1 Dzipfhumu 16 - Bhibhiliya Nya Guage

Wuprofeti wa Jewu

¹ Lito la Pfhumu Nungungulu li dita ga Jewu, mwamana wa Hanani, khu kotani ya Bhahasa, khilo:

² “Nyi gu duside khumo nya kudzudzwane nyi gu emisa gu khala muthangeli wa vathu vangu va na Israyeli, aholu, uwe u di gimbila khu ndzila ya Jerobhowamo, u ghohisa vathu vangu, va na Israyeli, gu kala nyi gorogiswa khu sighoho sawe.

³ Wona nya gukhuwe nyi na mbembisa situgulwana sa Bhahasa ni livelego la nyumbani gwago, nyi gira kha nga idzo nyi nga girago ndranga ya Jerobhowamo, mwamana wa Nebhati.

⁴ Ni wevbini muthu wa nyumbani ga Bhahasa a na felago dhoropani, a na hodzwa khu dzimbwa, ni oyu a na gu felago khabini, a na rothedwa khu sinyoni sa damboni.”

⁵ Gasi mithumo yatshavbo ya Bhahasa, iso a giridego gumogo ni tshivba yaye, si lovidwe umo nya Libhuku nya Matimo ya Vafumeli va na Israyeli.

⁶ Bhahasa lade gumogo ni vavelegi vaye, va mu dzingide Tiriza; wulangani gwaye, fumide mwanaye Ela.

⁷ Lito la Pfhumu Nungungulu li dita ga muprofeti Jewu, mwamana wa Hanani, li ta wugela Bhahasa gumogo ni ndranga yaye; khu kotani nya sighoho a giridego mbeli ga Pfhumu Nungungulu, a mu gorogisa khu mithumo ya mandza yaye, gasi a mu gira a fanana ni ndranga ya Jerobhowamo, khu kharato a di mu mbembisa.

Ela a ngu fumela Israyeli (885-884)

⁸ Khu mwaga nya maguvili na livbandre na moyo (26) nya gufume ga Asa, mufumeli wa Judha, Ela, mwamana wa Bhahasa, a di phela gu fumela Israyeli, nari khu dhoropani ga Tiriza, fumide myaga mivili.

⁹ Ziniri, moyo nya githumi gyaye, a nga bani ari muthangeli nya gipandre nya dzikareta dzaye, a di mu wugela. Mufumeli a diri Tiriza, ndrangani ga Arisa, a nga bani ari musayisi nya nyumba nya wufumu ya dhoropani momo, a di gu sela wadwa a leva.

¹⁰ Ziniri a diya bela a mu songa khu gu mu paya, khu mwaga nya magumavili na livbandre na mivili (27) nya gufume ga Asa, mufumeli wa Judha, a fuma uye wulangani gwaye nya wufumu.

¹¹ Me ni gu khala vbagikhalotunu nya wufumu, a khala mufumeli, a di rumela guya sasela ndranga yatshavbo ya Bhahasa, nyamba tshiya ni muthu moyo nya girambo nya mwama, ga valongo vaye ni ga dzipari dzaye.

¹² Ziniri a di mbembisa kharati ndranga yatshavbo ya Bhahasa, gu tadzisega kharati magana ya Pfhumu Nungungulu, a nga ganelago khu ga muprofeti Jewu, khu kotani ya Bhahasa.

¹³ Owu khuwo tsayiso nya sighoho satshavbo a giridego Bhahasa ni mwanaye Ela, va nga ghohisa ni va na Israyeli, va gorogisa Pfhumu Nungungulu wa Israyeli, khu guphasela vanungungulu nyamba phasa gilo.

¹⁴ Gasi khu yimbe mithumo ya Ela, ni satshavbo a giridego, si lovidwe umo nya Libhuku nya Matimo ya Vafumeli va na Israyeli.

Ziniri a ngu fumela Israyeli

¹⁵ Khu mwaga nya magumavili na livbandre na mivili nya gufume ga Asa, mufumeli wa Judha, Ziniri fumide livbandre na mavili matshigu nari Tiriza. Mabutho ya Israyeli ma di gu ghovide khu nyimbi Gibhetoni, lidhoropa nya Vafilisitiya.

¹⁶ Avbo, mabutho ma nga bani va ghovide ma pwidego mahungu nya gupwani Ziniri giride gikungo nya guwugele mufumeli ni gupwani, a mu songide, khu litshigu lolo, vatshavbo va na Israyeli, khu wughovelotunu yoyo, va di emisa muthangeli nya nyimbi Oniri, gu khala mufumeli wa na Israyeli.

