1 Dzipfhumu 7 - Bhibhiliya Nya Guage

Solomoni a ngu vbaha nyumba yaye nya wufumu

¹ Aholu Solomoni a di vbaha nyumba yaye, a yi vbedza khu likhumi na miraru myaga.

² A di vbaha gambe nyumba ya khabini ga Libhanoni, nya lizana (100) mikono gulapha, livbandre magumi (50) mikono guanama, ni magumararu (30) gukhugega vbatshani. Yi di vbahidwe vbatshani nya ndzarara dzina nya mithimba nya sedhari, guhandzegwa mapulango nya guvbingame nya sedhari avbo nya ndzarara nya madingo.

³ Dzinyumba dzi di bani dzi tiyisidwe vbatshani khu mithimba, na dzi pfhuledwe vbatshani khu mapulango nya sedhari, khu tengo nya magumana na livbandre (45) madingo, ndzarara ni ndzarara yi diri likhumi na livbandre madingo.

⁴ Yi diri ndzarara tharu nya sihogo; gihogo ni gihogo, si di khedzisana.

⁵ Myanya yatshavbo ni madingo, yi diri ni dzikhona dzina nya pimo moyo, ni sihogo sakone si di khedzanide.

⁶ A di gira likupakupa khu madingo nya livbandre magumi (50) mikono gulapha, ni magumararu (30) mikono guanama. Khu mbeli ga eli, li diromo limbe likupakupa nya madingo ni sigandro.

⁷ A di gira gambe nyumba nya phatha nya wufumu, avbo a nga bani na gulamulela avbo mahungu, wulanga wowo, wu di aledwe khu mapulango nya sedhari gukhugela vbavbatshi kala vbatshani.

⁸ Nyumba yaye a nga bani na gu khala umo, yi vbahidwe ndrani nya likupakupa nya wuvili, hwane nya nyangwa, yi di vbahidwe idzosaye ni yimbe. A di vbahela gambe mwangadzi waye nyamahegyane wa Faro, nyumba nya idzosaye neyi.

⁹ Dzinyumba dzatshavbo dzedzi, dzi vbahidwe khu siwindri nya wumburi ngudzu, nya gupidwe khu gupimwa gwadi, si lulamedzedwa khu saroti maphuvbo yatshavbo, khu ndrani ni vbavbandze, gukhugela vbagiseketelotunu kala vbatshani; khu vbavbandze, kala vbalikupakupatunu nya likhongolo.

¹⁰ Giseketelo gi di girwa khu siwindri nya sikhongolo nya wumburi si nga bani siri ni pimo nya likhumi mikono ni simbe nya livbandre na miraru mikono.

¹¹ Khu vbatshani gu di vegwa siwindri nya wumburi ngudzu, nya gupidwe khu gupimwa gwadi, gumogo ni mapulango nya sedhari.

¹² Ndzari yi nga bani yi bhiya likupakupa nya likhongolo yi diri ni ndzarara tharu nya siwindri nya guvatwe, ni ndzarara mweyo nya mithimba nya sedhari; likupakupa la ndrani nya Nyumba ya Pfhumu Nungungulu gumogo ni mwanya wakone si di vbahidwe idzosaye.

Thumo wa Hiramo

¹³ Mufumeli Solomoni a di rumela myango guya raniswa Hiramo khu tigoni ga Tiro.

¹⁴ Hiramo a diri gyanana gya nyamayi moyo nya noni, nya lihundzu la Nafitali, babe waye a di gu dugela tigoni ga Tiro, nari mupfhuli nya sugu. Hiramo a di ningidwe guti nya gukhongolo ngudzu kha nga mupfhuli nya sugu, a di tade khu guti ni mapimo ni wugengeli nya gugire ni wevbini thumo nya sugu; a dita ga Solomoni, a ta mu girela thumo waye watshavbo.

Madingo mavili

¹⁵ A di gira madingo mavili nya sugu nya gupfhudwe; ya mavili ma diri ni pimo moyo, likhumi na livbandre na miraru (18) mikono gukhugega, gugula ma di dzongeledzedwa khu sifi nya likhumi na mivili (12) mikono.

¹⁶ A di nyegisa mihungo mivili nya sugu a yi handzega vbatshani nya madingo, gukhugega nya hungo ni hungo, a diri ni pimo nya livbandre mikono.

¹⁷ A di mburisela mihungo yi handzegidwego vbatshani nya madingo khu siniya nya gulugedwe kha nga makhetshe; livbandre na sivili siniya ga hungo nya guphele ni livbandre na sivili siniya ga hungo nya wuvili.

