1 Dzipfhumu 12 - Bhibhiliya Nya Guage

Gukabanega nya mufumo ni nayo nya wukhongeli

¹ Robhowamo a di hongola Sikemi, kholu vatshavbo va na Israyeli va di tombanide iyoyo gasi guya mu wumbela gu khala mufumeli.

² Jerobhowamo, mwamana wa Nebhati, na pwide mahungu yaya na ngari tigoni ga Egipito, a nga bani a gu vbanyela iyo khu guthava mufumeli Solomoni,

³ va di rumela gu mu ranisa. Jerobhowamo ni tshangano watshavbo wa na Israyeli, va dita vata ganela ni Robhowamo, khavo:

⁴ “Babe wago a hi lemedzide khu mithumo nya gulemele; gasi uwe olu hi vbevbugisele ga mithumo yoyo nya wugumbi hi rwegidwego khu babe wago, ni kanga yoyu nya gulemele a hi handzegidego magatani gwathu, ethu hi na gu thumela.”

⁵ Uye a di hakha, khuye: “Bwelelani! Hwane nya matshigu mararu, mu na wuya gambe gwangu.” Vathu va di hongola.

⁶ Mufumeli Robhowamo, a di rana vasingalagadzi ma nga bani ma ninga wusingalagadzi babe waye Solomoni na nga gu vbanya, a ta va wudzisa, khuye: “Phindrulo muni nyi na ningago vathu vava?”

⁷ Avo va di ganela naye va mu embela, khavo: “Muhuno wa gu yingisa vathu vava, u va hakha gwadi, u ganela navo khu magana nya yadi, avo va na khala sithumi sago matshigu yatshavbo.”

⁸ Aholu, uye kha nga thela kota khu wusingalagadzi a nga ningwago khu madhota, a di ya lomba mawonelo ga madzaha a nga dandrago navo, ma nga bani na mari vbafuvbi gwaye ma mu thumela.

⁹ A di va embela, khuye: “Mwari khenu nyi va ninga phindrulo muni vathu vava va nga, khavo: Hi vbevbugisele rwalo hi rwegidwego khu babe wago?”

¹⁰ Madzaha ma nga dandrago naye, ma di mu embela, khayo: Vathu va ngatago avbo gwago va ta, khavo: Hi vbevbugisele rwalo hi rwegidwego khu babe wago; u na va phindrula, khuwe: Ginyalana gyangu gi khongolo guvbindra giwunu gya babe wangu.

¹¹ Kha nga olu babe wangu a mi rwegidego rwalo nya gulemele, eni nyi na engedzela rwalo wanu, wu lemela ngudzu guvbindrisa; babe wangu a di mi tsayisa khu lipitso, eni nyi na mi tsayisa khu dzihume.

¹² Khavbo avbo, khu hwane nya matshigu mararu, a dita Jerobhowamo ni vathu vatshavbo ga Robhowamo, kha nga idzo a nga bani na ganede khidzo, khuye: “Mu na wuyani avbo gwangu hwane nya matshigu mararu.”

¹³ Mufumeli a di va hakha khu gigaha, kholu kha nga landra wusingalagadzi a nga ningwago khu madhota.

¹⁴ A di va hakha kha nga idzo a nga embedwago khidzo khu madzaha, khuye: “Babe wangu lemedzide rwalo wanu, aholu eni nyi nga na gu wu engedzela gambe gulemela; babe wangu, a mi tsayiside khu mapitso, aholu eni nyi na mi tsayisa khu dzihume.”

¹⁵ Khu guralo, mufumeli kha nga yingisa magana ya vathu, kholu gikungo gegi, gi di guta khu ga Pfhumu Nungungulu, gasi guya tiyisa magana a ganedego khu likana la muprofeti Ayiya, wa Silo, ga Jerobhowamo, mwamana wa Nebhayoti.

¹⁶ Avbo vatshavbo va na Israyeli, va nga wona gukhavo mufumeli kha va yingisi, vathu va di engedza va ninga phindrulo ga mufumeli, khavo: “Gasi giavelo muni hi gi manego ethu ga Dhavhidhe? Thomba muni hi gu nayo ni mwamana wa Jese? Va na Israyeli, bwelelani mitshatshani gwanu! Uwe Dhavhidhe, wonelela wabune ndranga yago!”

¹⁷ Robhowamo, a di fumela basi va na Israyeli va nga bani va vbahide madhoropani ya na Judha.

