1 Dzipfhumu 9 - Bhibhiliya Nya Guage

Pfhumu Nungungulu a ngu dzi wonegisa nya wuvili ga Solomoni

¹ Avbo Solomoni a nga vbedzago guvbaha Nyumba ya Pfhumu Nungungulu, ni nyumba nya wufumu, ni satshavbo a nga suvago gu si gira,

² Pfhumu Nungungulu a di dzi wonegisa ga Solomoni, kha nga idzo a nga dzi wonegisago khidzo Gibheyoni.

³ Pfhumu Nungungulu a di mu embela, khuye: “Nyi pwide nombelo ni gilombo gyago, u lombidego mbeli gwangu. Nyi agiside nyumba yeyi u nyi giredego, gasi u kodze gu vega umo lina langu kala gupindruga; maho ni monyo wangu, si na khala avbo matshigu yatshavbo kala gupindruga.

⁴ Gasi uwe, wa gu gimbila mbeli gwangu kha nga babe wago Dhavhidhe, khu monyo wago watshavbo ni gululama, u gira satshavbo iso nyi gu rumidego, u sayisa sileletelo ni milayo yangu,

⁵ khu guralo, nyi na tiyisa gikhalo nya wufumu wago, vbakari ga va na Israyeli kala gupindruga, kha nga nyi tumbisidego babe wago, kheni: Gima kha na hamugega muthu nya livelego lago, vbagikhalotunu nya wufumu wa na Israyeli.

⁶ Aholu enu, gumogo ni sanana sanu, mwa gu nyi pfhurarela, mu diga gu sayisa milayo ni sileletelo sangu, nyi si vegidego mbeli gwanu, aholu, mu khozela vambe vanungungulu mu va khidzimela,

⁷ Eni nyi na fuvisa va na Israyeli ga litigo nyi va ningidego; ni nyumba yeyi nyi yi phasedego lina langu, nyi va dzudzuga hwindzo gwangu; Israyeli a na khala gihegiso ni givalo vbakari nya mayigo yatshavbo.

⁸ Ni nyumba yeyi ambari yi khusegidego ngudzu, ni wevbini a na vbindrago khu vbafuvbi ga iyo, a na samala ngudzu ni guwomba ndrodzi, khuye: Khu ginani Pfhumu Nungungulu, a giridego silo nya nga esi, ga litigo leli ni ga nyumba yeyi?

⁹ Va na va hakha, khavo: Kholu va nga digago Pfhumu Nungungulu wawe, uye a nga dusago vababe vawe khu tigoni ga Egipito, va gu landrela vambe vanungungulu, va va khidzimela, ni gu va khozela. Khu guralo, Pfhumu Nungungulu a va resedego gutshaniseka gwatshavbo gogu.”

Simbe sigiro sa Solomoni

¹⁰ Hwane nya magumavili myaga, avbo Solomoni a nga vbedzago guvbaha dzinyumba dza dzimbili, Nyumba ya Pfhumu Nungungulu ni nyumba nya wufumu,

¹¹ mufumeli Solomoni a di ningela ga Hiramo, mufumeli wa Tiro, magumavili madhoropa tigoni ga Galileya. Kholu Hiramo a ningide Solomoni mapulango nya sedhari ni ayo nya kipirisi ni ndralama mayelano khidzo a nga golago khidzo.

¹² Mufumeli Hiramo a di khuga khu Tiro, gasi guya wona madhoropa a nga ningwago khu Solomoni, aholu, kha ma nga mu tsakisa.

¹³ Khavbo avbo, a di ganela, khuye: “Ndriyangu, gasi madhoropa muni aya u nyi ningidego?” A di ma rana khuye litigo la Kabhuli (gutshamusago gupwani mafu nya gihala) kala na muhuno.

¹⁴ Hiramo a di rumede ga mufumeli Solomoni, lizana ni magumavili dzitaleta nya ndralama.