¹⁸ A di gira ndzarara mbili nya maroma ma dzundrulugela giniya gi nga fenengedza mihungo nya madingo, a gira kharato ni ga wumbe hungo.

¹⁹ Mihungo yi nga bani yiri vbavbatshi nya madingo ya makupakupani, yi di gu fanana ni senge, yi khusega vbatshani gipimo nya ndronga mbili.

²⁰ Gasi mihungo yi nga handzegwa vbatshani nya madingo ya mavili, yi di khusedzidwe wulangani nya gugule nya lidingo, khu vbatshani nya giniya; gu di vegedzedwe mazana mavili maroma ma dzundrulugela mihungo ya mivili.

²¹ Khu hwane, a di emisa madingo ya mavili nyangwani nya Nyumba ya Nungungulu. Lidingo la phuvbo ga nyamudye, a di li rana khuye Jakimi, la nyambade a li rana khuye Bhowazi.

²² Vbatshani nya mihungo nya madingo, a di mburisela khu sifananiso nya senge. Wu vbedzisa kharati khu wumburi, thumo nya madingo.

Yiphwa nya sugu nya gu nyiviligiswe

²³ A di gira gambe yiphwa khu sugu nya gu nyiviligiswe, yi di wonega kha nga mbiya nya yikhongolo nya gupime likhumi mikono gukhugela mahegiso kala mahegiso; na yi khugegide pimo nya livbandre mikono; gugula gwaye yi di pimwa khu keka nya magumararu mikono gulapha wu dzundrulugela maphuvbo yatshavbo.

²⁴ Wubambe gwaye, yi di dzundrulugedwe khu dzibutawu nya gutshavedwe, dzi nga vegedzedwa khu likhumi mikono, dzi sasamedzedwa khu ndzarara mbili. Satshavbo si di bethwa avbo nya gikete gya gimwegyo gumogo ni yiphwa.

²⁵ Yiphwa yi di handzegidwe avbo nya likhumi na dzimbili dzimombe nya gubethwe khu sugu; dzimombe dzitharu dzi di khedza Wuronga, dzitharu dzi khedza Muhwadambo, dzitharu dzi khedza Marandzi, dzitharu dzi khedza Khugadambo, yiphwa yi diri vbatshani nya idzo, dzi tshangana vbakari khu migila.

²⁶ Gudhimba nya yiphwa yi di ningana nyala dzina, bambe gwaye gu di fanana ni khokho, kha nga senge nya likhonwa, gu di gu kodzega gubela magumana magumi mazana (40.000) miphata.

Simbe sombo sa Nyumbani ga Nungungulu

²⁷ A di gira gambe likhumi sirandro nya sugu. Girandro ni girandro gi diri ni pimo nya mikono mina gulapha, guanama gwaye, gu diri ni mikono miraru gumogo ni gukhugega.

²⁸ Sirandro si di khade, kharati: Si di tshavedwe gwadi khu tshizelo siri ni kwenga matshanganoni.

²⁹ Mudzibambe gu diri ni sifananiso nya dzinghala, dzimombe ni dzikerubhimi, khu vbatshani ni vbavbatshi nya dzinghala ni dzimombe, gu di hungeledwa simburiselo ni senge si nga gira dengele dengele.

³⁰ Girandro ni girandro, gi diri ni marodha mana nya sugu, ni naneko nya gutshanganise marodha nya sugu wu ma gimbidzisa. Mawundru ya mana ma diri ni sitiyiso nya gupfhudwe si hakhedzelago mbiya, sitiyiso a diri sa gikete nya gunyiviligiswe, khu wubambe nya gimwegyo ni gimwegyo, gu diri ni senge.

³¹ Mahegiso nya girandro, gukhugela vbagitiyisotunu, gu diri ni mbiya yi pimago kono moyo guya vbavbatshi. Yi diri girendzelekwane, likana lakone li diri mikono mivili ni gipandre guanama, li khala kha nga gihakhedzelo gi tshavedwego simburiselo nya guhambanelane. Gidzigaredzo gyakone gi diri gya maphuvbo mana nya idzosaye, na siri girendzelekwane.

³² Marodha ya mana ma diri khu vbavbatshi nya gidzigaredzo, mawogo nya gutshanganise ni gu gimbidzisa marodha, ma diri nayo khu vbavbatshi nya gidzigaredzo. Lirodha ni lirodha, li diri ni kono ni gipandre gukhugega.

