1 Dzikoronika 5 - Bhibhiliya Nya Guage

Situgulwana sa Rubheni

¹ Sanana sa Rubheni, matiwula ya Israyeli (uye a diri matiwula aholu khu gu nyenyezisa lidawu la babe waye, wutiwula waye wu di dzegwa khu livelego la Josefe, mwamana wa Israyeli; khu guralo, umo nya longoloko nya linyumba lawe, uye kha sayedwa kha nga matiwula.

² Judha a diri ni tshivba vbatshani ga vandriyaye vatshavbo, wufumu wu dzude khavbo gwaye; aholu fanelo nya wutiwula, ya gu lumba Josefe.)

³ Sanana sa Rubheni, matiwula ya Israyeli khesi: Enoki, Palu, Eziromi ni Karimi.

⁴ Situgulwana sa Joyeli si diri esi: Semaya, babe wa Gogi, a nga bani ari babe wa Simaya,

⁵ babe wa Mika, a nga bani ari babe wa Reyaya, babe wa Bhahali,

⁶ a nga bani ari babe wa Bheyera uye a nga modwa khu Tigilati-Pileseri, mufumeli wa Asiriya a mu vbagela a mu yisa wugumbini, uye a diri nganagana ya na Rubheni.

⁷ Vandruye va Bheyera, mayelano khu gilovela nya lihundzu lawe, vathangeli vakone a diri Jeyeli ni Zakariya,

⁸ Bhela, mwamana wa Azazi, mwamana wa Sema, mwamana wa Joyele, va nga bani va vbahide gipandre gya Aroweri, kala Nebhu ni Bhahali-Meyomi;

⁹ va di vbahide navo khu phuvbo ga Khugadambo kala vbafuvbi ni giwulani, va vboha tsongoni wa Ewufrate, kholu mitshambi yawe yi andride ngudzu tigoni gwa Gileyadhi.

¹⁰ Matshiguni ya mufumeli Sawule, va di soma nyimbi va ya dwana ni va na Agari, va va pala, va khala avo mitshatshani gwawe, tigoni gwatshavbo gu girago vbingano ni Gileyadhi, khu phuvbo ga Khugadambo.

Situgulwana sa Gadhi

¹¹ Sanana sa Gadhi si di vbahide khu mbeli gwawe, tigoni ga Bhasani, kala Salika.

¹² Muthangeli wawe, a diri Joyele, Safani a diri uye gyandza gyaye; Jorayi ni Safati, avo navo va di gu khala Bhasani.

¹³ Gulandra khu dzinyumba dza vababe vawe, vandriyawe va diri ava: Mikayeli, Mesulamo, Sebha, Jorayi, Jakani, Ziya ni Hebheri, vatshavbo va diri livbandre na vavili;

¹⁴ ava khavo va nga bani vari sanana sa Abhiyayili, mwamana wa Huri, mwamana wa Jarowa, mwamana wa Gileyadhi, mwamana wa Mikayeli, mwamana wa Jesisayi, mwamana wa Jadhu, mwamana wa Bhuzi.

¹⁵ Ayi, mwamana wa Abidhiyeli, mwamana wa Guni, a diri uye muthangeli nya linyumba lawe.

¹⁶ Va di vbahide Gileyadhi, Bhasani ni mitalalani gwawe, kala mivbinganoni nya wuhaviselo wa Saromi.

¹⁷ Vatshavbo vava va lovedwe umo nya lihundzu lawe, gikhatini gya mufumeli Jotamo, mufumeli wa Judha, matshiguni ya Jerobhowamo, mufumeli wa Israyeli.

Matimo nya mahundzu ya khisikheyi gwa Joridhani

¹⁸ Sanana sa Rubheni, sa Gadhi ni gipandre gya va na Manasi, va diri dzindrena, va di gu kodza gu phara sitshangu ni matshari, ni gu khwandra siholoma, a diri vathu nya gugengele nyimbitunu, khu tengo nya magumana na mana magumi, ni livbandre na mavili mazana, ni livbandre na limwedo magumi (44.760) vama, va dzi dongisedego gu ya dwana nyimbi.

