1 Dzipfhumu 21 - Bhibhiliya Nya Guage

Nabhoti a ngu bomba gu rengisa lithembwe laye ga Akabi

¹ Wonani esi si nga dugelela hwane nya sigiro satshavbo sesi, Nabhoti wa Jezireyeli a diri ni lithembwe nya miuvha vbafuvbi ni nyumba nya wufumu ya Akabi, mufumeli wa Samariya.

² Akabi a di ganela ni Nabhoti, a mu embela, khuye: “Nyi ninge lithembwe lago nya miuvha li khala lithembwe langu, kholu lomo vbafuvbi ni nyumba yangu. Wulangani nya ilo, nyi na gu ninga lawalo nya guvbindre eli; wa gu dzina gambe nyi na gu ninga khu dzitsapawu, tengo wu ninganago ilo.”

³ Aholu, Nabhoti a di embela Akabi, khuye: “Pfhumu a na nyi tsetselele, kholu eni kha nyi dzi kodzi gu gu ninga thomba ya vababe vangu.”

⁴ Khavbo avbo, Akabi a di bwelela gaya gwaye na vbisegide ngudzu khu kotani nya magana a nga embedwago khu Nabhoti wa Jezireyeli, a nga khuye: “Gima kha nyi na gu ninga thomba ya vababe vangu.” A diya lala vbadawutunu gwaye, a thendregedza khovbe yaye, a khedza ndzaritunu, a si vbweti gu hodza gilo.

⁵ Aholu, mwangadzi waye a dita gwaye a ta mu wudzisa, khuye: “Khu ginani u khalago nu vbisegide nyamba vbweta ni guhodza gilo?”

⁶ Uye a di mu hakha, khuye: “Kholu nyi nga ganelago ni Nabhoti wa Jezireyeli, kheni: Nyi rengisele lithembwe lago nya miuvha khu dzitsapawu; ni gu, wa gu dzina, nyi na gu ninga limbe lithembwe li tshikedza ilo. Aholu uye a di khuye: Kha nyi na gu ninga lithembwe langu.”

⁷ Khavbo avbo, mwangadzi waye Jezabheli, a di mu embela, khuye: “Gasi olu khandruwe mufumeli wa Israyeli, gani? Wuga u hodza guhodza, u nengela monyoni gwago. Eni nyi na gu ninga lithembwe la Nabhoti wa Jezireyeli.”

Jezabheli a ngu rumela gu songwa Nabhoti

⁸ Khavbo avbo, Jezabheli a di lova malangalila khu lina la Akabi, a ma veta gitambo nya wufumu, a ma rumela ga madhota ni ga dzindruna dza dhoropani va vbanyago ni Nabhoti

⁹ Umo nya lidangalila a di lova, khuye: “Huwelelani litshigu nya guhale, mu vegani Nabhoti mbeli nya tshangano nya vathu.

¹⁰ Mu emisani vama vavili nya guvivbedwe khu monyo mbeli gwaye, va singedza nandru Nabhoti, khavo: Vade Nungungulu ni mufumeli. Khu hwane mu duseni vbavbandze nya lidhoropa, mu mu pfara khu siwindri kala afa.”

¹¹ Vama, vasingalagadzi ni manganagana ya dhoropani, va di gira kha nga idzo a nga leletelago khidzo Jezabheli, malangalilani a nga va lovelago.

¹² Va di vega litshigu nya guhale, Nabhoti va mu khadzisa mbeli wulangani nya wuzundzo.

¹³ Khavbo avbo, gu dita vama vavili nya guvivbedwe khu monyo, va ta ema mbeli ga Nabhoti. Va di gira wufakazi nya malipha va mu rwega nandru mbeli ga vathu, khavo: “Nabhoti vade Nungungulu ni mufumeli.” Va di mu dzega va mu dusa vbavbandze nya lidhoropa va mu pfara khu siwindri kala afa.

¹⁴ Khavbo avbo, va di rumela mwango ga Jezabheli, khavo: “Nabhoti va mu pfaride khu siwindri, fude.”

