1 Dzipfhumu 8 - Bhibhiliya Nya Guage

Solomoni a ngu resa Ngasa nya Gidzumeledzwano Nyumbani ga Nungungulu

¹ Khavbo avbo, Solomoni a di ramba madhota yatshavbo ya na Israyeli ni vathangeli vatshavbo nya mahundzu, ni mihungo nya dzinyumba dza sanana sa Israyeli, gasi vata avbo gwaye, Jerusalema, vata dzega Ngasa nya Gidzumeledzwano gya Pfhumu Nungungulu khu Dhoropani ga Dhavhidhe a gu Siyoni, va yi yisa Nyumbani ga Nungungulu.

² Vama vatshavbo va na Israyeli va di tombana vbabuzotunu ga mufumeli Solomoni, khu ngima nya Etanimi, a gu ngima nya livbandre na mivili.

³ Ma dita madhota yatshavbo ya na Israyeli ni vaphasi nya mhamba, vata dzega Ngasa ya Pfhumu Nungungulu.

⁴ Va di gwela nayo vbatshani gumogo ni Tshatsha nya Tshangano ni sombo satshavbo nya guage si nga bani siri Tshatshani; si rwadwa khu vaphasi nya mhamba ni va na Levhi.

⁵ Mufumeli Solomoni ni tshangano watshavbo wa na Israyeli wu ngata tombana avbo gwaye, va di thanga mbeli nya Ngasa, va ningela miphaselo nya dzinvuta ni dzimombe dzi gumba kodzwa guvaledwa ambari gu tidwa tengo khu gutala nya idzo.

⁶ Khavbo avbo, vaphasi nya mhamba va di dzega Ngasa nya Gidzumeledzwano gya Pfhumu Nungungulu, vaya yi vega wulangani gwaye, Nyumbani nya Guage Ngudzu, gwa Nyumbani ga Nungungulu, vbavbatshi nya mambapi nya dzikerubhimi.

⁷ Kholu dzikerubhimi dzi di thawuludzide mambapi yawe vbawulangatunu nya Ngasa dzi fenengedza Ngasa ni mipingo yaye khu mambapi yawe.

⁸ Mipingo yakone yi di laphide ngudzu, khu kharato, dzitshokha dzakone, dzi di wonega Wulangani nya Guage, aholu yi di si wonegi khu vbavbandze; silo soso, si nga romo avbovbo kala na muhuno.

⁹ Umo nya Ngasa nya Gidzumeledzwano gu diri mwalo gimbe gilo, vbavbandze nya siwindri sa sivili si nga vegwago umo khu Mosi, na vari gigomoni ga Horebhi, avbo Pfhumu Nungungulu a nga girago gidzumeledzwano ni sanana sa Israyeli, gikhatini va nga dugago khu tigoni ga Egipito.

¹⁰ Avbo vaphasi nya mhamba va nga dugago khu Wulangani nya Guage Ngudzu, li dita lipfhi li ta fenengedza Nyumba ya Pfhumu Nungungulu;

¹¹ Vaphasi nya mhamba va di tandrega ni gu khala nyumbani va thuma thumo wawe, khu kotani nya lipfhi, kholu wudhumo wa Pfhumu Nungungulu wu di tadzide Nyumba ya Pfhumu Nungungulu.

Solomoni a ngu ganela ga vathu

¹² Khavbo avbo, Solomoni, a di ganela, khuye: “Pfhumu Nungungulu hathide gu khala lipfhini nya gidema!

¹³ Khu lisine eni nyi gu girede nyumba, wulanga u na vbanyago avbo kala gupindruga.”

¹⁴ Khavbo avbo, mufumeli a di thendregedza khovbe yaye a kategisa tshangano watshavbo wa na Israyeli, wu nga bani wu emide.

¹⁵ A di ganela, khuye: “A na rungudzwe Pfhumu Nungungulu wa Israyeli, a ganedego khu likana laye ga babe wangu Dhavhidhe, a tadzisago olu khu gyandza gyaye gitumbiso a giridego nya gukhuye:

¹⁶ Gukhugela litshigu lile nyi dusidego vathu vangu va na Israyeli, khu tigoni ga Egipito, gima kha nya nga hatha limbe lidhoropa vbakari nya mahundzu yatshavbo ya na Israyeli, gasi gu nyi vbahela umo nyumba yi na lumbago lina langu, aholu nyi di hatha Dhavhidhe, gasi gu fumela vathu vangu va na Israyeli.

¹⁷ Babe wangu Dhavhidhe, a di gode khu monyo waye watshavbo guvbaha nyumba yeyi yi lumbago lina la Pfhumu Nungungulu wa Israyeli.