¹⁷ Khavbo avbo, Oniri ni va na Israyeli vatshavbo, va di khuga khu Gibhetoni vata randrela Tiriza.

¹⁸ Avbo Ziniri, a nga wona gukhuye lidhoropa li ngu hadza gu wandrwa, a di bela nyumbani nya wufumu, aya yi vbisa nari umomo, afa.

¹⁹ Uye a difa khu sighoho saye a si giridego, khu gu gira silo nya guvivbe mbeli ga Pfhumu Nungungulu, a gimbila khu ndzila ya Jerobhowamo, a nga gira sighoho nya ghohise va na Israyeli vatshavbo.

²⁰ Gasi yimbe mithumo ya Ziniri ni gikungo a giridego nya guwugele mufumeli, si lovidwe umo nya Libhuku nya Matimo ya Vafumeli va na Israyeli.

Oniri, mufumeli wa Israyeli

²¹ Khavbo avbo, vathu va na Israyeli va di kabanega khu mitsawa mivili, vambe va landrela Tibini, mwamana wa Ginati, gasi va mu emisa gu khala mufumeli, gimbe gipandre gi landrela Oniri.

²² Aholu, vathu va nga bani va gu landrela Oniri, va diri ni tshivba ngudzu gu pala avo va Tibini, mwamana wa Ginati. Tibini a difa, a fuma Oniri.

²³ Khu mwaga nya magumararu na moyo nya gufume ga Asa, mufumeli wa Judha, Oniri, a di phela gu fumela Israyeli, fumide likhumi na mivili myaga, hwane nya gu bani na gufumide livbandre na moyo myaga tigoni ga Tiriza.

²⁴ A di renga gigomo gya Samariya ga Semeri khu dzitaleta dzimbili nya parata. A di vbaha lidhoropa mugigomoni momo, a li rana khuye Samariya, khu kotani nya lina la Semeri, a nga bani ari mune nya gigomo gyogyo.

²⁵ Oniri, a di gira ugo guvivbidego mbeli ga Pfhumu Nungungulu, a di gira silo nya guvivbe ngudzu guvbindra vatshavbo va mu thangedego gufuma.

²⁶ A di landrisela dzindzila dzatshavbo a gimbidego khidzo Jerobhowamo, mwamana wa Nebhati, gumogo ni sighoho saye a giridego a nga ghohisa khiso va na Israyeli, gu kala a wusa likhulo la Pfhumu Nungungulu wa Israyeli, khu gu khozela vambe vanungungulu va si phasigo gilo.

²⁷ Gasi khu yimbe mithumo ya Oniri, iso a giridego, ni tshivba yaye a yi yeyedzidego, si lovidwe umo nya Libhuku nya Matimo ya Vafumeli va Israyeli.

²⁸ Oniri lade gumogo ni vavelegi vaye, dzingidwe dhoropani ga Samariya, a gu tshikedzwa vbagikhalotunu nya wufumu, khu mwanaye Akabi.

²⁹ Akabi, mwamana wa Oniri, phede gu fumela Israyeli, khu mwaga nya magumararu na livbandre na miraru (38) nya gufume ga Asa, mufumeli wa Judha. Akabi, mwamana wa Oniri, fumede va na Israyeli, nari khu Samariya, magumavili na mivili myaga.

³⁰ Akabi a di gira ugo guvivbidego mbeli ga Pfhumu Nungungulu, ngudzu guvbindra avo va mu thangedego gufuma.

³¹ Kha nga kodwa basi khu gu gira sighoho si giridwego khu Jerobhowamo, mwamana wa Nebhati, gu diga isoso, a di dzegana ni Jezabheli, nyamahegyane wa Etibhahali, mufumeli wa Sidhoni, a diya khozela Bhahali, a khidzima mbeli gwaye.

³² A di emisa giluvelo gi lumbago Bhahali, nyumbani ga Bhahali, a yi vbahidego Samariya.

³³ Akabi giride gambe gifananiso gya Asitaroti, a engedzela gu gorosa Pfhumu Nungungulu wa Israyeli, khu gu gira silo nya gunyenyeze ngudzu guvbindra vafumeli vatshavbo va na Israyeli, va mu thangedego gufuma.

³⁴ Matshiguni gwaye, Hiyeli, wa na Bheteli, a di vbahedza Jeriko. Gikhati a nga bani na gu vegedzela giseketelo, a difa mwanaye nya matiwula Abhiramo. Avbo a nga bani na gu vegedzela malimba yakone, a difa mwanaye nya mahegisela Segubi, mayelano nidzo a nga bani na gu ganede khidzo Pfhumu Nungungulu khu ga Josuwa, mwamana wa Nuni.