1 Dzikoronika 28 - Bhibhiliya Nya Guage

Dhavhidhe a ngu bikela Solomoni gu tshikedza vbagikhalotunu nya wufumu

¹ Dhavhidhe a di tombanisa manganagana yatshavbo ya na Israyeli dhoropani ga Jerusalema; manganagana nya mahundzu, vathangeli nya mitsawa yi nga bani yi thumela mufumeli, vathangeli nya sikwata nya likhumi mazana (1.000), ni vathangeli nya sikwata nya lizana (100), vavegedzi nya dzithomba dza mufumeli nidzo dza sanana saye, gumogo ni vahavisi nya sifuyo sa mufumeli, vathangeli nya dzinyimbi, va nya dzitshivba ni dzindrena dzatshavbo.

² Mufumeli Dhavhidhe a di khuga a ema, a ganela, khuye: Vandriyangu ni enu vathu vangu, nyi yingiseni: Nyi di suvide gu vbaha nyumba nya gukhale umo Ngasa nya Gidzumeledzwano ya Pfhumu Nungungulu, ni gigandredzelo nya migondro ya Nungungulu wathu, eni nyi dongisede iso nya guvbahe khiso.

³ Aholu Nungungulu a di nyi embela, khuye: Uwe u diri muthu nya dzinyimbi, u vbaladzide novba nya wungi, khu guralo khu dzi kodzi gu nyi vbahela nyumba.

⁴ Ambari khu guralo, Pfhumu Nungungulu wa Israyeli hawude eni, nyumbani gwatshavbo ga vavelegi vangu, gasi nyi khala mufumeli wa na Israyeli guvbanyani gwangu gwatshavbo; kholu Uye khu gale hathide Judha gu khala muthangeli, nyumbani ga na Judha hathide nyumba ya babe wangu. Ni vbakari ga sanana sa babe wangu, hathide eni nyi nga mu tsakisa, a nyi emisa gu khala mufumeli wa vatshavbo va na Israyeli kala gupindruga.

⁵ Gasi vbakari nya sanana nya singi a nyi ningidego, Uye hathide mwamana wangu Solomoni, gasi gu khala vbagikhalotunu nya wufumu wa Pfhumu Nungungulu, ni gu fumela litigo laye la na Israyeli.

⁶ Uye a di nyi embela, khuye: Mwanago Solomoni, khuye a na gu nyi vbahelago nyumba ni makupakupa yangu, kholu Eni nyi mu hathide gu khala gyanana gyangu, Eni kamwe nyi khala babe waye.

⁷ Nyi na tiyisa mufumo waye kala gupindruga, a gu simama kha nga muhuno gu landrisa milayo yangu ni sileletelo sangu.

⁸ Olu muhuno, mahoni ga vatshavbo va na Israyeli, ni ga tshangano watshavbo wa Pfhumu Nungungulu, ni dzindzeveni ga Nungungulu wathu, vegedzani ni gu landrisa milayo yatshavbo ya Pfhumu Nungungulu wanu, gasi mu kodza gu fumela litigo leli nya ladi, mu tshiyela sanana sanu, li khala thomba yawe kala gupindruga.

⁹ Gasi uwe mwanangu Solomoni, gu vbweta uti Nungungulu wa babe wago, u mu thumela khu monyo wago watshavbo, ni hefemulo wago watshavbo; kholu Pfhumu Nungungulu a ngu khedza maalakanyo nya myonyo yatshavbo, a gu pima makungo ni maalakanyo yatshavbo nya monyo; wa gu mu vbweta u na mu mana, aholu wa gu mu diga, Uye a na gu dzudzuga hwindzo kala gupindruga.

¹⁰ Olu, wona, kholu Pfhumu Nungungulu, a gu hathide gasi u mu vbahela nyumba ni Wulanga nya guage; olu tiya longo, u dzi ningela u phela thumo.

Dhavhidhe a ngu ningela Solomoni gifananiso nya Nyumba ya Nungungulu

¹¹ Dhavhidhe a di ningela mwanaye Solomoni, giwonelo nya nyangwa nya Nyumba ya Nungungulu, ni gya dzinyumba dzakone, ni dzinyumba nya dzithomba dzakone, ni makhuvi nya guhodzele umo gilalelo, ni makhuvini gakone ga ndrani ni wulanga nya miphaso.

¹² A di mu ninga gambe lipimo nya satshavbo a nga bani ari naso monyoni gwaye, ni makhuvi yatshavbo ya ndrani nya Nyumba ya Pfhumu Nungungulu, nya guvegele umo dzithomba dza Nyumbani gwa Nungungulu, ni dzithomba nya silo nya guage;

¹³ a di mu ninga gambe sasamedzo nya mitsawa nya mathumelo ya vaphasi nya mhamba khu sighava sawe, ni gya va na Levhi, ni gya mithumo yatshavbo ya Nyumbani gwa Pfhumu Nungungulu; ni gya sombo satshavbo si thumelago Nyumbani gwa Pfhumu Nungungulu.

¹⁴ A mu ninga gambe giyeyedzo nya lipimo nya ndralama ni gulemela gwayo, ni satshavbo sombo nya thumo ni thumo; ni parata ni pimo nya gulemele gwaye, nya gugire khiyo sombo satshavbo nya mithumo nya guhambanelane;

¹⁵ ni pimo nya gulemele nya dzikandriya nya ndralama, ni myenge yadzo nya ndralama mayelano ni mathumiselo nya mweyo ni mweyo.

¹⁶ A mu ninga gambe pimo nya gulemele nya ndralama nya gugire dzimeza nya miphaselo, meza ni meza ni pimo waye, ni pimo nya parata nya gugire dzimeza nya parata.

¹⁷ Ni ndralama nya gugire dzigarifi, dzimbiya ni dzikhokho nya wumburi; ni mikanvu nya ndralama ni pimo nya gulemele nya gilo ni gilo, ni simbiyana nya parata; gimbiyana ni gimbiyana ni pimo waye;

¹⁸ ni pimo nya ndralama nya guhutwe, yi na gu vbahago giluvelo nya libani gumogo gambe ni ndralama nya kareta nya dzikerubhimi, ni magirelo yaye na ma gu thawuludzide dzimbapi ma fenengedza Ngasa nya Gidzumeledzwano gya Pfhumu Nungungulu.

¹⁹ Dhavhidhe a di ganela khuye satshavbo sesi khu Pfhumu Nungungulu a nyi yeyedzidego khu gu nyi lovela khu mandza yaye, a nyi ninga mavbahelo yatshavbo.

²⁰ Dhavhidhe a di embela mwanaye Solomoni, khuye: “Tiya longo u nga thavi gilo ni gu pilega hwambo, phara thumo; kholu Pfhumu Nungungulu wangu, a na bani ari nago, gima kha na nga gu diga ambari gu gu divala, kala u vbedza thumo watshavbo nya guvbahe Nyumba ya Pfhumu Nungungulu.

²¹ Mitsawa nya vaphasi nya mhamba ni va na Levhi khiyo eyi gasi gu gira thumo watshavbo nya Nyumba ya Nungungulu. Gambe u na ni vathu nya gutale, avo va gengedego khu guti mithumo nya guhambanelane, va dzi emisedego gu thuma yatshavbo mafumbu nya mithumo. Kha nga gambe ni vathangeli vatshavbo gumogo ni vathu vatshavbo u na bani nuri navo gasi u va ruma va thuma iso u si vbwetago.”