1 Dzipfhumu 2 - Bhibhiliya Nya Guage

Dhavhidhe a ngu laya Solomoni

¹ Avbo gu nga bani na gu hidzimela matshigu nya gufe gwa Dhavhidhe, uye a di ninga sileletelo ga mwanaye Solomoni, khuye:

² Eni nyi ngu hongola khu ndzila va belago khiyo vathu vatshavbo. Khu guralo, tiya longo u khala mwama.

³ Vegedza ni gu landrisa milayo ya Pfhumu Nungungulu wago; gimbila khu dzindzila dzaye ni gu vegedza sileletelo saye, ni milayo yaye, gululama gwaye ni wufakazi waye, kha nga si lovidwego umo nya Nayo wa Mosi, gasi u kodza gugengela ni gudugelela ga satshavbo u na si girago, ni evbini avbo u na hongolago.

⁴ Khu kharato,Pfhumu Nungungulu a na tadzisa magana a ganedego avbo gwangu, khuye: Sanana sago, sa gu vegedza dzindzila dzawe, va gimbila khu ndzila nya gululame mbeli gwangu, khu monyo wawe watshavbo ni hefemulo wawe watshavbo, gima kha gu na hamugega muthu wa nyumbani gwago, nya gute khale vbagikhalotunu gwangu nya wufumu wa na Israyeli.

⁵ Uwe gambe u ngu dziti gwadi idzo a nyi giredego Jowabhi, mwamana wa Zeruwa, niso a giridego ga vathangeli vavili nya nyimbi ya Israyeli, a gu Abhineri, mwamana wa Neri, ni Amasa, mwamana wa Jeteri, avo a nga va songago, a vbaladza novba nya nyimbi khu gikhati nya gurule, a dzi gira gukhwatshi womo vbanyimbitunu, khu novba wule, a di nyenyezisa khuwo giwunu gyaye ni masandrazi ya migondroni gwaye.

⁶ Uwe gira gukhedza khu guti gwago, aholu u nga dzumedzisi gukhuwe ndzudzu waye nya dzinvi wu relela thowoni khu gurula.

⁷ Aholu girela wuhindzi ga sanana sa Bharizilayi, givelegwa gya Gileyadhi, va na khale gumogo ni avo u hodzago navo vbamezatunu gwago, kholu avo va nyi phaside avbo nyi nga bani nyi gu thava ndriyago Abhisalamo.

⁸ Dziti gambe nya gukhuwe u na ni Simeyi, mwamana wa Gera, wa na Bhejami wa Bhawurimi. Uye ambari a nga nyi valago khu dzitshamba nya gunyenyeze ngudzu, litshigu nyi nga bani nyi gu hongola Mahanayimi. Aholu uye relede a nyi khinga Joridhani, eni nyi di mu tumbisa khu gusambanya khu Pfhumu Nungungulu, kheni kha nyi na mu songa khu litshari.

⁹ “Aholu uwe olu u nga mu sayeli nga muthu nyambana nandru. Uwe u muthu nya guti u na siti iso u na gu girago khuye. Ambari a gumbidego, mu gire ndzudzu waye nya dzinvi wu relela thowoni na wu fuvide khu novba.”

¹⁰ Dhavhidhe a difa aya lala gumogo ni vavelegi vaye, dzingidwe Dhoropani ga Dhavhidhe.

¹¹ Uye fumide magumana myaga tigoni ga Israyeli; livbandre na mivili myaga Hebroni ni magumararu na miraru myaga Jerusalema.

¹² Solomoni khuye a khadego vbagikhalotunu nya wufumu wa babe waye Dhavhidhe, ni mufumo waye wu di tiyiswa khu tshivba.

Mufumo wa Solomoni

¹³ khavbo avbo, a dita Adhoniya, mwamana wa Hagiti, ga Bhate-Sebha, mayi wa Solomoni, uye a di mu wudzisa, khuye: “Wa guta khu gurula, gani?” Uye a di hakha, khuye: “Ina, gurula.”

¹⁴ A di engedza, khuye: “Gyomo nyi vbwetago gu gu embela.” Bhate-Sebha a di hakha, khuye: “Ganela.”

¹⁵ Uye a di ganela, khuye: “Uwe u ngu dziti gwadi gukhuwe wufumu a diri wangu. Va na Israyeli vatshavbo va di gu khevisela eni, gukhavo kheni nyi na gu fumago. Ambari olu wufumu wu nga ndreyago wu ya ga ndriyangu, wu khade waye kholu Pfhumu Nungungulu dzinide gu mu ninga.

