1 Dzipfhumu 11 - Bhibhiliya Nya Guage

Gughoha ga Solomoni ni likhulo la Nungungulu

¹ Mufumeli Solomoni a di haladza vanyamayi nya vangi va mambe mayigo; gu diga nyamahegyane wa Faro, dzegide gambe vambe vanyamayi va Mowabhi, va Amori, va Edhomi, va Sidhoni ni Vahiti.

² Vanyamayi vovo va di gu dugela ga mafumbo yale Pfhumu Nungungulu, a nga layago va na Israyeli, khuye: “Mu nga dzegini vanyamayi vawe va khala vagadzi vanu, ni avo navo, va nga dzegi vanyamahegyane vanu, va khala vagadzi vawe; kholu, khu lisine, va na ndreyisa myonyo yanu yi landrela vanungungulu vawe.” Aholu, Solomoni a di haladzana navo.

³ Solomoni a diri ni livbandre na mavili mazana (700) vagadzi va vbawufumutunu, ni mazana mararu (300) sibhayi, vanyamayi vovo vaye, va di ndreyisa monyo waye.

⁴ Kholu gikhati Solomoni a nga gumbago, vanyamayi vava, va di ndreyisa monyo waye, a gu landrela vambe vanungungulu, monyo waye gambe kha wa nga tumbega ga Pfhumu Nungungulu waye, kha nga idzo a nga tumbegago khidzo babe waye Dhavhidhe.

⁵ Kholu Solomoni a di khozela Asitaroti, nungungulu wa Vasidhoni, ni Malikomi, nungungulu nya manyala wa va na Amoni.

⁶ Khu guralo, Solomoni a di thuma mithumo yi vivbidego mbeli ga Pfhumu Nungungulu, kha nga landra gwadi ndzila ya Pfhumu Nungungulu, kha nga babe waye Dhavhidhe.

⁷ Khavbo avbo, Solomoni a di vbaha gigomoni gu nga khedzanago ni Jerusalema, giluvelo nya guphasele avbo Khemosi, nungungulu nya manyala wa Mowabhi, ni Moloki, manyala ya na Amoni.

⁸ A di gira gambe kharato ni ga vagadzi vaye va mambe mayigo, a di va vbisela libani ni gu girela miphaso vanungungulu vawe.

⁹ Khu guralo, Pfhumu Nungungulu a di goroga khu Solomoni, kholu monyo waye wu nga pfhurarela Pfhumu Nungungulu wa Israyeli, uye a dzi wonegisidego nyondro mbili avbo gwaye,

¹⁰ a mu leletela gukhuye a si dzi ningedzeli ga vambe vanungungulu. Aholu uye kha nga vegisa sileletelo sa Pfhumu Nungungulu.

¹¹ Khu guralo, Pfhumu Nungungulu a di embela Solomoni, khuye: “Kha nga olu u giridego esi, u ngamba sayisa gidzumeledzwano gyangu ni sileletelo sangu, nyi gu rumidego, khu lisine nyi na dusa mufumo wago, nyi wu ningela ga githumi gyago.

¹² Aholu, kha nyi na nga gira olu na wu nga gu vbanya, khu kotani nya lihaladzo nyi gu nalo ni babe wago Dhavhidhe; nyi na wu dusa khu mandzani ga mwamana wago.

¹³ Aholu kha nyi na wandra watshavbo mufumo, nyi na tshiyela mwanago lihundzu limwedo, khu kotani nya lihaladzo nyi gu nalo ni githumi gyangu Dhavhidhe, ni lidhoropa la Jerusalema nyi li hathidego.”

Valala va Solomoni

¹⁴ Pfhumu Nungungulu a di rumela nala ga Solomoni, a gu Hadhadhi Muedhomi, a nga bani ari wa lihundzu la mufumeli wa Edhomi.