¹⁸ Aholu Pfhumu Nungungulu, a di embela babe wangu Dhavhidhe, khuye: Kha nga olu u godego gu nyi vbahela nyumba yi lumbago lina langu, gupimisa gwago khwadi;

¹⁹ aholu khandri uwe u na vbahago nyumba yoyo; mwanago a na dugago khu mahembeni gwago, khuye a na vbahago nyumba yi lumbago lina langu.

²⁰ Khu kharati, Pfhumu Nungungulu a di tadzisa magana yaye a nga bani na ganede; Eni nyi tshikedzide wulangani ga babe wangu Dhavhidhe, nyi khade vbagikhalotunu nya wufumu wa na Israyeli, kha nga idzo a ganedego khidzo Pfhumu Nungungulu; nyi vbahide nyumba yi lumbago Pfhumu Nungungulu wa Israyeli.

²¹ Nyi dongisede wulanga nya guvege avbo Ngasa nya Gidzumeledzwano egi Pfhumu Nungungulu a giridego ni vababe vathu, gikhati a va dusidego khu tigoni ga Egipito.”

Solomoni a ngu lombelela ga Nungungulu

²² Khavbo avbo, Solomoni a di ema mbeli nya giluvelo gya Pfhumu Nungungulu, a khusedza mandza vbatshani, mbeli nya tshangano watshavbo wa Israyeli,

²³ a lombelela, khuye: “Pfhumu Nungungulu wa Israyeli, mwalo mumbe Nungungulu a fananago ni Uwe, vbatshani ndzadzini, ambari vbavbatshi mafuni, Uwe u vegedzago gidzumeledzwano nya wuhindzi ga sithumi sago, si tago mbeli gwago khu monyo wawe watshavbo.

²⁴ Kholu u tadziside gitumbiso u giridego ga githumi gyago, babe wangu Dhavhidhe. Kholu satshavbo u ganedego khu likana lago, si tadzisegide khu mandza yago, kha nga si wonegago muhuno.

²⁵ Gasi, olu, Pfhumu Nungungulu wa Israyeli, tadzisa iso u ganedego ga githumi gyago, babe wangu Dhavhidhe, u nga ganelago, khuwe: Gima kha gu na hamugega nyumbani gwago muthu nya livelego lago, a na gu fumelago va na Israyeli khu Lina langu, sanana sago sa gu dzi garadza khu gu landrisa dzindzila dzawe, va gimbila mbeli gwangu kha nga idzo uwe u nga gimbilago khidzo mbeli gwangu.

²⁶ Tadzisa gambe olu uwe Pfhumu Nungungulu wa Israyeli, gitumbiso u giridego ga githumi gyago babe wangu Dhavhidhe.

²⁷ Ina kamwe, lisine nya gupwani, Nungungulu a ngu khala mafuni, gani? Ambari ndzadzini ni ndzadzini gwa ndzadzini gu si gu enedzigo, ginani nyumba yeyi nyi gu vbahedego?

²⁸ Ambari khu guralo, olu Pfhumu Nungungulu wangu, hakha nombelo wa githumi gyago ni gu lomba gwaye. Yingisa gulila ni nombelo yoyu githumi gyago gi lombago muhuno mbeli gwago.

²⁹ Gasi maho yago, wutshigu ni mihani, ma na tulege ma wona nyumba yeyi, ni wulanga wowu, u ganedego u thula uwo, khuwe: Lina langu li na khala vbale; gasi gupwa nombelo u giredwago khu githumi gyago wulanga wowu.

³⁰ Gasi olu, yingisa nombelo wa githumi gyago ni wa vathu vago va na Israyeli, va guta vata lombelela wulanga wowu. Uwe nuwe, va yingise khu wulangani gwago u khalago avbo, ndzadzini yoyo, va yingise bwelo khavbo u va tsetsela.

³¹ Muthu a gu ghohela muakelane waye, aholu va mu ruma gu gira gisambanyo, uye ata sambanya mbeli nya giluvelo gyago, nyumbani momu,

³² Uwe, mu yingise khu ndzadzini yoyo; thethisa, ni gulamula sithumi sago, u tsayisa uye a ghohidego, khu gu mu bweledzela guvivba gwaye gu thegela hungoni gwaye; U ditshedza oyu a lulamidego U yeyedza gululama ga oyu a giridego gululama.

³³ Vathu vago va na Israyeli, va gu padwa khu valala vawe, khu gu bani va gu ghohede, va vbindrugedza va wuya va ta rungudza Lina lago, va gu dzi laya va ta lombelela nyumbani momu,

³⁴ uwe va yingise nuri khu ndzadzini yoyo, u tsetselela gighoho gya vathu vago va na Israyeli, bwelo khavbo u va dzega u va yisa ga litigo u ningidego vababe vawe.

