholu gu yeyedza gupwani Pfhumu Nungungulu a va ningede mandzani gwathu. Egi gi na bani nari giyeyedzo gwathu.”

¹¹ Khu guralo, khu wuvili wawe, va diya dzi wonegisa ga vawoneleli nya Vafilisitiya, avo va di ganela, khavo: “Kha mu va woni vale va dugago khu dziphagoni va nga bani va sihade umo.”

¹² Vama nya vawoneleli va di embela Jonatane ni muphari nya matshari yaye, khavo: “Deluni eno gwathu gasi hita mu ninga gihevbudzo!” Jonatane a di embela muphari nya matshari yaye, khuye: “Hongole, landra khu hwane gwangu, kholu Pfhumu Nungungulu a va ningede mandzani gwa va na Israyeli.”

¹³ Khavbo avbo, a di gwela khu mawundru ni mawogo na gulandredwa khu muphari nya matshari yaye; Vafilisitiya va di thega mbeli ga Jonatane, va sasedwa khu muphari nya matshari yaye khu hwane gwaye.

¹⁴ Gupala gogu nya guhegule, Jonatane ni muphari nya matshari yaye, va di songa vbafuvbi ni gu enedza tengo nya magumavili vama, a gu gipandre nya mafu nya guenedze likhumi na mavili mazana mikono.

¹⁵ Gu di manega hwanga nya wukhongolo lizumboni, wulangani nya litunga ni vbakari nya vathu vatshavbo; vbakari nya masotshwa ni vaphangi vatshavbo va di ndrendremela ngudzu gu bwelo khavbo gu tsekatseka ni mafu; satshavbo si di manega nari hwanga wutago khu ga Nungungulu.

¹⁶ Khu Gibheya ga Bhejami, vawoneleli va Sawule, va di wona masotshwa nya Vafilisitiya na ma gu tutuma ma phalalega khu maphuvbo yatshavbo, va hambana khu dzindzila.

¹⁷ Khavbo avbo, Sawule a di embela vathu a nga bani nari navo, khuye: “Sayelani vathu mu wona khu mani a hamugegago.” Va di va sayela, va wona nya gukhavo, uye a gu mwalo khu Jonatane ni muphari nya matshari yaye.

¹⁸ Sawule a di embela Ayiya, khuye: “Nyi resele ngasa ya Nungungulu, kholu khu litshigu lile yi diri ni sanana sa Israyeli.”

¹⁹ Sawule na nga guganela ni muphasi nya mhamba, pfilupfilu yi di engedzelana khu tshivba mulizumboni ga Vafilisitiya, avbo Sawule a nga embela muphasi nya mhamba, khuye: Diga isoso, u nga resi Ngasa.”

²⁰ Khavbo avbo, Sawule ni vatshavbo a nga bani nari navo va di tombana vata litungatunu; Vafilisitiya va di payana khu gyawe khu matshari, gu manega pfilupfilu nya yikhongolo ngudzu.

²¹ Vahebheru va nga bani va dzi ningede khu gale ga Vafilisitiya, va nga belago lizumboni; avo va di ta patana ni va na Israyeli va nga bani vari ni Sawule ni Jonatane.

²² Avbo vama vatshavbo va na Israyeli va nga bani va sihade musigomoni sa Efrayimi, na va pwide gupwani Vafilisitiya va tutumide, avo va di va lundra gasi guya dwana navo.

²³ Litshigu lile, Pfhumu Nungungulu a di vbulugisa va na Israyeli; litunga li di endrelega kala khisikheyi ga Bheti-Avheni.

Gisambanyo gya Sawule

²⁴ Khu litshigu lile, va na Israyeli va di guvbisega ngudzu, kholu Sawule a di gurumedza vathu khu gisambanyo gyaye, khuye: “A na vadwe wule a na hodzago li si gu pfoli lidambo, gasi nyi kodze gu dzi phodzela ga valala vangu.” Khu guralo, mwalo ni moyo a nga linga guhodza.

²⁵ Vathu vatshavbo va di bela khabini; gu di bani na guri ni wulombe na wu goga vbavbatshi.

²⁶ Avbo vathu va nga vbohago khabini, va di wona wulombe na wu gu goga; Aholu, mwalo a nga tiya gu wu dzega khu mandza a thela kanani, kholu vathu va di gu thava gisambanyo.

²⁷ Khu guralo Jonatane, kha nga bani a pwide magana ya babe waye, gikhati a nga sambanyisa vathu, a khusedza tshokha nya ndronga a nga bani nari nayo mandzani, a yi naganisa umo nya gipapu nya wulombe, a yi thela kanani, a di wuyisa tshivba nya maho yaye.

²⁸ Khavbo avbo, moyo nya musotshwa a di khuye: “Babe wago sambanyide ga vathu a ganela, khuye: A na vadwe wule muhuno a na hodzago guhodza. Khu guralo, vathu va garade ngudzu.”

²⁹ Khavbo avbo, Jonatane a di hakha, khuye: “Babe wangu vbedzide tshivba vathu va tigoni gwathu; wonani idzo maho yangu ma wonago khidzo gukhugela avbo nyi nga lingago gipandryana gidugwana nya wulombe wowu.

³⁰ Nari pwani vathu va di hodzide gipandre gidugwana nya wulombe hi wu manidego khu gu phanga ga valala vawe; ina gusasedwa ga Vafilisitiya na gu siri gukhongolo, gani?”

³¹ Khu litshigu lile, Vafilisitiya va di sasedwa gukhugela Makimasi kala Ayijalomi. Vathu va di rerekide khu ndzala;

³² va phela gu phanga dzimombe, dzinvuta, marole, va si songa vbavbatshi, va si hodza ni novba waso.

