1 Dzikoronika 29 - Bhibhiliya Nya Guage

Miningelo ya Dhavhidhe ni ya manganagana

¹ Mufumeli Dhavhidhe a di engedza a embela tshangano, khuye: “Mwamana wangu Solomoni, khuye ekha a hathidwego khu Nungungulu, aholu uye a ngari gyanana a si guti gilo, nari gu thumo wowu wu khongolo, kholu Nyumba yeyi kha yi lumbi muthu, aholu khya Pfhumu Nungungulu.

² Nyi dzi garadzide khu tshivba yangu yatshavbo, nyi dongisede satshavbo si vbwetegago gasi gu vbaha Nyumba ya Nungungulu wangu: Ndralama yi yelanago ni mithumo ya ndralama, parata nya gugimbidzise mithumo ya parata, sugu nya gugimbidzise mithumo ya sugu, simbi nya gugimbidzise mithumo ya dzisimbi ni mapulango nya guyelane ni mithumo ya mapulango; siwindri nya Onekisi, siwindri nya wumburi niso nya mavalavala, ni siwindri nya gukhedzige niso nya guhandzegele ni satshavbo nya lisima khu talo nya iso.

³ Vbavbandze nya satshavbo nyi dongisedego, nya guvbahe khiso Nyumba ya Nungungulu wangu, eni nyabune nyi ngu dusa ningelo wangu nya ndralama ni parata nyi gu naso nyi ngu ningela gasi si lumba Nyumba ya Nungungulu wangu, vbavbandze ga satshavbo nyi dongisedego gu vbaha Nyumba ni Wulanga nya Guage:

⁴ Magumararu mazana (3.000) dzitaleta nya ndralama, ndralama nya Ofiri ni livbandre na mavili magumi mazana (7.000) dzitaleta nya parata nya guhutwe, gasi gu londra khiso dzindzari nya dzinyumba;

⁵ ndralama nya gugire mikanvu nya ndralama, parata nya gugire sombo nya parata, ni ya mithumo yatshavbo ya vameseri. Khu guralo, khu mani nuye a dzinago gu ningela ga Pfhumu Nungungulu ningelo waye?”

⁶ Khavbo avbo, vathangeli nya dzindranga, manganagana nya mahundzu ya Israyeli, vathangeli nya sikwata nya likhumi mazana (1.000), niso nya lizana (100), ni vathangeli nya mithumo ya mufumeli, va di ningela navo miningelo yawe khu gugola.

⁷ Va di ningela gasi gu gira thumo nya guvbahe Nyumba ya Nungungulu; livbandre magumi mazana (5.000) dzitaleta nya ndralama, likhumi magumi mazana (10.000) sombo nya ndralama, likhumi magumi mazana (10.000) dzitaleta nya parata, likhumi na livbandre na mararu magumi mazana (18.000) dzitaleta nya sugu ni lizana magumi mazana (100.000) dzitaleta nya dzisimbi.

⁸ Avo va nga mana siwindri nya lisima va di si ningela gasi guta khala thomba ya Nyumbani ga Pfhumu Nungungulu, khu mandzani ga Jeyeli, Mugerisoni.

⁹ Vathu va di nengela khesi va nga ningela khu gugola gwawe; kholu va di ningela miningelo yawe ga Pfhumu Nungungulu khu matsenya; mufumeli Dhavhidhe nuye a di nengela khu litsako nya likhongolo.

Nombelo wa Dhavhidhe

¹⁰ Khavbo avbo, Dhavhidhe a di rungudza Nungungulu, na gu wonwa khu tshangano watshavbo, khuye: U na bongwe Uwe Pfhumu Nungungulu wa babe wathu Israyeli, khu gupindruga ni gupindruga!

¹¹ Wugulu, tshivba, wuzundzo, gupala ni wufumu, sa gu lumba Uwe, kholu satshavbo si guromo ndzadzini ni mafuni, sa gu lumba Uwe; wufumu khwago Uwe Pfhumu Nungungulu, U khusegidego ngudzu, U fumago silo satshavbo.

¹² Dzithomba ni wudhumo sa guta khu mbeli gwago, Uwe U ngu fuma satshavbo, mandzani gwago yomo tshivba ni wufumu; khuwe basi U ningago wugulu ni gu ninga tshivba silo satshavbo.

¹³ Khu guralo, olu Uwe Nungungulu wathu, ethu hi ngu gu bonga ni gu rungudza lina lago nya wudhumo.

¹⁴ Kholu eni, gumogo ni vathu vangu, khethu vamani nya gukala hi dzi kodza gu ningela khu gugola silo nya nga esi? Satshavbo sa guta khiyo gwago, iso hi ningedego hi si manide mandzani gwago.