³⁵ Ndzadzini gwa gu segega, ndzadzi yi siwi, khu kotani nya gughohe gwawe, avo va guta lombelela ga wulanga wowu, va dhumisa lina lago, va diga sighoho va giridego khu gu bani u va tsayiside,

³⁶ Uwe va yingise khu ndzadzini yoyo, u tsetselela sighoho sa vathu vago va na Israyeli, u va hevbudza gu gimbila khu ndzila nya yadi, u wisa ndzadzi tigoni gwatshavbo u ningidego vathu vago gu khala thomba yawe.

³⁷ Gwa gu manega ndzala tigoni, mwendro tungu, ni gihala gi vbisa dzimbewu, maluvbya, dzimbera ni siwungu; va gu randredwa khu valala vawe, tigoni gu gu ni dzindranga dzawe, mwendro gu manega dzingumbe nya guhambanelane ni mitungu,

³⁸ nombelo watshavbo ni gulila gwatshavbo u na giredwago khu moyo mwendro khu vathu vatshavbo va na Israyeli, muthu ni muthu a giti gighoho a giridego khu monyoni gwaye, a khusedza mandza yaye ma khedza nyumbani momu;

³⁹ uwe va yingise khu ndzadzini yoyo, wulangani u khadego avbo, ninga moyo ni moyo maningano khu dzindzila dzaye dzatshavbo, nidzo u na wonago khidzo monyoni gwaye, kholu khuwe basi u wonago myonyo yatshavbo ya sanana sa vathu.

⁴⁰ Gasi va gu ninga githawo matshigu yatshavbo, va kodza guvbanya ga litigo u ningidego vababe vathu.

⁴¹ U na yingisa gambe muluveli a si lumbigo vathu vago va na Israyeli, aholu na guta khu mayigoni ya hwindzo, khu kotani nya lihaladzo nya lina lago,

⁴² (kholu va napwa ndruma nya Lina lago nya likhongolo, ni gyandza gyago nya tshivba, ni libogo lago li khusegidego) muthu yoyo a guta lombelela nyumbani momu;

⁴³ uwe mu yingise khu ndzadzini yoyo, khu wulangani u khadego avbo, u mu girela satshavbo iso muluveli yoyu a si lombago avbo gwago, gasi vathu vatshavbo va mafuni va liti lina lago, va kodza gu gu ninga githawo, kha nga vathu vago va na Israyeli, va dziti gukhavo lina lago la gu khusedzwa nyumbani momu nyi gu vbahedego.

⁴⁴ Vathu vago va gu duga guya dwana nyimbi ni valala vawe, khu ndzila u na va yeyedzago, va gu lombelela ga Pfhumu Nungungulu, na va gu khedza phuvbo ga lidhoropa leli u li hathidego, ni nyumba yeyi nyi vbahedego lina lago,

⁴⁵ yingisa nombelo ni gulila gwawe, khu ndzadzini yoyo, u va vhikela.

⁴⁶ Va gu gu ghohela kha nga a gu mwalo muthu nyamba ghoha, uwe u va gorogela u va ningela mandzani ga valala, gasi va va vbagela vaya girwa dzikhumbi tigoni ga valala vawe, hwindzo mwendro vbafuvbi ni litigo lawe;

⁴⁷ khu tigoni va na gu yiswago iyo guya khala dzikhumbi, va guya dzi laya, va vbindrugedza va lombelela, khavo: Hi ghohide, hi giride silo nya guvivbe, hi sighohi;

⁴⁸ va gu vbindrugedza, va wuya avbo gwago khu monyo wawe watshavbo, ni hefemulo wawe watshavbo, na vari khu tigoni momo ga valala vawe va va vbagedego vaya va gira dzikhumbi, va gu lombelelela na va khedzide phuvbo ga litigo u ningidego vababe vawe, ga lidhoropa leli u li hathidego, ni ga nyumba yeyi nyi vbahedego lina lago;

⁴⁹ yingisa nombelo ni gulila gwawe, nuri khu ndzadzini yoyo, wulangani u khadego avbo; u va vhikela.

⁵⁰ Tsetselela vathu vago sighoho ni milandru va gu giredego, u va gira va pwedwa gisiro khu valala va va giridego dzikhumbi, gasi va kodze gu va girela wuhindzi.

⁵¹ Kholu Israyeli vathu vago ni thomba yago, u va dusidego khu tigoni ga Egipito, vbakari nya nilo nya gunyiviligise simbi.

⁵² Maho yago ma na tulege ma wona gu lomba ga githumi gyago, ni gupwa gu lomba ga vathu vago va na Israyeli, gasi u yingisa satshavbo gikhati va ranago lina lago.

