1 Dzipfhumu 10 - Bhibhiliya Nya Guage

Pfhumugadzi ya Sabha yi ngu endrela Solomoni

¹ Pfhumugadzi ya Sabha na yi pwide ndruma ya Solomoni khu mahungu nya wudhumo a wu manidego khu gu rungudza lina la Pfhumu Nungungulu, a dita mu linga khu siwudziso nya gulemele.

² A di vboha Jerusalema nari ni gikwata nya gingi nya dziphelegedzi, ni dzingameriya na dzi rwade mafura nya gunungele ni ndralama nya yingi ni siwindri nya lisima nya gukhedzige. Na vbohide ga Solomoni, a di mu wudzisela satshavbo si nga bani si tade monyoni gwaye.

³ Solomoni a di phindrula satshavbo siwudziso saye; gimwalo ni gimwegyo giwudziso nya gugaradze ngudzu, mufumeli Solomoni a ngamba gi phindrula.

⁴ Pfhumugadzi ya tigoni ga Sabha, na yi wonide guti gwatshavbo gwa Solomoni, ni nyumba a nga yi vbahago,

⁵ ni guhodza gwa vbamezatunu gwaye, ni makhalelo ya avo va mu thumelago, ni mavbanyelo ya dzindruna dzaye, ni maambalelo yawe, ni vaphari nya sikombe saye, nidzo va ningelago khidzo ningelo Nyumbani ga Pfhumu Nungungulu, a di vbela tshivba khu gusamala.

⁶ A di embela mufumeli Solomoni, khuye: “Mahungu nyi ma pwidego na nyiri tigoni gwangu, va nga bani va gu ganela khu guti ni wugengeli wago, lisine kamwe.

⁷ Aholu eni nyi di si khodwi khu magana yoyo, kala nyi dzudego nyita si wona khu maho yangu. Kha va nga nyi pwadzela ni sidugwana. Guti gwago, wudhumo ni thomba yago, si ngu vbindra ngudzu ndruma yago nyi yi pwidego.

⁸ Va kategide vathu vago, si kategide sithumi sesi sago, si guromo mbeli gwago gikhati gyatshavbo si yingisa guti gwago!

⁹ A na bongwe Pfhumu Nungungulu wago, a tsakisidwego khuwe, khu gu gu vega vbagikhalotunu nya wufumu wa Israyeli; kholu Pfhumu Nungungulu a ngu gola Israyeli khu lihaladzo nya gupindruge, khu guralo, a gu emiside gu khala mufumeli, gasi u lamula khu gululama.”

¹⁰ Hwane nya ugo, a di ningela ga mufumeli, lizana ni magumavili (120) dzitaleta nya ndralama, ni mafura nya mangi nya gunungele, ni siwindri nya lisima nya gukhedzige; gima ni litshigu limwedo kha gu ngata mafura nya gunungele nya mangi ngudzu, kha nga ayo Pfhumugadzi ya Sabha a nga reselago mufumeli Solomoni.

¹¹ Ni mataro ya Hiramo, ma nga bani ma gu resa ndralama khu tigoni ga Ofiri, ma di resa gambe mapulango nya yadi nya simbo nya bandrwa ni siwindri nya gukhedzige.

¹² Mapulangu yaya nya simbo nya bandrwa, khayo mufumeli a giridego khayo misimbo nya gumburisele khiyo Nyumbani ga Pfhumu Nungungulu, ni nyumbani ga mufumeli, ni gu gira sitendre ni dzimbila dza vaembeleli, mapulango nya nga aya nya bandrwa, gima kha ma nga reswa gambe nya mangi, gambe gima ma si gu wonwi mapulango nya gufanane, kala na muhuno.

¹³ Mufumeli Solomoni a di ningela nuye ga Pfhumugadzi ya Sabha, satshavbo iso a nga mu lombago ni gu si gola khu monyo waye, gu diga iso a nga mu ningago uye mune khu guhaladza ga mufumeli Solomoni. Khavbo avbo, pfhumugadzi yi di bwelela tigoni gwaye, iyo gumogo ni vathu vaye.