³³ Khu guralo va diya tivisa Sawule, khavo: “Vathu va ngu ghohela Pfhumu Nungungulu, khu gu hodza nyama ni novba waye.” Sawule a di va hakha, khuye: “Mu ghohide. Wumbulutelani giwindri gita avba.”

³⁴ A engedza gambe, khuye: “Phalalegani mu embela vathu vatshavbo, khenu: Muthu ni muthu a na nyi resele nvuta yaye mwendro mombe yaye, si songeni si hodzwa avba; aholu mu nga ghoheli Pfhumu Nungungulu khu gu hodza nyama ni novba waye.” Khavbo avbo, vathu vatshavbo va di resa ni wutshiguwule, muthu ni muthu a resa khu mandzani gwaye, mombe yaye vata si songa wulangani wule.

³⁵ Sawule a di vbahela Pfhumu Nungungulu giluvelo wulanga wule. Egi khu giluvelo nya guhegule a vbahedego Pfhumu Nungungulu.

Jonatane a ngu vbulugiswa khu vathu

³⁶ Sawule a di engedza gambe a ganela, khuye: “Hongoleni hi relela wutshigu wowu hi ya dwanisa Vafilisitiya, hi va phanga kala gudugani nya lidambo, hi si digi ni moyo basi a vbanye.” Vathu va di ganela, khavo: “Gira satshavbo u si wonago na si lulamide.”

³⁷ Khu guralo, muphasi nya mhamba, a di ganela, khuye: “Hongoleni hi hidzimele avba ga Nungungulu. Khavbo avbo, Sawule a di wudzisa Nungungulu, khuye: Ina nyi ngu yela gulundra Vafilisitiya, gani? U na va ningela mandzani ga va na Israyeli, gani?” Aholu ga litshigu lile Nungungulu kha nga mu ninga phindrulo.

³⁸ Khavbo avbo, Sawule a di va embela, khuye: “Va nate avba vathangeli vatshavbo nya vathu, mu tivisana mu wona, gighoho muni gi giridwego muhuno.

³⁹ Kholu nyi ngu sambanya khu Pfhumu Nungungulu, a gu mutshuli wa Israyeli, gukheni ambari nari gyanana gyangu Jonatane a nafa!” Khu guralo, mwalo ni moyo nya gidzemo a nga mu ninga phindrulo.

⁴⁰ A di embela gambe vatshavbo va na Israyeli, khuye: “Enu khalani khu phuvbo mwedo, eni gumogo ni gyanana gyangu Jonatane, hi na khala khu limbe liphuvbo.” Vathu va di mu hakha, khavo: “Gira iso u si wonago na si lulamide.”

⁴¹ Khavbo avbo, Sawule, a di embela Pfhumu Nungungulu wa Israyeli, khuye: “Hi nonedze lisine.” Sawule ni Jonatane va di modwa khu solo, va vbuluga vathu.

⁴² Sawule a di ganela, khuye: “Thesani solo khu eni gumogo ni gyanana gyangu Jonatane.” Solo yi di thegela Jonatane.

⁴³ Khu guralo, Sawule a di embela Jonatane, khuye: “Nyi embele, gasi ginani u giridego.” Jonatane a di mu embela, khuye: “Nyi di linga wulombe wudugwana khu tshokha nya ndronga nyi nga bani nyiri nayo mandzani. Nyi dzi ningede gufa.”

⁴⁴ Khavbo avbo, Sawule a di ganela, khuye: “Nungungulu a na gire iso a si wonago na si lulamide, wa gu mbafa uwe Jonatane!”

⁴⁵ Aholu vathu va di embela Sawule, khavo: “Ina Jonatane a residego guvbanyiswa gogu nya gukhongolo ga Israyeli, a ngu yela gufa, gani? Silo nya nga isoso, kha si kodzegi gu girega! Hi ngu sambanya khu Pfhumu Nungungulu a vbanyago, ni ndzudzu moyo basi wa hungoni gwaye kha wu na thega vbavbatshi, kholu iso a si giridego muhuno tshivba ya Nungungulu.” Khu guralo, vathu va di vbulugisa Jonatane gu songwa.

⁴⁶ Sawule a di diga gu lundra Vafilisitiya; Vafilisitiya va di bwelela tigoni gwawe.

⁴⁷ Avbo Sawule a nga dzega mufumo wa Israyeli, a di dwana ni valala vaye vatshavbo va nga bani va mu randrede a gu ava: Vamowabhi, Vaamoni, Vaedhomi, vafumeli va Zobha ni Vafilisitiya; gwatshavbo umo a nga bani a gimbila a dwana a di wuya na dugelede.

⁴⁸ A di dwana khu wundrena, a pala Vaamaleki, tshudziside Israyeli mandzani ga vale va nga bani va mu phanga.

Ngamo ya Sawule

⁴⁹ Sanana sa Sawule a diri Jonatane, Isivi ni Malikisuwa; malina ya sanana saye nya vanyamahegyane va vavili a diri aya: Uye nya koma a diri uye Merabhi, uye nya nandra a diri uye Mikali.

⁵⁰ Ngadza Sawule a diri uye Ayinowa, nyamahegyane wa Ayimahasi. Lina nya ndruna yaye nya nyimbi a diri uye Abhineri, mwamana wa Neri, babe dugwane wa Sawule.

⁵¹ Khisi, a diri babe wa Sawule, gasi Neri, a diri babe wa Abhineri, va diri sanana sa Abhiyeli.

⁵² Matshiguni yatshavbo nya guvbanye ga Sawule, gu manegide nyimbi nya guthise ngudzu nya gudwanisane ni Vafilisitiya; Sawule a gu wona mwama nya ndrena ni tshivba, a di mu dzega a khala waye.