⁵³ Kholu, khuwe Pfhumu Nungungulu u va hathidego, va khala thomba yago vbakari nya mafumbo yatshavbo ya mafuni, kha nga u ganedego khu ga githumi gyago Mosi, gikhati u dusidego vababe vathu khu tigoni ga Egipito.”

Solomoni a ngu kategisa vathu

⁵⁴ Avbo Solomoni, a nga vbedzago gu gira ga Pfhumu Nungungulu nombelo yoyu ni gilombo gegi, na khidzimide a khusedza mandza ndzadzini, a di khuga khavbo a nga bani a khidzimide, mbeli nya giluvelo gya Pfhumu Nungungulu,

⁵⁵ na emide a di kategisa tshangano watshavbo wa na Israyeli, a khusedza lito, khuye:

⁵⁶ “A na rungudzwe Pfhumu Nungungulu, a ningidego wulanga nya guhefemule avbo vathu vaye va na Israyeli, gukhedza khu satshavbo iso a ganedego! Li mwalo lito li thegidego ga situmbiso saye satshavbo nya sadi a ganedego khu ga githumi gyaye Mosi.

⁵⁷ Uwe Pfhumu Nungungulu wathu khala ni ethu, kha nga u khadego ni vababe vathu; Uwe u nga hi digi ambari gu hi divala!

⁵⁸ Myonyo yathu yi ndrindredzele yiya iyo gwago, gasi hi kodze gu gimbila gikhati gyatshavbo khu dzindzila dzago, hi sayisa milayo, sileletelo ni sihevbudzo sago, kha nga idzo U nga leletelago khidzo vababe vathu.

⁵⁹ Magana yaya nya gulombe nyi ngari gu lombago ga Pfhumu Nungungulu, ma na khale vbafuvbi, mbeli ga Pfhumu Nungungulu wathu, wutshigu ni mihani, gasi uye a kodze gu vhikela mahungu ya githumi gyaye ni mahungu ya Israyeli, vathu vaye, mayelano khiso va si vbwetago guvbanyani gwawe.

⁶⁰ Gasi mayigo yatshavbo ya mafuni ma fela gu dziti gukhayo Pfhumu, khuye basi a gu Nungungulu, mwalo mumbe vbavbandze ga Uye basi.

⁶¹ Myonyo yanu yi na vbelele khu gu tumbega ga Pfhumu Nungungulu wathu, gasi mu kodze gu gimbila khu sileletelo saye, mu sayisa milayo yaye yatshavbo kha nga muhuno.”

Gukhangudwa nya Nyumba ya Nungungulu

⁶² Khavbo avbo, Mufumeli Solomoni ni vatshavbo va na Israyeli, va di gira miphaselo ga Pfhumu Nungungulu.

⁶³ Solomoni a di ningela miphaso nya gurule; miphaselo a nga ningelago ga Pfhumu Nungungulu, a diri magumavili na mavili magumi mazana (22.000) nya dzimombe, ni lizana ni magumavili magumi mazana (120.000) dzinvuta; isoso khiso mufumeli ni va na Israyeli va nga agisa khiso Nyumba ya Pfhumu Nungungulu.

⁶⁴ Khu litshigu la limwedo, mufumeli a di agisa gambe wulanga wa vbakari ni vbakari, mbeli nya Nyumba ya Pfhumu Nungungulu; khavbo a nga ningelago avbo miningelo nya guvbiswe ni miningelo nya gurule, nya mafura nya sirengo, kholu giluvelo nya sugu gi nga bani giri mbeli ga Pfhumu Nungungulu, gi diri gidugwana ngudzu, wulanga wu si eneligo gu gira avbo miphaselo nya guvbiswe ni miningelo nya dzimbewu ni mafura nya miphaselo nya gurule.

⁶⁵ Khu gikhati gya gimwegyo, Solomoni a di gira buzo, ni vatshavbo va na Israyeli; ni tshangano nya khongolo wu nga bani wu dugela mivbinganoni ga Lebho-Hamati, wuya kala tsongoni wa Egipito. Va di wu gira mbeli ga Pfhumu Nungungulu wathu, livbandre na mavili matshigu, a engedzela gambe mambe livbandre na mavili matshigu, ma khala likhumi na mana matshigu.

⁶⁶ Khu litshigu nya livbandre na mararu, a di tshula vathu va hongola, avo va di kategisa mufumeli, muthu ni muthu a bwelela tshatshani gwaye na tsakide, myonyo yawe na yi tangade khu kotani nya wuwadi watshavbo owu Pfhumu Nungungulu, a nga girelago githumi gyaye, Dhavhidhe, ni vathu vaye, va na Israyeli.