Khupo wu nga vegwago khu Solomoni

¹⁵ Owu khu sasamedzo nya mithumo yatshavbo nya gibhalu yi thumidwego khu guruma ga mufumeli Solomoni, gasi guvbaha Nyumba ya Pfhumu Nungungulu, ni nyumba yaye nya wufumu, Milo ni likhokhola la Jerusalema, gumogo gambe ni Hazori, Megidhu ni Gezeri.

¹⁶ Kholu Faro, mufumeli wa Egipito, a di gwede aya wandra lidhoropa la Gezeri, a li vbisa khu nilo, a mbembisa vakhanani va nga bani vari dhoropani mule, a li dzega a ningela nyamahegyane waye, ngadza Solomoni, li khala thomba yaye.

¹⁷ Khu guralo, Solomoni a di vbahedza Gezeri ni Bheti-Horoni wa releloni,

¹⁸ Bhahalati ni Tamari, mugiwulani gya tigoni mule,

¹⁹ gumogo gambe ni madhoropa yatshavbo nya guvegedzele umo matshari ma nga bani ma gu lumba Solomoni, madhoropa nya gukhale dzikareta, madhoropa nya vakhileli nya dzikavalu, ni satshavbo iso Solomoni a nga si suva guvbaha Jerusalema, Libhanoni ni tigoni gwatshavbo gu nga bani na gu fumwa khuye.

²⁰ Gasi vathu vatshavbo va nga bani na va tshade, Vaamori, Vahiti, Vaferezi, Vahevhi ni Vajebhuzi, va nga bani va si lumbi va na Israyeli,

²¹ sanana sawe si nga bani si tshade tigoni mule hwane gwawe, avo va na Israyeli va ngamba va kodza gu va mbembisela muphelo, vatshavbo vava, Solomoni a di va gurumedza gu thuma gibhalu, ni gu va gira sithumi kala na muhuno.

²² Aholu ga sanana sa Israyeli, Solomoni ni moyo wawe kha nga va gira dzikhumbi, aholu avo va diri vadwani nya nyimbi, dzindruna, manganagana, vagimbidzisi nya nyimbi ni vathangeli nya dzikareta dzaye ni vakhileli vaye nya dzikavalu.

²³ Va na Israyeli gambe, va diri vathangeli nya dzindruna va nga bani va gimbidzisa mithumo yatshavbo yi emisidwego khu Solomoni, avo va diri livbandre mazana ni livbandre magumi (550), va nga bani va gu bhasopa vathu muthumoni nya guvbahe.

²⁴ Gikhati nyamahegyane wa Faro, ngadza Solomoni, a nga khugago khu Dhoropani ga Dhavhidhe, a ta bela nyumbani gwaye a nga vbahedwago khu Solomoni; Solomoni a di vbaha Milo.

²⁵ Solomoni a di ningela miphaselo nya guvbiswe, ni miphaselo nya gurule, vbagiluvelotunu a nga vbahela Pfhumu Nungungulu, nyondro tharu khu mwaga, a di gu vbisa ni libani vbatshani nya giluvelo gi nga bani giri mbeli ga Pfhumu Nungungulu. A vbedza kharati thumo nya guvbahe Nyumba ya Pfhumu Nungungulu.

IV. WUGWEWO WA SOLOMONI Solomoni a ngu vatisa mataro nya wugwewo

²⁶ Mufumeli Solomoni a di gira gambe mataro nya mangi tigoni ga Eziyoni-Gebheri, li khalago vbafuvbi ni Elati, funguni nya yiphwa nya gufuvile, tigoni ga Edhomi.

²⁷ Mufumeli Hiramo, a di rumela khu mataro yale sithumi saye, va gimbidzisi nya mataro, vathu va nga bani vari ni wugengeli umo nya dzindzila dza matini, gumogo ni sithumi sa Solomoni.

²⁸ Va di vboha tigoni ga Ofiri, vaya dzega mazana mana ni magumavili (420) dzitaleta nya ndralama, va dzi yisa ga mufumeli Solomoni.