¹⁸ Khavbo avbo, mufumeli Robhowamo, a di rumela Adhoramo, a nga bani a gu thangela mithumo nya gibhalu; aholu va na Israyeli vatshavbo va di mu pfara khu siwindri afa. Khavbo avbo, mufumeli Robhowamo, a di vbiredzela gukhilela kareta yaye a thavela Jerusalema.

¹⁹ Gukhugela avbovbo, va na Israyeli va di hambana ni nyumba ya Dhavhidhe kala na muhuno.

²⁰ Avbo vatshavbo va na Israyeli va ngapwago gupwani Jerobhowamo wide khu Egipito, va di rumela guya mu rana va ta gira tshangano, va di mu emisa gu khala mufumeli wa Israyeli gwatshavbo; mwalo gambe a nga dzumela gu landrela nyumba ya Dhavhidhe, vbavbandze basi ga lihundzu la Judha.

²¹ Avbo Robhowamo a nga vbohago Jerusalema, a di tombanisa nyumba yatshavbo ya Judha ni lihundzu la Bhejami, a mana tengo nya lizana ni livbandre na mararu magumi mazana (180.000) vama nya gudwane nyimbi, gasi guya dwana ni va na Israyeli va wusedza mufumo wa Robhowamo, mwamana wa Solomoni.

²² Khavbo avbo, magana ya Nungungulu ma dita ga Semaya, muthu wa Nungungulu ma ta khayo:

²³ “Embela Robhowamo, mwamana wa Solomoni, mufumeli wa Judha, ni mahundzu ya Judha ni ya Bhejami, ni vambe vathu, khuwe:

²⁴ Pfhumu Nungungulu a ngu ganela kharati, khuye: Mu nga dugi mu ya dwana ni vandriyanu va na Israyeli, muthu ni muthu a na bwelele gaya gwaye, kholu eni kheni nyi giridego thumo wowu.” Avo va di yingisa magana ya Pfhumu, va bwelela magaya gwawe kha nga idzo Pfhumu Nungungulu a nga ganelago khidzo.

²⁵ Jerobhowamo a di vbahedza Sikemi, gigomoni gya Efrayimi, a khala umo, khu hwane a di khuga aya vbahedza Penuweli.

Sifananiso sa Jerobhowamo

²⁶ Jerobhowamo a di pimisa khu monyoni gwaye, khuye: “Olu kamwe mufumo wu na wuya nyumbani ga Dhavhidhe.

²⁷ Vathu vava va gu gwela Jerusalema vaya ningela miphaselo Nyumbani ga Pfhumu Nungungulu, myonyo ya vathu vava yi na bwelela ga mune wawe, Robhowamo, mufumeli wa Judha.”

²⁸ Hwane nya gu bani a dzi wudziside, mufumeli a di gira simombyana sivili nya ndralama; a embela vathu, khuye: “Enu mu ngu garala khu gu gwela Jerusalema, kha mu va woni ava vanungungulu vanu, enu va na Israyeli, va nga mi dusani khu tigoni ga Egipito.”

²⁹ A di vega gimombyana gimwegyo Bheteli, gimbe aya gi vega Dhani.

³⁰ Khu magirelo yaya, gu di vanga gighoho nya gikhongolo ngudzu, kholu vathu va di hongola tigoni ga Dhani, guya khozela gimombyana.

³¹ Jerobhowamo a di vbaha siluvelo nya vanungungulu nya malipha musigomoni, a emisa vaphasi nya mhamba va vbakari nya vathu nya vanyalidede, va nga bani va siri sanana sa Levhi.

³² A gira buzo khu litshigu nya likhumi na livbandre khu ngima nya livbandre na wuraru, nya gufanane ni buzo wu nga bani wu girwago tigoni ga Judha, a ningela miphaso vbagiluvelotunu. A di gira isoso tigoni ga Bheteli, avbo a nga phaselago simombyana a nga bani na si giride. A emisa gambe vaphasi nya mhamba umo nya siluvelo saye nya vanungungulu nya malipha.

³³ Khu litshigu nya likhumi na livbandre nya ngima nya livbandre na wuraru, litshigu li nga hathwago khuye, a di ningela miphaso vbagiluvelotunu gi nga bani na giri Bheteli. Khu kharati, uye a di emisa buzo wa na Israyeli a hongola vbagiluvelotunu gasi guya vbisa libani.