¹⁶ Olu nyi na ni gilombo, aholu nya gu lomba kheni nyi si bombedwi.” Bhate-Sebha a di khuye: “Ganela!”

¹⁷ Uye a di engedza, khuye: “Nyi girele wuhindzi u nyi lombela ga mufumeli Solomoni, a nyi ninga Abhisagi nya Musumani a khala mwangadzi wangu, kholu nyi ngu dziti gukheni uye gima kha na gu bombela.”

¹⁸ Bhate-Sebha a di khuye: “Si khade, nyi na ganela ni mufumeli khu mahungu yago.”

¹⁹ Avbo Bhate-Sebha a nga hongolago aya ganela ni mufumeli khu kotani ya Adhoniya, Solomoni a di khuga gasi a mu hakha a noga mbeli gwaye. Khu hwane a di khala vbagikhalotunu gwaye nya wufumu, a rumela gukhuye gu reswa gimbe gikhalo gya mayi waye, uye a di khala khu nyamudye gwaye.

²⁰ Bhate-Sebha a di khuye: “Gyomo gilombo nya gidugwana nyi vbwetago gu gu lomba, aholu u nga nyi bombeli.” Mufumeli a di hakha, khuye: “Mayi wangu, nyi lombe, eni gima kha nyi na gu ganedza.”

²¹ Bhate-Sebha a di khuye: “Ningela Abhisagi nya Musumani a khala ngadza ndriyago Adhoniya.”

²² Mufumeli Solomoni a di hakha mayi waye, khuye: “Khu ginani u lombago basi Abhisagi nya Musumani gu khala ngadza Adhoniya? Lomba gambe ni mufumo wu khale waye, kholu khuye koma wangu, lombela gambe ni muphasi nya mhamba Abhiyatari ni Jowabhi, mwamana wa Zeruya.”

²³ Khavbo avbo, Solomoni a di sambanya khu Pfhumu Nungungulu a vbanyago, khuye: “Nungungulu a na nyi tsayise khu tshivba nya gulamule gwaye, Adhoniya a gumba livba magana yaya khu womi waye.”

²⁴ Olu nyi ngu sambanya khu Pfhumu Nungungulu a vbanyago, a nyi tiyisidego nyi khala vbagikhalotunu nya wufumu gya babe wangu Dhavhidhe, kha nga idzo a nga bani a ganede khidzo, a nyi girela nyumba, muhuno nyi ngu sambanya gukheni Adhoniya a nafa.

²⁵ Mufumeli Solomoni a di rumela Bhenaya mwamana wa Joyadha, aya mu songa.

²⁶ Aholu ga muphasi nya mhamba Abhiyatari, mufumeli a di mu embela, khuye: “Khuga u hongole mahangeni gwago Anatoti, kholu uwe nuwe u di gu fanedwa khu lufu, aholu muhuno kha nyi na gu songa, kholu u di gu rwala Ngasa nya Gidzumeledzwano mbeli ga babe wangu Dhavhidhe, gambe u tshanisekide gumogo ni babe wangu musigaradzoni gwaye gwatshavbo.”

²⁷ Khu guralo, Solomoni a di dusa Abhiyatari, thumoni nya wuphasi nya mhamba ya Pfhumu Nungungulu, gasi gu tadzisega kharati magana ya Pfhumu Nungungulu a ganedego khu mahungu nya ndranga ya Eli, tigoni ga Silo.

²⁸ Mahungu yaya, ma di vboha ga Jowabhi, kholu uye a di gu landrela Adhoniya, ambari ulo a nga bani a si landreli Abhisalamo. Jowabhi a di thava a tutuma aya bela Tshatshani wa Pfhumu Nungungulu aya mola dzikheho nya giluvelo.

²⁹ Va diya embela mufumeli Solomoni khavo, Jowabhi, tutumide aya bela Tshatshani ga Pfhumu Nungungulu, emide vbagiluvelotunu; khavbo avbo, Solomoni a di rumela Bhenaya, mwamana wa Joyadha, khuye: “Indra uya mu songa.”

³⁰ Khavbo avbo, Bhenaya, a di ya bela Tshatshani ga Pfhumu Nungungulu aya embela Jowabhi, khuye: “Mufumeli wari khuye duga omu.” Uye a di hakha, khuye: “Ahihi, nya guvbweta gufela avba.” Bhenaya a di hongola ga mufumeli aya mu embela esi a nga hakha Jowabhi.

