1 Pedro 2 - Bhibhiliya Nya Guage

Giwindri nya guvbanye ni vathu nya guage

¹ Khavbo avbo, digani satshavbo nya guvivbe, malipha, gusengedzela, lidiwo ni milembo yatshavbo.

² Khalani nga sanana si ngari gu velegwago, mu vbweta mahwe nya liphuvbo gikhati gyatshavbo, gasi mu sela, mu dandre, mu vbanyiswe.

³ Mwa gu bani mu lingide mu pwe wuwadi wa Pfhumu

⁴ hidzimelani gwaye, a gu giwindri nya guvbanye, gi nga nyenywa khu lisine khu vathu, aholu ga Nungungulu gilo nya lisima.

⁵ Hidzimelani nenu mu dzi ningedzela ga Nungungulu, gasi a mi thumise kha nga siwindri nya guvbanye, guvbahani nya nyumba nya Liphuvbo ya Nungungulu. Nyumbani momo, enu mu womo kha nga tsawa nya vaphasi nya mhamba va agisidwego, va hathidwego gasi gu ningela miphaso yi tsakisago Nungungulu khu ga Jesu Kristo.

⁶ Kholu, isoso somo ga Milowo nya Guage yi ganelago, khiyo: “Eni nyi hathide giwindri nya lisima ngudzu; nyi gi vega Siyoni kha nga giwindri nya gikoli nya nyumba; aholu, wule a khodwago ga egi giwindri gima kha na khala dzitshoni.”

⁷ Khu guralo, ga enu mu khodwago, giwindri gyogyo khya lisima ngudzu. Aholu, ga ava va si khodwigo; “Giwindri gi nga nyenywa khu vavbahi gi khade giwindri nya gutshanganise.”

⁸ Gambe giwindri gi na gu tshunganisago vathu; giwindri gi na gu va thesago. Avo va tshunganede kholu va ngamba khodwa khu Mahungu, khiso si dongisedwego avo.

⁹ Aholu, enu mu lifumbu li hathidwego, mu vaphasi va Pfhumu, mu lihundzu li agisedwego Nungungulu, mu vathu mu lumbago uye. Enu mu hathidwe gasi mu huwelela tshivba ya Nungungulu, a mi ranidego mu duga gidemani, muta wenengedzoni gwaye nya gusamadzise.

¹⁰ Gale enu mu di siri vathu va Nungungulu, Olu mu vathu vaye; gale mu di si wuti wuhindzi wa Nungungulu, olu mu wu hakhide.

Guvbanya nga sithumi sa Nungungulu

¹¹ Dzipari dzangu nya sigodwa, dundrugani gukhenu mu valuveli, mu vawuyi ga litigo leli. Khu guralo, nyi ngu mi lomba mu dige gunavela nya wuthu gu dwanago ni hefemulo.

¹² Mavbanyelo yanu vbakari nya va nya mayigo gu vbwetega nari mavbanyelo nya yadi. Gasi va gu mi singedza guvivba, va konwe khu mithumo yanu nya yadi, va fela gu rungudza Nungungulu litshigu a natago.

¹³ Khu kotani ya Pfhumu yingelani milayo yatshavbo nya litigo; ni mufumeli kholu khuye a gu khongolo,

¹⁴ ni dzindruna dzaye a dzi vegidego gasi gu tsayisa ava va girago guvivba, ni gu zundza ava va girago iso nya sadi.

¹⁵ Kholu Nungungulu a gu vbweta gukhuye enu mu gire esi nya sadi, gasi sipumbu ni mapemi va si mani gilo nya guganele khu enu.

¹⁶ Vbanyani nga vathu nya gutshulege; mu dzega gutshulega mu gu gira gilo nya gusihe guvivba; aholu vbanyani nga sithumi sa Nungungulu.

¹⁷ Vegani githawo ga vathu vatshavbo, haladzani vandriyanu nya gukhodwe, thavani Nungungulu mu vega githawo ga mufumeli.

Giwoniso nya gusaniseke ga Kristo

¹⁸ Enu sithumi, yingelani ni gu vega githawo ga vafumeli vanu, nasiri ga avo nya vadi basi, aholu, ni ga ava nya guvivbe navo.

¹⁹ Kholu, mwa gu timisela sigaradzo khu gu dzitini gukhenu khugo guhaladza ga Nungungulu, uye a na mi kategisani.

²⁰ Kholu mwa gu saniswa khu sighoho mu sitigo, wuzundzo muni mu na gu wu manago khu gutimisela gwanu? Aholu mwa gu saniswa na mu girile esi nya sadi, Nungungulu a na mi kategisa khu gu timisela gwanu.

²¹ Kholu, khiso a mi ranedego iso. Uye Kristo, wurumba waye, sanisekide kotani yanu, a hi ninga giwonelo gasi hi landra ndzila yaye.

²² Uye gima kha gira giwono, gambe mwalo a mu pwidego na gu ganela guvivba khu kanani gwaye.

²³ Gikhati a nga vadwago kha hakha khu guvala, gikhati a nga saniswa kha wugela muthu, aholu a di vega gutumba gwaye gwatshavbo ga Mulamuli wule nya lisine.

²⁴ Uye wurumba waye, dzegide sighoho sathu givilini gwaye a si vbayega vbagihambanotunu, gasi ethu na hi fude ga gighoho, hi vbanya lisineni. Kristo bayisidwe gasi enu mu mane guvbanyiswa.

²⁵ Kholu enu, gale mu di gu khala nga dzinvuta nya gudzimele, olu mu wuyisidwe ndzilani, gasi muta landra Muhavisi ni Musayisi nya mihefemulo yanu.