1 Johane 4 - Bhibhiliya Nya Guage

Liphuvbo nya lisine ni liphuvbo nya malipha

¹ Sigodwa sangu, mu nga dzumeli vatshavbo avo va ganelago gukhavo va na ni liphuvbo la Nungungulu. Hegulani khu gu va sola vathu vovo mu fela gu dziti gukhenu liphuvbo lolo la guta khu ga Nungungulu kamwe, gani? Kholu vaprofeti nya vangi nya malipha va phalalegide ni litigo latshavbo.

² Egi gi na mi tugudzisago gu liti Liphuvbo la Nungungulu khegi: Oyu a ganelago khuye Jesu Kristo a dzi giride muthu, a na ni Liphuvbo litago khu ga Nungungulu.

³ Aholu, oyu a ganedzago isoso nya mahungu ya Jesu Kristo, mwalo Liphuvbo litago khu ga Nungungulu. Liphuvbo a gu nalo kheli la nala wa Kristo. Enu mu pwide na gu ganedwa gupwani liphuvbo lolo li nata, ilo lomo olu tigoni.

⁴ Vanavangu, enu mwa gu lumba Nungungulu. Mu va pade vaprofeti nya malipha. Kholu, Liphuvbo mu gu nalo enu, li na ni tshivba guvbindra liphuvbo la vale va lumbago litigo leli.

⁵ Avo va gu ganela khu sa mafuni momu, litigo li va yingela. Kholu avo va gu lumba litigo.

⁶ Aholu, ethu ha gu lumba Nungungulu. Oyu a mutigo Nungungulu a ngu hi yingisa; oyu a si mutigo Nungungulu kha hi yingisi. Khidzo kharati hi gutigo guhambana nya Liphuvbo nya lisine ni liphuvbo nya malipha.

Nungungulu lihaladzo

⁷ Sigodwa sangu, hi na haladzane khu gyathu, kholu, lihaladzo la guta khu ga Nungungulu. Oyu a haladzago khuye a gu gyanana gya Nungungulu, a ngu muti Nungungulu.

⁸ Oyu a si haladzigo, kha muti Nungungulu, kholu Nungungulu lihaladzo.

⁹ Khidzo kharato Nungungulu a nga yeyedza lihaladzo laye ga ethu. Nungungulu a di rumela Mwamana waye wa Moyo tigoni, gasi ethu hi mane guvbanya khu kotani yaye.

¹⁰ Lihaladzo kheli: Khandri ethu hi nga mu haladzago Nungungulu, uye khuye a nga hi haladzago, a hi rumela Mwamana waye, gasi, khavbo gwaye, hi ditshedzwa sighoho sathu.

¹¹ Sigodwa sangu, olu Nungungulu a hi haladzidego kharati, ethu nethu gu vbwetega hi haladzana khu gyathu.

¹² Mwalo na moyo a nga wona Nungungulu; ethu ha gu haladzana khu gyathu, Nungungulu a ngu vbanya ni ethu ni lihaladzo laye gambe li tadzisegide avbo gwathu.

¹³ Khidzo kharati hi dzitigo gukhethu hi ngu hengela gu vbanya ni Nungungulu a nuye Nungungulu a ngu vbanya ga ethu, kholu Uye a hi ningide Liphuvbo laye.

¹⁴ Ethu hi si wone, gambe hi ngu tivisa ga vambe gukhethu Babe rumede Mwamana waye, gasi guta khala Muvbanyisi nya litigo.

¹⁵ Muthu a gu tiyisa nya gukhuye Jesu Kristo Mwamana wa Nungungulu, Nungungulu a ngu vbanya gwaye, uye nuye a ngu hengela gu vbanya ni Nungungulu.

¹⁶ Ethu nethu hi ngu liti lihaladzo Nungungulu a gu nalo ga ethu, gambe hi ngu khodwa ga lihaladzo lolo. Nungungulu lihaladzo, oyu a vbanyago khu lihaladzo a ngu hengela gu vbanya ni Nungungulu, gambe Nungungulu a ngu vbanya gwaye.

¹⁷ Lihaladzo la gu tadzisega ga ethu, gasi hifela gu tiya Litshigu nya Gulamudwe, kholu, guvbanya gwathu mafuni momu, gu khade kha nga ogu ga Kristo.

¹⁸ Lihaladzo li mwalo hwanga; lihaladzo nya lisine li ngu vbedza hwanga. Khu guralo, lihaladzo kha li tadzisegi ga wule a gu na ni hwanga, kholu, hwanga wa gu resa tsayiso.

¹⁹ Gasi ethu, hi ngu haladza Nungungulu, kholu Uye khuye a nga phela khuye gu hi haladza.

²⁰ Muthu a gu ganela, khuye: Eni nyi ngu mu haladza Nungungulu, na gu nyenya ndriyaye, a gu lipha. Kholu, mwalo a dzi kodzago gu haladza Nungungulu a si mu wonigo, a gumba haladza ndriyaye a mu wonago.

²¹ Oyu khuye Nayo hi nga ningwago: Oyu a haladzago Nungungulu, a na haladze gambe ni ndriyaye.