¹⁵ Kholu ethu mbeli gwago hi valuveli ni vaendri, kha nga vanyehe vathu vatshavbo; matshigu yathu momo kha nga mwedzi mafuni momu, hi mwalo gimbe gitumbo.

¹⁶ Olu Uwe Pfhumu Nungungulu wathu, satshavbo sesi hi dongisedego gu gu vbahela khiso nyumba yi lumbago lina lago nya guage, hi si hakhide khu mandzani gwago, gambe sa gu lumba Uwe.

¹⁷ Nungungulu wangu, nyi ngu dziti gukheni, Uwe u ngu khedza myonyo ni gu gambe, U ngu salalegiswa khu gululama; khu guralo, eni neni khu gutsaka nya monyo wangu nyi ngu gu ninga silo sesi, olu nyi wonide khu gunengela iso vathu vago va guromo avba va ningedego khu gugola nya myonyo yawe.

¹⁸ Pfhumu Nungungulu wa vababe vathu Abrahama, Isaki ni Israyeli, si vegedze gikhati gyatshavbo, si khala mapimoni ni myonyoni ga vathu vago, va alakanya Uwe basi.

¹⁹ Mwamana wangu Solomoni, mu ninge monyo wu vbeledego gasi a kodze gu sayisa milayo yago, magana ni sileletelo sago, a gira satshavbo gasi a kodza gu vbaha nyumba yeyi yago nyi yi dongisedego.

²⁰ Khavbo avbo, Dhavhidhe a di embela tshangano watshavbo, khuye: “Olu dhumisani Pfhumu Nungungulu wanu!” Khavbo avbo, tshangano watshavbo wu di dhumisa Pfhumu Nungungulu wa vababe vawe, va noga va thega khu dzikhovbe mbeli ga Pfhumu Nungungulu ni ga mufumeli.

Solomoni a ngu emiswa gu khala mufumeli

²¹ Khu litshigu li landrelago, va di phasela ga Pfhumu Nungungulu miphaselo nya gubonge ni miphaselo nya guvbiswe, khu likhumi mazana (1.000) dzimombe, likhumi mazana (1.000) dzinvuta, likhumi mazana (1.000) dzihamba ni miningelo nya wadwa, ni yimbe miphaselo nya yingi khu vatshavbo va na Israyeli.

²² Va di hodza ni gu sela khu litshigu lile mbeli ga Pfhumu Nungungulu, khu gunengela nya gukhongolo ngudzu; khu gu landrela va di pharisa ndronga nya wufumu Solomoni, mwamana wa Dhavhidhe, gu khala muthangeli, va mu todza khu mafura mbeli ga Pfhumu Nungungulu, va todza gambe Sadhoki gu khala muphasi nya mhamba.

²³ Solomoni a di khala vbagikhalotunu nya wufumu gya Pfhumu Nungungulu, a khala mufumeli wulangani wa babe waye Dhavhidhe; a di khusega, vatshavbo va na Israyeli va mu ninga githawo ni gu mu yingisa.

²⁴ Manganagana yatshavbo, ni vakhongolo gumogo ni sanana satshavbo sa mufumeli Dhavhidhe, va di dzi nogisa ga mufumeli Solomoni.

²⁵ Pfhumu Nungungulu a di khusedza ngudzu Solomoni vbakari ga va na Israyeli vatshavbo, a dandrisa wufumu waye guvbindra vafumeli vatshavbo va fumedego Israyeli na si gu fumi uye.

Gufa gwa Dhavhidhe

²⁶ Khu guralo, Dhavhidhe, mwamana wa Jese, fumede Israyeli watshavbo.

²⁷ Matshigu a fumedego va na Israyeli, magumana myaga; dhoropani ga Hebroni, fumide livbandre na mivili myaga, Jerusalema a fuma magumararu na miraru myaga.

²⁸ Dhavhidhe, fude na gumbide ngudzu, nari ni matshigu nya gutale, dzithomba ni wudhumo, mwanaye Solomoni a di fuma a tshikedza wulanga waye.

²⁹ Mithumo yatshavbo ya Dhavhidhe nya guhegule niyo nya guhegise yi lovidwe umo nya libhuku nya matimo ya Samuweli, mutuguli nya misihalo yaye, ni umo nya libhuku nya matimo ya muprofeti Natane, ni umo nya matimo ya Gadhi, mutuguli nya misihalo;

³⁰ gomo umo gufuma gwaye gwatshavbo, ni wundrena waye, ni iso si nga dugelelago gikhatini gwaye, ga va na Israyeli ni ga mifumo yatshavbo ya mayigoni mule.