³¹ Mufumeli a di embela Bhenaya, khuye: “Gira kha nga idzo a ganedego uye. Mu songe u mu dzinga, gasi novba wu vbaladzidwego nyambana nandru khu Jowabhi, wu ndreye mbeli gwangu ni ga nyumba ya babe wangu.

³² Khu kharalo, Pfhumu Nungungulu a na gira novba waye wu thega hungoni gwaye abune, kholu, songide vama vavili nya gululame guvbindra uye, a va songa khu litshari nyamba tidwa khu babe wangu Dhavhidhe, a gu Abhineri, mwamana wa Neri, muthangeli nya nyimbi ya Israyeli; ni Amasa, mwamana wa Jeteri, muthangeli nya nyimbi ya Judha.

³³ Khu guralo, novba wawe wu na thegele hungoni ga Jowabhi, ni hungoni nya situgulwana nya livelego laye kala gupindruga. Aholu Pfhumu Nungungulu a na ninga gurula ga Dhavhidhe, ga livelego laye, ga ndranga yaye, ni ga mufumo waye kala gupindruga.”

³⁴ Khavbo avbo, Bhenaya, mwamana wa Joyadha, a di gwela aya songa Jowabhi, a mu dzinga nyumbani gwaye mugiwulani.

³⁵ Khu guralo, mufumeli a di vega Bhenaya, mwamana wa Joyadha, wulangani gwaye, kha nga muthangeli nya nyimbi; a gu vega Sadhoki, gu khala muphasi nya mhamba wulangani ga Abhiyatari.

³⁶ Khu hwane, mufumeli a di rumela mwango guya ranisa Simeyi, a ta mu embela, khuye: Dzi vbahele nyumba omu Jerusalema, u khala umo, u nga khugi khumo u hongola wumbe wulanga.

³⁷ Kholu gani khu levbini litshigu u na gu khugago u gimbila u tshatuga gitsongwana gya Kedhroni, dziti nya gukhuwe khu lisine furi u nafa; ni novba wago wu na thegela hungoni gwago.

³⁸ Simeyi a di embela mufumeli, khuye: Ayoyo mahungu nya yadi; kha nga idzo u ganedego khidzo mufumeli wangu, githumi gyago gi na gira kharato. Khu guralo, Simeyi, a di khala Jerusalema matshigu nya gutale.

³⁹ Hwane nya myaga miraru, sithumi sivili sa Simeyi, si di tutuma si thavela ga Akisi, mwamana wa Mahaka, mufumeli wa Gati. Va diya tivisa Simeyi mahungu yaya, khavo: “Sithumi sago somo Gati.”

⁴⁰ Khavbo avbo, Simeyi a di khuga a ladza sighwabhata vbaburutunu gwaye, a hongola Gati, ga Akisi, a landra sithumi saye. Khu kharati Simeyi a di dzega sithumi saye a bwelela naso.

⁴¹ Va diya embela Solomoni, khavo: Simeyi a di khugide khu Jerusalema a gwela Gati, aholu wide.

⁴² Khavbo avbo, mufumeli a di rumela gu ranisa Simeyi, a ta mu wudzisa, khuye: Gasi kha nya gu gira u sambanya khu Nungungulu a vbanyago nyi gu bhasopisa, kheni: Litshigu u na khugago u hongola mambe malanga, khu lisine furi u nafa, gani? Gasi khandri u di nyi hakha, khuwe: “Ayoyo mahungu nya yadi nyi ma pwidego.

⁴³ Olu khu ginani u ngamba vegisa gisambanyo u giridego ga Pfhumu Nungungulu ni sileletelo nyi nga gu ningago?”

⁴⁴ Mufumeli a di engedza gambe ga Simeyi, khuye: “Uwe u ngu guti gwadi khu monyoni gwago guvivba gwatshavbo u giredego babe wangu Dhavhidhe. Khu guralo, Pfhumu Nungungulu a na bweledzela hungoni gwago guvivba gwago.

⁴⁵ Aholu mufumeli Solomoni a na kategiswa, ni wufumu wa Dhavhidhe wu na tiyiswa mbeli ga Pfhumu Nungungulu kala gupindruga.”

⁴⁶ Mufumeli a di ruma Bhenaya, mwamana wa Joyadha, uye a di duga aya mu dhumela a mu songa. Khu kharati mufumo wu di tiyiswa gwadi mandzani ga Solomoni.