¹⁵ Kholu gikhati Dhavhidhe a nga dwana ni va na Edhomi, Jowabhi, ndruna nya nyimbi, a nga bani na hongode iyoyo guya dzinga avo va ngafago, a diya sasela vama vatshavbo va Edhomi.

¹⁶ Kholu Jowabhi ni masotshwa yatshavbo ya na Israyeli, va di ghovide vbale livbandre na moyo migima, kala va sasela vama vatshavbo va Edhomi.

¹⁷ Aholu Hadhadhi ni vambe vama va Edhomi, gumogo ni sithumi sa babe waye, va dzi kodzide gututuma va thavela tigoni ga Egipito; aholu Hadhadhi a di ngari gyanana.

¹⁸ Va di khuga khu Medhiyani vata Parani, va gu dzega vathu va Parani va hongola navo Egipito, ga Faro, mufumeli wa Egipito, a nga hakhago Hadhadhi ni vathu vaye, a va tumbisa gu va hodzisa ni gu va ninga wulanga.

¹⁹ Hadhadhi a di mana wuhigo mbeli ga Faro, a mu ninga namu waye, ndruye wa mwangadzi waye, pfhumugadzi Tafinisi.

²⁰ Ndruye wa Tafinisi, a di mu velegela gyanana nya gikhwathana, nya guranwe pwani Genubati, gi nga dandriswago khu Tafinisi nyumbani nya wufumu ga Faro. Genubati a di vbanya gumogo ni sanana sa Faro.

²¹ Hadhadhi a dipwa na ngari khu Egipito nya gupwani Dhavhidhe lade gumogo ni vavelegi vaye, ni gupwani muthangeli nya nyimbi Jowabhi fude, Hadhadhi a di embela Faro, khuye: “Nyi dige nyi bwelela tigoni gwathu.”

²² Aholu Faro, a di mu phindrula, khuye: “Ginani gi gu kenelelago avbo gwangu, gukala u vbweta gubwelela tigoni gwanu?” Uye a di hakha, khuye: “Kha nyi hamugi gilo, aholu nya guvbweta gu bwelela.”

²³ Nungungulu a di wusa gambe mumbe nala wa Solomoni, Razomi, mwamana wa Eliyadha, a nga bani na tutumide a thava mune waye Hadhadhezeri, mufumeli wa Zobha.

²⁴ Gikhati Dhavhidhe a nga bani na gu sasela vathu tigoni ga Zobha, Razomi, a di tombanisa vama vbafuvbi gwaye, a khala uye muthangeli nya tsawa. Va di hongola Dhamasiko, vaya vbaha iyoyo. Razomi va mu vega a khala mufumeli wa Dhamasiko.

²⁵ Uye a diri nala wa Israyeli, matshigu yatshavbo nya guvbanye gwa Solomoni, a di engedzela guvivba ga Hadhadhi. Uye a di fumela Siriya, a wona Israyeli kha nga nala waye.

Jerobhowamo a ngu wugela Solomoni

²⁶ Jerobhowamo, mwamana wa Nebhati, wa na Efrayimi wa tigoni ga Zereda, mayi waye a nga bani ari noni, nya gupwani khu Zeruwa, ambari a nga bani ari githumi gya Solomoni, uye nuye a di wugela mufumeli.

²⁷ Givangelo gi nga mu girago a wugela mufumeli, khegi: Solomoni a di gu vbaha likhokhola li ranwago pwani Milo, gasi gu tshikedzela libhiyo nya lidhoropa la babe waye Dhavhidhe.

²⁸ Jerobhowamo, a diri mwama nya tshivba, nya ndrena, Solomoni na wone nya gukhuye lidzaha lile li ngu dzi garadza khu tshivba, a di mu vega gu khala muthangeli nya vathumegeli vatshavbo va nyumbani ga Josefe.

²⁹ Avbo Jerobhowamo a nga khugago khu Jerusalema, nari ndzilani, a di tshangana ni muprofeti Ayiya wa Silo, na ambade ngandzu nya yiphya. Va diri panini vonga va vavili.