¹⁵ Avbo Jezabheli a pwidego gupwani Nabhoti pfaridwe khu siwindri afa, Jezabheli a di embela Akabi, khuye: “Khuga u hongole u ya dzega lithembwe la Nabhoti, wa Jezireyeli, a nga bani a bomba nalo gu gu rengisela li khala lago; kholu uye kha ngu gu vbanya gambe, aholu fude.”

¹⁶ Avbo Akabi a ngapwago gupwani Nabhoti fude, a di khuga khu guvbiredza a relela thembweni ga Nabhoti gasi guya li dzega li khala laye.

Eliya a ngu tivisa tsayiso wa Akabi ni Jezabheli

¹⁷ Khavbo avbo, lito la Pfhumu Nungungulu li dita ga Eliya, Mutesebhi, li ta mu embela, khilo:

¹⁸ Khuga u relela gasi guya tshangana ni Akabi, mufumeli wa Israyeli, a vbanyago dhoropani ga Samariya; kholu womo thembweni ga Nabhoti gasi gu li dzega.

¹⁹ U na mu embela, khuwe: Pfhumu Nungungulu wari, khuye: “Guhegula u songide, olu wa gu vbweta gu dzega thomba ya muthu a gu mwalo nandru, gani? U engedza gambe u mu embela, khuwe: Pfhumu Nungungulu a ngu ganela, khuye: Wulangani wu dandzedwego novba wa Nabhoti khu dzimbwa, dzi naya dandzela gambe novba wago.”

²⁰ Akabi a di hakha Eliya, khuye: “Ina, olu u nyi mane, uwe nala wangu, gani?” Eliya a di hakha, khuye: “Ina nyi gu mane gambe, kholu u dzi rengiside khu gu gira esi si vivbidego mahoni ga Pfhumu Nungungulu.

²¹ Wona nya gukhuwe nyi na resa libango mbeli gwago, nyi na vbiyela livelego lago latshavbo, nyi na vbedza vama vatshavbo va nyumbani ga Akabi, madzaha ni vakhongolo, dzikhumbi ni vatshulegidego va tigoni ga Israyeli.

²² Nyi na gira ndranga yago kha nga idzo nyi giridego ndranga ya Jerobhowamo, mwamana wa Nebhati, kha nga ndranga ya Bhahasa, mwamana wa Ayiyasi, kholu u wuside likhulo langu bwelo khavbo, u ghohisa ni va na Israyeli.”

²³ Pfhumu Nungungulu ganede gambe khu mahungu ya Jezabheli, khuye: Dzimbwa dzi na vbadzulela Jezabheli ndzarini ga Jezireyeli.

²⁴ Vatshavbo avo va lumbago nyumbani ga Akabi, va gu fela dhoropani, va na hodzwa khu dzimbwa, ni avo va na felago khabini, va na rothedwa khu sinyoni sa damboni.”

²⁵ Aholu, mwalo ni moyo a nga girago kha nga Akabi, a nga dzi rengisago khu silo nya guvivbe si nyenyezidego mahoni ga Pfhumu Nungungulu; kholu a di kutsedzedwa khu mwangadzi waye, Jezabheli.

²⁶ A di gira silo nya sikhongolo nya gunyenyeze, a khozela vanungungulu nya malipha, a landrela iso va girago vaamori, avo va nga tutumiswago khu Pfhumu Nungungulu, mbeli ga va na Israyeli.

²⁷ Avbo Akabi, a ngapwago magana yaya, a di pferula ngandzu yaye a ambala saku a hala; a di lala vbasakutunu a vbisega ni guvbela tshivba.

²⁸ Khavbo avbo, magana ya Pfhumu Nungungulu, ma dita ga Eliya, Mutesebhi, a mu embela khuye:

²⁹ “U wonide idzo Akabi a dzi thesidego khidzo mbeli gwangu, gani? Kha nga olu a giridego kharati, kha nyi na mu tsayisa matshiguni nya guvbanye gwaye, aholu matshiguni ya mwanaye, nyi na resa tsayiso nyumbani gwaye.”