1 Dzikoronika 7 - Bhibhiliya Nya Guage

Situgulwana sa Isakari

¹ Sanana sa Isakari si diri esi: Tola, Puwa, Jasubi ni Seniromi; satshavbo a diri sina.

² Sanana sa Tola khesi: Uzi, Refaya, Jeriyeli, Jamayi, Yibisamu ni Samuweli, vathangeli nya dzinyumba; situgulwana sa Tola; vama nya tshivba umo nya livelego lawe, matshiguni ya Dhavhidhe, tengo wawe a diri magumavili na mavili magumi ni livbandre na limwedo mazana vama (22.600).

³ Gyanana gya Uzi a diri Iziraya; sanana sa Iziraya si diri esi: Mikayeli, Obhadhiya, Joyele ni Isiya, satshavbo si diri livbandre; avo vatshavbo va diri vathangeli.

⁴ Umo nya livelego lawe, khu makhalelo nya dzinyumba dzawe, va diri magumararu na livbandre na limwedo magumi mazana (36.000) vama va dzi dongisedego guya nyimbitunu, kholu avo va diri ni vanyamayi nya vangi ni sanana nya singi.

⁵ Va ndriyawe umo nya dzinyumba latshavbo la Isakari; vama nya dzindrena, va diri livbandre na mararu ni livbandre na mavili magumi magumi mazana (87.000) vama na va lovedwe khu milongoloko nya guvelegwe gwawe.

Situgulwana sa Bhejami

⁶ Sanana sa Bhejami si diri esi: Bhela, Bhekeri ni Jedhiyayeli; satshavbo a diri siraru.

⁷ Sanana sa Bhela si diri esi: Hesibhoni, Uzi, Uziyeli, Jerimoti ni Iri; satshavbo si diri livbandre; va diri vathangeli nya dzinyumba dzawe, vari vama nya tshivba, tengo wawe va diri magumavili na mavili magumi mazana ni magumararu na vana (23.034) vama va nga lovedwago khu gilovela nya longoloko wawe.

⁸ Sanana sa Bhekeri si diri esi: Zimira, Jowasi, Eliyezeri, Eliyowenayi, Oniri, Jerimoti, Abhiya, Anatoti ni Alimeleti; vatshavbo va diri sanana sa Bhekeri.

⁹ Tengo wawe, umo nya gilovela nya longoloko wawe, mayelano khu situgulwana sawe, ni vathangeli nya linyumba lawe vama nya dzindrena va diri magumavili magumi mazana ni mazana mavili (20.200).

¹⁰ Mwamana wa Jedhiyayeli si diri Bhilani. Sanana sa Bhilani si diri esi: Jewusi, Bhejami, Ewudhi, Kenahana, Zetani, Tarisisi ni Ayisahari;

¹¹ vatshavbo vava va diri sanana sa Jedhiyayeli, va diri vathangeli nya dzindranga nya linyumba lawe, na vari vama nya dzindrena, tengo wawe wu diri likhumi na livbandre na mavili magumi mazana ni mazana mavili (17.200), na va dongisedwe guya nyimbitunu.

¹² Supimi ni Hupimi, va diri sanana sa Iri; gasi Husimi, a diri gyanana gya Ayeri.

¹³ Sanana sa Nafitali si diri esi: Jaziyeli, Guni, Jezeri ni Salumi, ava va diri sanana sa Bhila.

Situgulwana sa Manasi

¹⁴ Mwamana wa Manasi a diri oyu: Asiriyeli, a nga velega ni gibhayi nya Musiriya, a nga velegago Makiri, babe wa Gileyadhi.

¹⁵ Makiri, mwangadzi waye a diri ndruye wa Hupimi ni Supimi. Lina laye a diri uye Mahaka; lina la ndruye wa Makiri a diri uye Selofeyadi, uye a di velega vanyamahegyane basi.

¹⁶ Mahaka ngadza Makiri, a di velega gyanana nya gikhwathana a gi thangisa lina la Peresi; ndriyaye a diri uye Seresi. Sanana sa Peresi si diri Ulamo ni Rekemi.

¹⁷ Mwamana wa Ulamo, a diri uye Bhedhani. Avo va diri sanana sa Gileyadhi, gyanana gya Makiri, gyanana gya Manasi.