³⁰ Ayiya a di dzega ngandzu nya yiphya a nga bani ari nayo, a yi pferulela khu likhumi na sivili sipandre.

³¹ A embela Jerobhowamo, khuye: Dzega mikeka yeyi nya likhumi, kholu Pfhumu Nungungulu wa Israyeli, Wari, khuye: Wona nya gukhuwe nyi na dusa mufumo khu mandzani ga Solomoni, uwe nyi na gu ninga likhumi mahundzu ya Israyeli.

³² Aholu uye a na tshala ni lihundzu limwedo basi, khu kotani nya lihaladzo nyi gu nalo ni githumi gyangu Dhavhidhe, ni lihaladzo nyi gu nalo khu Jerusalema, lidhoropa nyi li hathidego vbakari nya mahundzu yatshavbo ya Israyeli.

³³ Nyi na gira kharato kholu va nyi pfhurarede vaya khozela Asitaroti, nungungulu wa Vasidhoni, ni Khemosi nungungulu wa va na Mowabhi, ni Milikomu, nungungulu wa sanana sa Amoni, va si gimbili khu dzindzila dzangu, gasi va gira silo nya gululame mahoni gwangu, ni guti milayo ni sileletelo sangu, kha nga babe waye Dhavhidhe.

³⁴ Aholu kha nyi na wandra watshavbo mufumo mandzani gwaye, kholu nyi na wu tiyisa mandzani gwaye, matshigu yatshavbo nya guvbanye gwaye, khu kotani ya githumi gyangu Dhavhidhe, oyu nyi mu hathidego, bwelo khavbo a sayisa milayo ni sileletelo sangu.

³⁵ Aholu, nyi na wu dusa mandzani ga mwanaye, nyi ninga uwe likhumi mahundzu.

³⁶ Nyi na tshiya lihundzu limwedo basi mandzani ga gyanana gyaye, gasi githumi gyangu Dhavhidhe gi kodza gu manega gikhati gyatshavbo na giri mwenge mbeli gwangu ndrani ga Jerusalema, lidhoropa nyi li hathidego gasi gu vega umo lina langu.

³⁷ Gasi uwe, nyi na gu gira u fuma satshavbo kha nga idzo u na gu suvago khidzo monyoni gwago; uwe u na khala mufumeli wa Israyeli.

³⁸ Wa gu yingisa satshavbo nyi na gu rumago, u gimbila khu dzindzila dzangu, u thuma mithumo nya gululame mbeli gwangu, u sayisa milayo ni sileletelo sangu, kha nga idzo a giridego githumi gyangu Dhavhidhe, Eni nyi na bani nyiri nago, nyi na gu vbahela nyumba yi tiyidego, kha nga nyi vbahedego Dhavhidhe, ni gu gu ninga Israyeli.

³⁹ Khu magirelo yoyo, nyi na poyila livelego la Dhavhidhe, aholu khandri kala gupindruga.

⁴⁰ Khavbo avbo, Solomoni a di vbweta gu songa Jerobhowamo, aholu Jerobhowamo a di thavela Egipito, ga Sisaki, mufumeli wa Egipito, a di ya khala iyoyo kala gufa ga Solomoni.

Gufa gwa Solomoni

⁴¹ Gasi mithumo yatshavbo ya Solomoni, ni satshavbo iso a giridego, ni guti gwaye, satshavbo si lovidwe umo nya Mabhuku nya Matimo ya Solomoni.

⁴² Solomoni fumide Jerusalema gwatshavbo ni Israyeli gwatshavbo, magumana myaga.

⁴³ Khavbo avbo, Solomoni lade gumogo ni vavelegi vaye, dzingidwe dhoropani ga babe waye Dhavhidhe. Tshikhedzidwe vbagikhalotunu gwaye nya wufumu khu mwanaye Robhowamo.