Dzithomba dza Solomoni

¹⁴ Ndralama yi nga bani yi gu reswa ga Solomoni, khu mwaga ni mwaga, yi diri pimo nya livbandre na limwedo mazana ni livbandre na limwedo magumi ni livbandre na mweyo (666) dzitaleta nya ndralama,

¹⁵ gu diga nya edzi dza va nya wugwewo, ni varengisi, vafumeli vatshavbo va Arabhiya ni vamwamangulu vatshavbo va tigoni momo.

¹⁶ Mufumeli Solomoni, rumede gambe gu girwa, mazana mavili (200) sitshangu nya gugirwe khu ndralama nya guhutwe, gitshangu ni gitshangu, gulemela nya igyo, gi diri pimo nya livbandre na limwedo mazana (600) dzisekeli nya ndralama.

¹⁷ A di gira gambe mazana mararu (300) sitshangu nya ndralama nya guhutwe, gitshangu ni gitshangu, gi diri ni kilu tharu nya ndralama, mufumeli a diya si vega umo nya Nyumba nya wufumu ya Khabini ga Libhanoni.

¹⁸ Mufumeli a di gira gambe gikhalo nya wufumu nya gikhongolo khu magwaha nya ndzofu, a gu gi londra khu ndralama nya guhutwe.

¹⁹ Gikhalo gegi nya wufumu, gi diri ni livbandre na gimwegyo sigandro, vbatshani gwaye khu hwane, gi diri girendzelekwane, khu wubambe gakone gi diri ni sikhighelo sivili nya mawogo ni dzinghala dzimbili khu wubambe nya mawogo.

²⁰ Umo nya livbandre na gimwegyo sigandro, khu wubambe gakone, gu diri ni likhumi na dzimbili dzinghala, eno ni eno. Gima kha wu nga manega wumbe mufumo wu nga gira thumo nya gufanane ni owu.

²¹ Satshavbo sombo a nga bani a gu sela khiso mufumeli Solomoni, a diri sa ndralama, ni satshavbo si nga bani siri Nyumbani nya wufumu ya Khabini ga Libhanoni, si diri sa ndralama nya guhutwe; gu diri mwalo ni gimwegyo nya parata, kholu matshiguni ya Solomoni, parata yi diri mwalo lisima.

²² Mufumeli a diri ni mataro phwani ga Tarisisi, ma nga bani ma gu longoloka ni mataro ya mufumeli Hiramo. Khu guvbela nya myaga miraru, mataro ya Tarisisi, ma di gu resa ndralama, parata, magwaha nya dzindzofu, dzifene ni dzipavhawu.

²³ Khu guralo, mufumeli Solomoni, a di vbindra vafumeli vatshavbo va mafuni, khu dzithomba ambari khu guti.

²⁴ Vathu vatshavbo va mafuni, va di vbweta gu wonana ni Solomoni, ni gupwa wugengeli owu Nungungulu a nga bani a wu vegide monyoni gwaye.

²⁵ Muthu ni muthu a di resa ningelo waye, sombo nya parata, nya ndralama, guambala, matshari, mafura nya gunungele, dzikavalu ni dzimula, va di gira isoso khu mwaga ni mwaga.

²⁶ Solomoni a di hengeledzede dzikareta ni vakhileli nya dzikavalu, avbo a nga tshanganisa likhumi na mana mazana (1.400) dzikareta, likhumi na mavili magumi mazana (12.000) vakhileli nya dzikavalu, a va vega dhoropani nya dzikareta, vambe va di tshala vbafuvbi gwaye Jerusalema.

²⁷ Mufumeli a di gira Jerusalema gu manega na guri ni parata nya gutale kha nga siwindri ni misimbo nya sedhari nya yingi gu fanana ni migindru ya panini.

²⁸ Dzikavalu dza Solomoni dzi di gu reswa khu Egipito ni Silisiya, vaghwevhi va mufumeli va di hongola vaya dzi renga khu tengo wu vegidwego.

²⁹ Kareta yi nga bani yi gu rengwa tigoni ga Egipito, yi di rana tengo nya livbandre na limwedo mazana (600) dzisikulu nya parata, tengo nya kavalu ni kavalu, a diri lizana ni livbandre magumi (150) dzisikulu; avo va di gira idzosaye kharato ni ga vafumeli nya Vahiti ni vafumeli va Siriya va nga bani va gu rumisa mataro yawe guya renga.