¹⁹ Va di soma gu ya dwana ni va na Hagari, va na Jeturi, va na Nafisi ni va na Nodhabi.

²⁰ Avo va di phasedzedwa gu dwana navo khu Pfhumu Nungungulu a nga ningelago va na Hagari va thega mandzani gwawe gumogo ni vaphasedzeli vawe; kholu vbakari nya litunga, avo va di rana Pfhumu Nungungulu, uye a di va yingisa, kholu avo va di vegide gitumbo avbo gwaye.

²¹ Va di phanga mitshambi nya sirengo sawe, a gu esi: Livbandre magumi magumi mazana (50.000) dzingameriya, mazana mavili ni livbandre magumi magumi mazana (250.000) dzinvuta, magumavili mazana (2.000) dziburu; ni lizana magumi mazana (100.000) vathu.

²² Kholu nya vangi va di fude khu gu songwa khu matshari kholu Pfhumu Nungungulu a di dzegide nyimbi yi khala yaye; va vbaha malangani yawe kala gikhati va nga vbagedwa va yiswa wugumbini.

²³ Gimbe gipandre nya lihundzu nya sanana sa Manasi, gi di khala tigoni mule gukhugela Bhasani kala Bhahali-Herimoni, ni Seniri, ni gigomoni gya Herimoni na vari vangi ngudzu.

²⁴ Vathangeli nya dzinyumba dzawe va diri ava: Eferi, Isi, Eliyeli, Aziriyeli, Jeremiya, Hodhavhiya ni Jadhiyeli, vadwani nya nyimbi ni vathu nya ndruma khu wuthangeli nya dzinyumba dzawe.

²⁵ Aholu avo va di ghohela Nungungulu wa vababe vawe; va dzi ningela ga vanungungulu va tigoni mule, va nga va wona na va gumbembiswa khu Nungungulu mbeli gwawe.

²⁶ Avbo Nungungulu wa Israyeli a nga kutsedzelago liphuvbo la Puli, mufumeli wa Asiriya, gumogo ni liphuvbo la Tigelati-Pileseri, mufumeli wa Asiriya, gu mola va na Rubheni, va na Gadhi ni gipandre nya lihundzu la na Manasi a va yisa Hala, Habhori ni Hara ni tsongoni wa Gozani, a va vbagela a va gira dzikhumbi umo va vbahidego umo kala na muhuno.

Situgulwana sa Levhi ni mithumo yawe madhoropani gwawe

²⁷ Sanana sa Levhi diri esi: Gerisoni, Khowati ni Merari.

²⁸ Sanana sa Khowati khesi: Aniramo, Isari, Hebroni ni Uziyeli.

²⁹ Sanana sa Aniramo khesi: Aroni, Mosi ni Miriyamu; sanana sa Aroni, khu Nadhabhi, Abhiyu, Eliyazari ni Itamari.

³⁰ Eliyazari a di velega Fineya; Fineya a velega Abhisuwa;

³¹ Abhisuwa a velega Bhuki; Bhuki a velega Uzi;

³² Uzi a velega Zeraya; Zeraya a velega Merayoti;

³³ Merayoti a velega Amariya; Amariya a velega Ayitubhi;

³⁴ Ayitubhi a velega Sadhoki; Sadhoki a velega Ayimahasi;

³⁵ Ayimahasi a velega Azariya; Azariya a velega Jowanani;

³⁶ Jowanani a velega Azariya, uye a nga bani ari muphasi nya mhamba ndrangani ga Solomoni, eyi a nga bani a yi vbahide Jerusalema.

³⁷ Azariya a di velega, Amariya; Amariya a velega Ayitubhi;

³⁸ Ayitubhi a velega Sadhoki; Sadhoki a velega Salumi;

³⁹ Salumi a velega Hilikiya; Hilikiya a velega Azariya;

⁴⁰ Azariya a velega Zeraya; Zeraya a velega Jeyozadhaki;

⁴¹ Jeyozadhaki a di modwa aya khala khumbi, gikhati Pfhumu Nungungulu a nga rumelago Nabhukodhonosori gu mola va na Judha ni va Jerusalema a va yisa wugumbini.