¹⁸ Ndriyaye nya nyamahegyane, a diri Hamoleketi a nga velegago Isodhe, Abhiyezeri ni Makala.

¹⁹ Sanana sa Semidha si diri esi: Ayiyani, Sikemi, Liki ni Aniyamo.

Situgulwana sa Efrayimi

²⁰ Mwamana wa Efrayimi a diri, Sutela, a nga velegago Bheredi; uye nuye a velega Tahati; uye nuye a velega Eliyadha; uye nuye a velega Tahati;

²¹ uye nuye a velega Zabhadi; uye nuye a velega Sutela; gumogo ni Ezeri ni Eleyadi, va nga songwago khu vama nya sivelegwa sa tigoni ga Gati, kholu va nga relela gasi guyaba sifuyo sawe.

²² Babe wawe Efrayimi, a di vbedza matshigu nya gulaphe na gu va lila; khavbo avbo, vandriyaye va diya mu tangadzisa.

²³ Khu hwane nya isoso, a di tshangana ni mwangadzi waye, uye a di khura mimba a velega gikhwathana a nga gi thangisago lina la Bheriya, kholu silo si nga bani si si gimbili gwadi ndrangani gwaye.

²⁴ Mwanaye nya nyamahegyane a diri uye Seyera, khuye a nga vbahago lidhoropa la Bheti-horoni khu releloni ni gigomoni, kha nga gambe la Uzeni-Seyera.

²⁵ Mwamana wa Bheriya a diri uye Refa, uye nuye a velega Resefe, uye nuye a velega Tela, uye nuye a velega Tahani,

²⁶ uye nuye a velega Ladhani, uye nuye a velega Amiyudhi, uye nuye a velega Elisama,

²⁷ uye nuye a velega Nuni, uye nuye a velega Josuwa.

²⁸ Thomba ni dzindranga dzawe, dzi diri Bheteli ni mayigwana yaye; khu Khugadambo, Maharani, khu Pfoladambo a diri Gezeri, ni mayigwana yaye, Sikemi ni mayigwana yaye, kala Aya ni mayigwana yaye.

²⁹ Mivbinganoni ya va na Manasi gu diri ni madhoropa ni mayigwana yaye a gu aya; Bheti-Seyani, ni mayigwana yaye, Tahanaki, ni mayigwana yaye, Megidho ni mayigwana yaye, Dhori, ni mayigwana yaye. Madhoropani momu gu di vbahide livelego la Josefa, mwamana wa Israyeli.

Situgulwana sa Aseri

³⁰ Sanana sa Aseri si diri esi: Yimina, Yisivha, Yisivhi, Bheriya ni Sera, ndriyaye nya nyamahegyane.

³¹ Sanana sa Bheriya khesi: Hebheri ni Malakiyeli; oyu khuye a nga bani nari babe wa Bherizaviti.

³² Hebheri khuye a nga velegago Jafileti, Someri, Hotamo ni Suwa, ndriyaye nya nyamahegyane.

³³ Sanana sa Jafileti khesi: Pasaki, Bhimali ni Asevhati; esi si diri sanana sa Jafileti.

³⁴ Sanana sa Someri si diri esi: Ayi, Roga, Jewuba ni Arani.

³⁵ Sanana sa ndriyaye Helemi si diri esi: Zofa, Yimina, Selesi ni Amali.

³⁶ Sanana sa Zofa si diri esi: Suwa, Hameferi, Suwali, Bheri, Inira,

³⁷ Bhezeri, Hodhi, Sama, Silisa, Itarani ni Bheyera.

³⁸ Sanana sa Jeteri si diri esi: Jefoni, Pisipa ni Ara.

³⁹ Sanana sa Ula si diri esi: Ara, Haniyeli ni Riziya.

⁴⁰ Vatshavbo vava va diri livelego la Aseri, vathangeli nya dzinyumba dza babe wawe, vama nya dzindrena nya tshivba, va hathidwego guya dwana nyimbi, vathangeli nya dzindruna, na va lovedwe khu longoloko nya mavelego yawe; tengo wawe wu diri magumavili na livbandre na limwedo magumi mazana (26.000) vama nya gu dzi kodze gu soma matshari va ya nyimbitunu.