³³ Marodha yakone, ma di gu fanana nayo nya kareta, mawogo yakone nya gutshanganise ni gu gimbidzisa marodha, dzingongola, dziwayela, ni gikhwelekedzo nya dziwayela, satshavbo si di girwa khu sugu nya gu nyiviligiswe;

³⁴ dzikhonani nya girandro ni girandro, gu diri ni mawundru mana ma nga bani ma pharisidwe avbovbo gu khala giwumbelo gimwegyo basi.

³⁵ Khu vbatshani nya girandro, gu diri ni lirodha nya pimo nya gipandre nya kono gukhugega; gu diri gambe ni siwindri nya gukhakhathwe si yingidwego avbovbo.

³⁶ Siwindri nya gukhakhathwe si di tshavedwe sifananiso nya dzikerubhimi, dzinghala, migindru mayelano ni idzo gu nga bani gu manega khidzo, si randredwa khu senge.

³⁷ Khu kharati a di gira likhumi sirandro; satshavbo si diri magirelo mamowo, pimo moyo ni mawumbelo mamowo.

³⁸ A di gira gambe likhumi sinamelo nya sugu; ginameloni gu di bela magumana miphatha; ginamelo ni ginamelo, gi diri ni pimo nya mikono mivili, gi handzegwa vbatshani nya girandro, nya esi nya likhumi sirandro.

³⁹ Livbandre sirandro a di si vega khu phuvbo ga nyamudye, simbe livbandre a si vega khu nyambade nya nyumba, yiphwa a di yi vega khu nyamudye nya nyumba, khu phuvbo ga Khugadambo ga Marandzi.

⁴⁰ Hiramo a di gira dzikhali, mafosola ni dzimbiya, a vbedza kharati thumo watshavbo a nga ningwago khu Solomoni, gu wu gira Nyumbani ga Pfhumu Nungungulu.

⁴¹ Madingo ya mavili ni mihungo ya mivili nya sirendzelekwane, si di khala khu vbatshani nya madingo, ni siniya sivili, gasi gu fenengedza mihungo yi nga bani yi romo vbamadingotunu.

⁴² Mazana mana (400) maroma ma nga lugedwa musiniyani, ni ndzarara mbili nya maroma ma vegidwego umo nya giniya ni giniya, gasi gu fenengedza mihungo nya sirendzelekwane yi guromo vbatshani nya madingo;

⁴³ gumogo ni likhumi sirandro, ni likhumi sinamelo si guromo vbatshani nya sirandro;

⁴⁴ gumogo gambe ni yiphwa ni likhumi na dzimbili dzimombe vbavbatshi nya yiphwa yile;

⁴⁵ dzikhali ni mafosola, ni dzimbiya, satshavbo sombo sesi, a nga girago Hiramo khu gurumwa khu mufumeli Solomoni, gasi si khala Nyumbani ga Pfhumu Nungungulu, satshavbo si diri sa sugu.

⁴⁶ Mufumeli a di rumela gukhuye si ya wumbedwa panini ga Joridhani, tigoni nya libumba li manegago vbakari ga Sokoti ni Saritani.

⁴⁷ Tengo nya sombo sesi wu diri wungi ngudzu, avbo Solomoni a ngamba kodza gu pima, gulemela nya sugu wakone.

⁴⁸ Solomoni a di gira gambe sombo satshavbo sa Nyumbani ga Pfhumu Nungungulu, giluvelo nya ndralama ni meza nya ndralama, avbo gu nga bani gu vegwa avbo sibaba nya ningelo.

⁴⁹ Sidzigaredzo nya dzikandriya nya ndralama nya guhutwe, livbandre khu nyamudye, livbandre khu nyambade, khu mbeli nya Wulanga nya Guage Ngudzu; senge ni dzikandriya ni tizora, si diri sa ndralama;

⁵⁰ kha nga gambe sikombe, migala, dzimbiya, mikho, sifugwana nya guvbisele libani, ni sikalango nya guthele magala, si diri sa ndralama nya guhutwe, ni mijageri nya ndralama nya guhunge malimba nya wulanga wu Agidego Ngudzu wa Nyumbani ga Nungungulu.

⁵¹ Mufumeli Solomoni a di vbedza kharati thumo watshavbo a wu giridego wa Nyumbani ga Pfhumu Nungungulu. Khavbo avbo, mufumeli Solomoni a di resa sombo satshavbo nya guage sa babe waye Dhavhidhe, si ta Nyumbani ga Pfhumu Nungungulu a gu esi: Parata, ndralama ni mikanvu, a ta si vega wulangani nya dzithomba.